Select a Verse
Mota kwa vevakumyidakila Chapanga
(Ukumb 7:12-24; 28:1-14)
1Bambu Chapanga akajova, “Mkoto kujitengenezela vimong'omong'o vya michapanga ya udesi, mkoto kuvika vimong'omong'o vyavi vya kuhongola mewa nguzu za maganga gegahongoliwi pamulima winu na kuvingundamila. Nene ndi Bambu Chapanga, Chapanga winu. 2Mukamula Ligono langu la Kupumulila na kulitopesa Kindanda langu la Msopi. Nene ndi Bambu Chapanga.”
3“Ngati mwitama kwa kulanda malagizu gangu na kuvya vayangalila kuyidakila mihilu yangu, 4yati nikuvatonyela fula mulusenje lwaki, na ndima yati yipambika mabenu gaki na mikongo ya kumgunda yati yipambika matunda gaki. 5Kupeta mabenu kwiyendelela mbaka lukumbi lwa kubena zabibu, na ubenaji wa zabibu yati wiyendelela mbaka lukumbi lwa kumija mbeyu. Yati mwivya na chakulya chamahele na kutama kwa ubwina pandima yinu.”
6Yati nikuvapela uteke pamulima hati muhotola kugona changali wogohi wowoha. Yati nikuhiwusa hinyama hikali pandima yinu na mulima winu yati wivya lepi na ngondo. 7Yati mukuvavinga makoko vinu na kuvakoma kwa upanga. 8Vandu mhanu pagati yinu yati vakuvavinga vamakoko miya yimonga mewawa vandu vinu miya yimonga yati vakuvavinga vamakoko elufu kumi. Vamakoko vinu yati viyongomela palongolo ya yinu kwa upanga. 9Yati nikuvamotisa na kuvahotosa mpata vana vamahele na kuyonjokeseka, nene yati nikulitimisa lilaganu langu na nyenye. 10Lukumbi lwa kubena yati mwivya mwakona mwilya mabenu ga kadeni, kavili yati yikuvagana kuwusa gegasigalili ndava ya kupata fwasi ya kuvika mabenu gamupya. 11Na nene yati nitama na nyenye, na yati nikuvaleka lepi. 12Yati nitama pagati yinu na kuvya Chapanga winu na nyenye yati mwivya vandu vangu. 13Nene ndi Bambu Chapanga, Chapanga winu, mwenivawusili kuhuma ku mulima wa ku Misili muni mkoto kuvya vavanda wa Vamisili. Nene nidenyili lingolingoli lemwakungiwi muhingu zinu na kuvakita mgenda kuni muyinwili mitu kunani.
Mbunu wa kubela kuyidakila
(Ukumb 28:15-68)
14Bambu Chapanga akajova, “Nambu ngati mukuniyuwanila lepi na kulanda mihilu yangu, 15ngati mwibela malagizu gangu na kuvenga mihilu yangu na kuleka kuyidakila malagizu yangu yoha na kudenya lilaganu langu. 16Yati nikuvakitila genga, yati kuvaletela wogohi ukulu wa chighafula, utamu wa kukohomola kwa ngalama na utamu wa kukoyosa mihu na kuvakita muganda. Yati mwimija mbeyu zinu changali kubena muni makoko vinu yati vilya chila chemumijili. 17Nene yati nikuvapela chihugu, na nyenye yati mwitovewa na vamakoko vinu, yati mwitalaliwa na vala vevakuvavenga. Yati mwiyogofya na kujumba hati ngati kawaka mundu yeyoha mweakuvajumbisa.”
18Ngati genago goha gavakolili na mwakona mukuniyuwanila lepi, hinu yati nikuvabuna mala saba neju ndava ya kunibudila kwinu kwemukitili. 19Ndindani yinu yati nikuyidenyela kutali kwa kukita kunani kwa Chapanga kuvya kunonopu ngati lyuma, na ndima yinu yivya yiyumu ngati shaba. 20Hati ngati mkakangamala kugaba makakala ginu yati gihengeka waka, ndava muni ndima yinu yati yipambika lepi mabenu gaki, mewa mikongo ya ndima yati yinu yipambika lepi matunda gaki.
21“Ngati muyendelela kubela kuniyuwanila, yati niyonjekesa kavili mbunu kwinu mala saba kuwanangana na umahele wa kubuda kwemuhengili. 22Yati nikuhileta hinyama hikali ya kudahi pagati yinu vevakuvatola vana vinu na kulya mifuya yinu, nene yati nikuvapunguza muvya mwavadebe na kawaka mundu mweipita munjila zinu.”
