Select a Verse
Uhakasa weuhuma muhiga wangayidakiliwa mukumfugamila Chapanga
1Kangi Bambu Chapanga akamjovela Musa na Aloni, 2Muvajovela vandu va Isilaeli naha, mgosi yeyoha peihumisa uhakasa weuhuma kuhotelu wa chigosi, uhakasa wenuwo ndi chindu changayidakiliwa mukumfugamila Chapanga. 3Yikavya uyendelela kuhuma uhakasa wenuwo amala udivalili mugati yaki, ndi ukumkita mgosi mwenuyo angayidakiliwa mukumfugamila Chapanga. Chechilanda ndi cheukumkita mundu mwenuyo akoto kuyidakiliwa mukumfugamila Chapanga, 4Chitanda chochoa cheigonela amala kutamila mgosi mwenuyo, yati chivya changayidakiliwa mukumfugamila Chapanga. 5Mundu yeyoha mweipamisa chitanda cha mgosi mwenuyo yikumgana achapa nyula zaki na kusamba, na mwene yati ivya angayidakiliwa mukumfugamila Chapanga mbaka kimihi. 6Mundu yeyoha mweitamila chindu chochoa cheatamalili mgosi mwenuyo mweihula uhakasa, ndi yikumgana achapa nyula na kusamba, ndi yati ivya angayidakiliwa mukumfugamila Chapanga mbaka kimihi. 7Mewa mundu yeyoha mweakumpamisa mgosi mweihulula uhakasa, yikumgana achapa nyula zaki pamonga na kusamba, mwene yati ivya angayidakiliwa mukumfugamila Chapanga mbaka kimihi. 8Mundu yeyoha akahunyiwa mata na mgosi mweihulula uhakasa, ndi yikumgana mundu mwenuyo mweahunyiwi mata achapa nyula zaki na kusamba, mwene mewa yati ivya angayidakiliwa mukumfugamila Chapanga mbaka kimihi. 9Litandiku loloha leitamila mgosi mwenuyo mweihuma uhakasa lukumbi lwa kutama pachinyama yati livya langayidakiliwa mukufugama. 10Mundu yeyoha mweipamisa chindu chochoa cheatamili mgosi mwenuyo, yati ivya angayidakiliwa mukumfugamila Chapanga mabaka kimihi. Mewawa mundu yeyoha mweigega chindu chochoa chechavili cha mgosi mwenuyo ndi yikumgana achapa nyula zaki na kusamba, mwene yati ivya angayidakiliwa mukufugama mbaka kimihi. 11Mgosi yeyoha mweihulula uhakasa akampamisa mundu changali kusanja hoti mawoko gaki na kusamba, yula mweapamiswi yikumgana achapa nyula zaki na asamba maji, na mwene yati ivya angayidakiliwa mukufugamila mbaka kimihi. 12Chindu chochoa cha ludaka chechipamiswi na mgosi mweihulula uhakasa ndi yiganikiwa chibayuliwa. Nambu chindu chochoa cha chikongo ndi yiganikiwa chisanjwa kwa manji.
13Mgosi mwenuyo mweihulula uhakasa akalamiswa utamu waki, ndi yikumgana alindila magono saba kwakona kuwusiwa uhakasa waki. Yati ichapa nyula zaki na kusamba kwa manji ga mfuleni, na mwene yati inyambisika. 14Ligono la nane, ndi yiganikiwa aleta ngunda zivili amala mawela ga majiva gavili palongolo ya Chapanga pamlyangu wa lindanda la kukonganekela na kumgotolela mteta wa Chapanga. 15Mteta wa Chapanga yati akuvawusa venavo, mmonga ndava ya luteta lwa kulekekesa kumbudila Chapanga na yungi ndava ya luteta lwa kutinyiswa, mteta wa Chapanga yati akumhengela mgosi mwenuyo utepulanisi palongolo ya Chapanga na kwa kukita chenicho mteta yati akumtepulanisa na Bambu Chapanga.
