Select a Verse
Lunyimbu lwa Musa
1Penapo Musa pamonga na Vaisilaeli vamuyimbili Bambu lunyimbu ulu,
“Yati nikumuyimbila Bambu,
muni mkulu neju, falasi na mkwela falasi avayongomisi munyanja. 2Bambu anipelili makakala na uhotola,
mwene ndi akunisangula.
Mwene ndi Chapanga wangu, yati nikumlumba mwene,
Chapanga wa dadi wangu na nene yati nikugayimba mambu gaki gakulu. 3Bambu ndi mkekesi wa ngondo,
Bambu ndi lihina laki.”
4“Mutuka ya kuhutwa na manjolinjoli ga nkosi agadumbukisi munyanja,
vatangatila vaki vabwina avadumbukisi munyanja ya Shamu.
5Manji gegavili pepanyoliki gavagukibi,
vadumbukili munyanja mbaka pahi neju ngati liganga.”
6“Bambu chiwoko chaku cha kulyelela china makakala neju,
Bambu, makakala gaku gakuvatimba makoko. 7Muukulu waku ukuvayongomesa vevakubela,
ukuvapulalila ligoga laku na lene likuvatinyisa ngati masigalilu. 8Kwa lukeku lwa meng'elu yaku manji galundimine,
Luyuga lwa manji lwayimili ngati uwa,
pandu pepanyoliki munyanja vyagandini. 9Likoko imeka, ‘Yati nikuvalanda na kuvakamula,
yati nigavanisa vindu vyavi na kutola vyoha vyenikuvigana.
Yati niholomola upanga wangu, na kuvakomakesa kwa mawoko gaku.’ 10Nambu veve wabulumisi mpungu waku, na nyanja, yavagubiki.
Vadumbukili mbaka pahi ngati lisasi.”
11“Ehee Bambu, yani mweiwanangana na veve pagati ya michapanga?
Yani mwaavili ngati veve mweuvii msopi neju,
mweuyogosa kwa matendu gakulu, mweuhenga mambu ga chinamtiti? 12Wagolwisi chiwoko chaku cha kulyelela,
na mulima wavamilili makoko vitu.
13Muuganu waku wangali mwishu uvalongwisi vandu veuvagombwili,
kwa makakala gaku uvalongwisi pandu paku Pamsopi. 14Vandu va milima yingi vayuwini ago vakandendema,
wogoyu yati ukuvakolela vandu va Filisitia. 15Vakulu va Edomu vayogwipi,
vachilongosi va Moabu vavii na wogoyu yikulu
vandu vevitama ku Kanaani vadenyiki mtima. 16Vayogwipi na vakandendemeka.
Ndava ya ukulu wa makakala gaku,
vene vagunili nuu ngati liganga,
mbaka vandu vaku Bambu vapita,
ena, mbaka vandu avo veuvagombwili vavapitili. 17Yati ukuvayingisa na kuvavika panani ya chitumbi chaku,
pala peupahagwili veve Bambu pavyai pandu pako,
pandu Pamsopi Ehee Bambu pewajengili kwa mawoko gaku. 18Veve Bambu, yati ulongosa magono goha gangali mwishu.”
Lunyimbu lwa Miliamu
19Lukumbi falasi va nkosi wa ku Misili na mutuka pamonga na vakwela falasi vaki pevayingili pandu payumu munyanja, Bambu agawuyisi manji ga nyanja na kuvagubika. Nambu Vaisilaeli vayendalili kugenda pandu payumu pagati ya nyanja.
20Hinu Miliamu mlota wa Chapanga, mlumbu wa Haloni, akatola kang'oma muchiwoko na vadala vangi voha vakamlanda kuni vatovayi tung'oma twavi na kukina. 21Miliamu akavayimbila,
“Mumyimbila Bambu muni mkulu neju,
falasi na vakwela falasi vaki avayongomisi munyanja.”
Manji gavavanu
22Kangi Musa avalongwisi Vaisilaeli kuhuma nyanja ya Shamu, vakahamba mbaka kulugangatu lwa Shuli. Vavii mulugendu lwa magono gadatu changawona manji. 23Ndi vakahika pandu pepikemelewa Mala, nambu manji ga pandu penapo gavii gavavanu neju ndi vahotwili lepi kunywa. Ndava yeniyo pandu penapo pikemiwa Mala. 24Ndi, vandu voha vamlungamiki Musa kuni vijova, “Hinu yati tinywa kyani?” 25Penapo Musa amvembalili Bambu, ndi Bambu akamlangisa lungoda, Musa akadumbukisa mumanji gakavya gabwina.
Kwenuko Bambu avapelili Vaisilaeli malagizu muni amanya ubwina wavi.
26Akamjovela, “Mukayuwanila bwina lwami lwangu Nene Bambu winu, na kukita gabwina palongolo yangu, na kutopesa mihilu na malagizu gangu goha, nene yati nikuvaletela lepi utamu ngati wula wevapewili Vamisili. Muni Nene ndi Bambu mwenikuvalamisa nyenye.”
27Kangi Vaisilaeli vahikili ku Elimu kwekwavili na vinyepa kumi na vivili na mikongo ya mitende sabini. Vakagona kwenuko papipi na manji.