23“Ngati pamonga na mambu genago mwakona muyidakili lepi uhakalila wangu nambu muyendelela kuvika umakoko na nene, 24namwene yati nivika umakoko na nyenye na kuvang'aha mala saba neju ndava ya kunibudila kwinu. 25Yati nikuvaletela ngondo yeyikuvawuyisila chisasi ndava ya lilaganu langu lemdenyili. Nyenye yati mjumbalila mumiji yinu, nambu yati nivapelekela matamu gangalama na kuvasopa mumawoko ga makoko vinu. 26Chakulya chinu yati nikuchipunguza hati vadala kumi yati viteleka mabumunda pachihinja chimonga. Yati vakuvagavila libumunda chidogo kwa chipimu. Yati mwila nambu muyukuta lepi.”
27“Ngati genago goha gavakolili na muyendelela kunibela, 28ndi kwa ligoga langu yati nivika umakoko na nyenye, namwene yati nikuvabuna mala saba ndava ya kunibudila kwemuhengili. 29Njala yinu yati yivya yivaha mbaka yati mwilya vana vinu, vagosi na vadala. 30Yati nihalabisa pandu pinu pa kuniyupila kuchitumbi, yati nigwisa pandu pa kuwusila teta zinu za kuhukisila ubani, na kutaga mituhi yinu panani ya vimong'omong'o vya michapanga yinu. Mtima wangu yati ukuvavenga neju. 31Miji yinu yati nikuyiyongomesa na pandu pinu pakuniyupila yati nikupakita pavya pangali chindu na nene yati niganiswa lepi na mnungalilu wabwina wa teta zinu. 32Yati nikuyiyongomesa mulima winu muni makoko vinu pevibwela kutama mwenumo vakangasa. 33Yati nikuvadandasa nyenye pagati ya vandu va milima yingi na kuholomola upanga ndava yinu. Mulima winu yati wivya ukiva na miji yinu yati yivya mang'ova. 34Hinu nyenye pemwivya mumawoko ga makoko vinu, penapo ndi ndima peyihekelela Magono ga Kupumulila gaki lukumbi kuni yivi muukiva. Ndima yati yipumulila na kuhekelela Magono Kupumulila gaki. 35Ndi cheyivya mulukumbi lwa ukiva ndima yati yipumulila, kupumulila kwangahumalila lukumbi pemwatamili mwenumo.”
36“Na vangi pagati yinu vevisigalila bwina yati nikuvaletela wogohi mumitima yavi mundima ya makoko vinu hati linyai lelipepela kwa mpungu yati likuvakita vatila. Yati vijumba ngati kuvii na mundu mweakuvajumbisa na upanga na yati vigwa hati ngati kawaka mundu mweakuvajumbisa. 37Yati vigwilingana vene kwa vene ngati mundu mweijumba akoto kutovewa na upanga. Yati mwivya lepi na makakala ga kutovana na makoko vinu. 38Yati mwifwa pagati ya vandu va milima yingi, ndima ya makoko vinu yati yikuvamila. 39Ngati vangi pagati yinu vakasigalila bwina pandima ya makoko vinu yati vikomakeswa ndava ya kubuda kwavi, mewa ndava ya kubuda kwa vagogo vavi.”
40“Nambu ngati vakayidakila kunibudila kwavi vene na ndava ya kubuda kwa vagogo vavi kwa udesi wevakongili na ndava ya kunibela nene, 41vakamanya ndava kyani napingini navu na kuvapeleka mundima ya makoko wavi, chakaka ngati mitima yavi yindindani yikaleka kunibudila kwavi, 42penapo ndi nene yati nikumbuka lilaganu langu lenavikili na Abulahamu na Isaka na Yakobo na kuyikumbuka ndima yila yenajovili nikuvapela. 43Lukumbi pevivya kuvala ya mulima wavi mulima wenuwo yati wihekelela magono gaki ga kupumulila kuni yivi muukiva. Yati vilipiswa ndava ya kunibudila kwavi, ndavamuni vabelili malagizu gangu na kuyivenga mihilu yangu. 44Nambu pamonga na genago, lukumbi vavi ku ndima ya makoko vavi, yati nikuvabela lepi mewa nikuvavenga lepi hati kuvayongomesa njwe na kudenya lilaganu langu nawu. Nene ndi Bambu Chapanga, Chapanga wavi. 45Nambu ndava yavi yati nikulikumbuka lilaganu lenahengili na vagogo vavi venavawusili kuhuma mulima wa ku Misili, kuni vandu va milima yingi vilola, muni nivya Chapanga wavi. Nene ndi Bambu Chapanga.”
46Genaga ndi malagizu na mihilu, Bambu Chapanga yeavapeli vandu va Isilaeli ku chitumbi cha Sinai munjila ya Musa.