16“Ngati mgosi mwenuyo akahulula mbeyu zaki mwene, ndi yikumgana asamba higa yoha kwa manji, mwene yati ivya angayidakiliwa mukufugama mbaka kimihi. 17Nyula yeyoha yeyigwiliwi na mbeyu za chigosi amala chikumba chochoa chechipamiswi na mbeyu za chigosi zenizo ndi yiganikiwa ichapiwayi kwa manji, na yati yangayidakiliwa mabaka kimihi. 18Ngati mgosi akagonekana na mdala, akahumisa mbeyu za chigosi, ndi yikuvagana voha vavili vasamba kwa manji, na vene yati vivya vangayidakiliwa mukufugama mbaka kimihi.”
19Mdala yeyoha peivya kumwehi, yati ivya angayidakiliwa mukufugama kwa magono saba. Mundu yeyoha mweakumpamisa mdala mwenuyo yati ivya angayidakiliwa mukufugama mbaka kimihi. 20Chindu chochoa cheitamila amala kugonela mdala mwenuyo lukumbi mwene avi mumwehi, yati chivya changayidakiliwa mukufugama. 21Mundu yeyoha mweipamisa chitanda cha mdala mwenuyo ndi yikumgana achapa nyula zaki na kusamba kwa manji, mwene yati ivya angayidakiliwa mukufugama mbaka kimihi. 22Mundu yeyoha mweipamisa chindu chochoa cheitamila mdala mwenuyo ndi yikumgana achapa nyula zaki na kusamba kwa manji, mwene yati ivya angayidakiliwa mukufugama mbaka kimihi. 23Mgosi yeyoha mweipamisa chindu chochoa cheagonili amala cheatamila mdala yula, yati ivya angayidakiliwa mukufugama mbaka kimihi. 24Ngati mgosi akagonayi na mdala mwenuyo na ngasi ya mdala yikamgwilila mgosi mwenuyo, ndi, mgosi mwenuyo yati ivya mhakasa mulukumbi lwa magono saba. Chaitanda chochoa cheigonela mgosi mwenuyo yati chivya changayidakiliwa mukufugama.
25Ngati mdala avi mumwehi kwa magono gamahele neju ya magono gaki ga kuvya mumwehi amala magono gaki gayongasiki kuliku uyovalelu waki, ndi yati iyendelele kuvya angayidakiliwa mukufugama lukumbi lwoha peivya mumwehi ngati cheivili mumagono gaki gauyovalelu. 26Chitanda chochoa cheigonela lukumbi lwenulo amala chigoda chochoha cheitamila, yati chivya changayidakiliwa mukufugama kuwanangana na peavili mumwehi. 27Mundu yeyoha mweipamisa vindu vyenivyo, yati ivya angayidakiliwa mukufugama, ndi yikumgana achapa nyula zaki na kusamba, mwene yati ivya angayidakiliwa mukufugama mbaka kimihi. 28Mdala mwenuyo peileka kuvya mumwehi yikumgana atama magono saba, ndi peiyidakiliwa mukufugamila. 29Paligono la nane yati itola ngunda zivili amala mawela gavili ga majiva na kumletela mteta wa Chapanga pamlyangu wa lindanda la kukonganekela. 30Mteta wa Chapanga yati akuyiwusa yimonga ndava ya luteta lwa kulekekesa kumbudila Chapanga na yingi ndava ya luteta lwa kutinyiswa. Kwa kukita chenicho ndi Mteta wa Chapanga yati akumhengela mdala mwenuyo utepulanisi palongolo ya Chapanga na kumuwusila uhakasa waki wa kuhuma ngasi.
31“ ‘Yiganikiwa uvahakalila vandu va ku Isilaeli vatama kutali na vindu vyevikuvakita vavya vangayidakiliwa mukufugama, yikavya vakakitayi mambu genago yati vakulikita lindanda langu la kukonganekela lelivi pagati yinu likoto kuvya pandu pepiyidakiliwa kunifugamila, na vakakita chenicho yati vifwa.’”
32Genaga ndi malagizu kumvala mgosi mweihulula uhakasa weuhuma kuhotelu wa chigosi, na mgosi yeyoha mweihumisa mbeyu za chigosi na kuvya angayidakiliwa mukufugama, 33mewawa malagizu aga gakumvala mdala mweavii mumwehi na kuvya angayidakiliwa mukufugama. Mewa gakumvala mgosi amala mdala yeyoha mweihumisa chindu chochoa chechihakasa kuhotelu kwaki na mewa gakumvala mgosi mweigonekana na mdala mweavi angayidakiliwa mukufugama.
