Select a Verse
1Penapo Yosefu akamgundamila dadi waki, akamkumbatila, akamvembela na kumbusu. 2Kangi, akavalagiza valamisa vaki vamnyala mtela Isilaeli dadi waki, muni akoto kuwola na vene vakakita chenicho. 3Lihengu lenilo la kunyala higa mtela lavii magono alobaini. Vamisili na vene vakakita malilu ga Yakobo kwa magono sabini.
4Pevamali kutinda, Yosefu akavajovela vandu va nyumba ya Falao, “Ngati mniyidakili palongolo yinu winu, chondi mulongela na Falao mumjovela naha, 5‘Dadi wangu peavili papipi kufwa, anilapakisi akajova, nivi papipi kufwa yikugana kunizika palitinda lenajihongolili pamulima wa Kanaani. Ndava yeniyo nikumuyupa anileka nihamba kumzika dadi wangu, kangi yati niwuya.’”
6Falao akayangula, “Hamba ukamzikayi dadi waku ngati cheakulapakisi.”
7Hinu, Yosefu akawuka kuhamba kumuzika dadi waki kuni alongosini na vatumisi voha va Falao, vagogo va nyumba ya Falao, pamonga na vachilongosi va vagogo va mulima wa Misili. 8Mewawa, Yosefu alongosini na vandu voha va munyumba yaki na valongo vaki na vala voha va munyumba ya dadi waki. Pamulima wa Gosheni vasigalili nga vana vavi ndu pamonga na mambelele na mene na ng'ombi zavi. 9Mewa vahambili na vakwela falasi na mutuka, wavili msambi uvaha neju.
10Pevahikili paluvanja lwa kuwulula mabenu wa Atadi, kumwambu ya mfuleni Yoludani, vamvembili kwa mvinisu uvaha, na Yosefu akamvembelela dadi waki mweafwili magono saba. 11Vakolonjinji va mulima wenuwo wa Kanaani, pevawene malilu gakitiki paluvanja lwa kuwululila mabenu wa Atadi, vakajova, “Malilu gala ga Vamisili, chakaka gavaha!” Ndava yeniyo, pandu pala pakemeliwi Abeli Mizilaimu, pavi kumwambu ya mfuleni Yoludani.
12Hinu vana va Yakobo vamkitili dadi wavi ngati cheavalagizi. 13Vagegili higa ya Yakobo mbaka kumulima wa Kanaani, vakamuzika mumbugu yeyivi kumgunda lelivi ku Makipela, kwelihumila lilanga la Mamle. Mbugu pamonga na mgunda wenuo Ibulahimu agulili kwa Efuloni wa likabila la Vahiti, muni pavya pandu paki pa kuzikila. 14Peamali kumuzika dadi waki, Yosefu awuyili ku Misili pamonga na valongo vaki na vandu voha vevalongosini nawu kuhamba kumzika dadi waki.
Yosefu akuvahadila valongo vaki uteke
15Peamali kufwa dadi waki, valongo vaki Yosefu vakajovesana, vakajova “Pangi Yosefu yati akutivenga na kutilipisa gahakau goha getimukitili.” 16Ndava yeniyo vakampelekela Yosefu ujumbi, vakajova, “Dadi witu, kwakona angafwa, atilekili malagizu aga, 17Atijovili tikujovela naha, ‘Chondi ukoto kuvalipisa valongo vaku mabudilu gavi gahakau na mambu goha gevakukitili.’ Hinu chondi utilekekesa mabudilu na kuhoka kwetakukitili tete vatumisi va Chapanga wa dadi waku.” Yosefu peayuwini genago, avembili.
18Kangi valongo vaki vakambwelela, vakagundama mbaka pahi palongolo yaki, vakajova, “Lola, tete ndu vavanda vaku.”
19Nambu Yosefu akavajovela, “Mkoto kuyogopa, Wu, nene ndi Chapanga mweakuvahamula vandu? 20Nyenye mwaganili kunikitila uhakau, nambu Chapanga apangili gabwina muni vandu vamahele vapata kuvya mumi ngati chemwilola lelu. 21Hinu mkoto kuyogopa. Nene yati nikuvapela chakulya pamonga na vana vinu.” Ndi akavapolesa mitima na kujova nawu mbolimboli.
Yosefu ifwa
22Yosefu atamili pamulima wa Misili pamonga na vandu voha va munyumba ya dadi waki. Atamili miyaka miya yimonga na kumi. 23Yosefu avawene vana na vajukulu va mwana waki, Efulaimu, na mewa kuvapokela ngati vana vaki vana va Makili mwana wa Manase. 24Mwanakandahi Yosefu avajovili valongo vaki, “Nene hinu nivi papipi kufwa. Nambu Chapanga chakaka yati akuvabwelela kuvatangatila. Yati akuvawusa pamulima uwu na kuvapeleka pamulima weavahaidi Ibulahimu na Isaka na Yakobo.” 25Kangi Yosefu akavajovela vana va Isilaeli, valapa, akajova, “Chapanga peakuvabwelela kuvatangatila, yikuvagana mgega mahupa gangu kuhuma kuni muwuka nayu.” 26Hinu Yosefu akafwa kula ku Misili, kuni avi na miyaka miya yimonga na kumi. Na vene vakaunyala higa yaki mtela ukoto kuwola, vakauvika mulisanduku kula ku Misili.
