Select a Verse
Manji kuhuma palitalawu
1Kuhuma kulugangatu lwa Sini, msambi wa Vaisilaeli vavii mulugendu kuhuma pandu mbaka pandu pangi ngati chalagizi Bambu, vandu vagonili ku Lefidimu. Nambu kwenuko kwavii lepi na manji ga kunywa. 2Hinu vamvembenikili Musa kwa kujova, “Tipela manji ga kunywa.” Musa akavakota, “Mbona mukunilungamikila? Ndava kyani mukumlinga Bambu.”
3Nambu vandu vavii na njota, vamlungamikili Musa vakajova, “Ndava kyani watiwusili ku Misili utikoma kwa njota tete tavoha na vana vitu na mifuya yitu?”
4Hinu Musa amyupili neju Bambu akajova, “Yati nikuvahengela kyani vandu ava? Vavii papipi kunitova maganga!”
5Bambu akamjovela Musa, “Pita palongolo ya vandu ava uvatola vachilongosi ulongosana navo, kuni ugegili ndonga muchiwoko chaku, ndonga yila yewatovili mumfuleni Naili. 6Nene yati niyima palongolo yaku palitalahu ku Holebu, yati ukulitova litalawu kwa ndonga yeniyo na manji yati gihulula kuhuma mwenumo muni vandu voha vanywai.” Ndi Musa akitili chenicho palongolo ya vachilongosi va Isilaeli.
7Pandu penapo Musa apakemili Masa na Meliba, muni Vaisilaeli valunganike na kumlinga Bambu vakamkota, “Wu, Bambu avi pamonga na tete amala lepi?”
Vaisilaeli vitovana ngondo na Vaamaleki
8Vaamaleki vabwelili na kuvazangila Vaisilaeli kula Lefidimu. 9Musa akamjovela Yoshua, “Hagula vagosi nunuyu chilau uhamba ukatovana na Vaamaleki. Na nene yati niyima pachitumbi, kuni nikamwili muchiwoko changu ndonga yila yeanipelili Chapanga.” 10Ndi Yoshua akakita ngati Musa chaamjovili, akahamba kutovana na Vaamaleki. Lukumbi lwenulo Musa na Haloni na Huli vakakwela panani ya chitumbi. 11Yikavya Musa kila peiyinula chiwoko chaki kunani Vaisilaeli vahotwili ngondo, nambu kila peihelesa chiwoko chaki Vaamaleki vahotwili. 12Nambu mulukumbi nunuyu mawoko ga Musa gatotokili. Hinu Haloni na Huli vatolili liganga na kulivika papipi na Musa ndi akatama. Kangi vakayinula mawoko gaki yungi chiwoko cha kulyelela na yungi chiwoko cha kumangeya. Hinu mawoko ga Musa gakavya na makakala mbaka lilanga pelatipimi. 13Yoshua akavahotwili Vaamaleki kungondo kwa upanga.
14Kangi Bambu akamjovela Musa “Liyandika lijambu lenilo la uhotola muchitabu ndava yivya ukumbuso. Mjovela Yoshua kuvya chakaka yati nikuvayongomesa njwee Vaamaleki pamulima.” 15Musa akajenga mazabahu kuwusila luteta na akapakemela, “Bambu ndi bendela yangu ya kulangisa uhotola.” 16Akajova, “Muyinula kunani bendela ya Bambu! Bambu yati iyendelela kutovana ngondo na Vaamaleki magono goha gangali mwishu!”
