Select a Verse
Bambu Chapanga akumtuma Yoshua akavatova Vakanani na kuutola Mulima
1Peamalili kufwa Musa mtumisi wa Bambu Chapanga, ndi Bambu Chapanga, akamujovela Yoshua mwana mgosi wa Nuni, mtangatila wa Musa. 2Akamjovela, “Mtumisi wangu Musa afwili, hinu veve pamonga na Vaisilaeli voha mjitendelekeha kukupuka mfuleni Yoludani na kuyingila kumulima wula wenikuvapela. 3Kila pandu pemwilivatila nivapelili kuvya pinu, ngati chenamuhaidili Musa. 4Mibaka ya mulima winu yati yidandasika tangiya lugangatu lwa ku Lebanoni, kangi kutumbula mfuleni uvaha wa Fulati, yani mulima woha wa Vahiti, mbaka Nyanja yila yivaha yeyivili upandi walitipamila lilanga. 5Kawaka mundu mwakuhotola magono goha ga wumi waku. Yati nivya pamonga na veve ngati chenavili pamonga na Musa, katu magono goha yati nikukosiwa lepi. 6Ukangamala na kuvya mkekesi, muni veve yati ukuvalongosa vandu ava kuutola mulima kuvya wavi wenavalapakisili vagogo vavi kuvya yati nikuvapela. 7Ukangamala na kuvya na ukekesi. Uyendelela magono goha kuyidakila malagizu goha geakulagizi Musa mtumisi wangu, kotoka kuleka kuyidakila mihilu yoyoha pagati ya yeniyo, kwa kukita genago mambu gaku yati gakuvahambila bwina kwokwoha kwewihamba. 8Kotoka kuleka kugajova malovi ga chitabu chenichi nambu ujiwula malovi gaki kilu na muhi, muni uhotolayi kuhenga goha ngati chegayandikwi mugati yaki. Ukakita genago ndi mambu gaku goha geuhenga yati gakuhambila bwina. 9Kumbuka nene ndi mwenikulagizi muni usindimala na kuvya na ukekesi! Kotoka kuyogopa amala kudenyeka mtima, ndava nene Bambu Chapanga waku, nivili pamonga na veve popoha pewihamba.”
Yoshua akuvalagiza vandu vakupuka mfuleni Yoludani
10Kangi Yoshua akuvalagiza vachilongosi va vandu akajova, 11“Mpita mumandanda na muvajovela vandu kuvya, ‘Mutendelekelayi chakulya, muni mumagono gadatu yati mukupuka mfuleni Yoludani, kuhamba kuutola mulima wula Bambu Chapanga winu avapelili uvya winu.’ ”
12Yoshua akavajovela vandu va likabila la Leubeni na Gadi na yapinga va likabila la Manase: 13“Mukumbukayi Bambu Chapanga chamlagizi Musa, kuvya Bambu Chapanga winu yati akuvapela nyenye pandu pa kupumulila, na mwene yati akuvapela mulima uwu kuvya winu. 14Vadala vinu na vana vinu na mifuya yinu yati visigalila mumulima wenuwo wemupewili na Musa upandi welihumila lilanga wa mfuleni Yoludani. Nambu manjolinjoli vinu vevanavindu vya ngondo yati vikupuka mfuleni kuvalongolela valongo vavi Vaisilaeli kuhamba kuvatangatila. 15Yati mukuvatangatila valongo vinu pandu yegwa pa kupumulila, valongo vinu Vaisilaeli ngati chemupewili nyenye, mewawa na vene vautola mulima kuvya wavi wevapewili na Bambu Chapanga. Mkamala yati muwuya kumulima wemwatolil na kutama mwenumo Musa, mtumisi wa Bambu Chapanga kumwambu ya mfuleni Yoludani kwelihumila lilanga.”
16Vandu vakamuyangula Yoshua, “Mambu goha geutilagizi yati tihenga, na popoha peukutijovela tihamba yati tihamba. 17Ngati chetamuyidakiliyi Musa magono goha, na veve mewawa yati tikukuyidakila, Bambu Chapanga waku avyayi pamonga na veve ngati cheavili pamonga na Musa. 18Mundu yoyoha mweakugabela malagizu gaku amala kubela kuyidakila malovi gaku amala chochoha cheukumlagiza, iganikiwa akomiwa. Nambu veve ukangamala na kuvya mkekesi.”
