Select a Verse
1“बसलेल अऊर ओहोलीआब अऊर सब बुद्धिमान जिन्ख परमेश्वर न असी बुद्धि अऊर समझ दियो हो कि हि परमेश्वर की पूरी आज्ञावों को अनुसार पवित्र जागा की सेवा लायी सब तरह को काम करनो जानय हय, हि सब यो काम करेंन।”
लोगों द्वारा बहुत सी भेंट
2तब मूसा न बसलेल अऊर ओहोलीआब अऊर सब बुद्धिमानों ख जिन्को दिल म परमेश्वर न बुद्धि को प्रकाश दियो होतो, मतलब जेख जेख जवर आय क काम करन को उत्साह भयो होतो उन सब ख बुलायो; 3अऊर इस्राएली जो जो भेंट पवित्र जागा की सेवा को काम अऊर ओख बनावन लायी ले आयो होतो, उन्ख उन आदमियों न मूसा को हाथ सी ले लियो। तब भी लोग हर सुबेरे ओको जवर भेंट अपनी इच्छा सी लावतो रहो; 4अऊर जितनो बुद्धिमान पवित्र जागा को काम करत होतो हि सब अपनो अपनो काम छोड़ क मूसा को जवर आये, 5अऊर मूसा सी कहन लग्यो, “जो काम ख करन की आज्ञा परमेश्वर न दियो हय ओको लायी जितनो होनो ओको सी जादा हि ले आयो हंय।” 6तब मूसा न पूरी छावनी म या आज्ञा को प्रचार करवायो, “का आदमी, का बाई, कोयी पवित्र जागा लायी अऊर भेंट नहीं लाये।” यो तरह लोग अऊर भेंट लावन सी रोक्यो गयो; 7कहालीकि सब काम बनावन लायी जितनो सामान जरूरत होतो, ओको सी जादा बनावन वालो को जवर आय चुक्यो होतो।
निवास जागा को निर्मान
(निर्गमन २६:१-३७)
8काम करन वालो जितनो कुशल कारीगर होतो उन्न निवास लायी यां परदा पतलो सूत सी बुन्यो हुयो नीलो, जामुनी अऊर लाल रंग को कपड़ा को दस परदा ख बुनायी करयो हुयो करूबों सहित बनायो। 9हर एक परदा की लम्बायी अट्ठावीस हाथ अऊर चौड़ायी चार हाथ की होना; सब परदा एकच नाप को बने। 10ओन पाच परदा एक दूसरो सी जोड़ दियो, अऊर फिर दूसरो पाच परदा भी एक दूसरो सी जोड़ दियो। 11अऊर जहां यो परदा जोड़्यो गयो वहां की दोयी कोनो पर ओन नीलो नीलो फन्दा लगाये। 12ओन दोयी कोना म पचास पचास फन्दा यो तरह लगाये कि हि एक दूसरो को आगु रहे। 13अऊर ओन सोनो को पचास आकड़ा बनाये, अऊर उन्को द्वारा परदा ख एक दूसरो सी असो जोड़्यो कि निवास मिल क एकच भय गयो।
14तब निवास जागा को ऊपर को तम्बू लायी ओन शेरी को बाल को ग्यारा परदा बनाये। 15एक एक परदा की लम्बाई तीस हाथ अऊर चौड़ाई चार हाथ की भयी; अऊर ग्यारा परदा भी एकच नाप को होतो। 16इन म सी ओन पाच परदा अलग अऊर छय परदा अलग जोड़ दियो। 17अऊर जहां दोयी जोड़्यो गयो वहां को कोना म ओन पचास पचास फन्दा लगाये। 18अऊर ओन तम्बू को जोड़न लायी पीतल को पचास आकड़ा भी बनाये जेकोसी ऊ एक होय जाये। 19अऊर ओन तम्बू लायी लाल रंग सी रंगी हुयी मेंढा की खालों को एक ओढ़ना अऊर ओको ऊपर लायी सुइसों की खालों को भी एक ओढ़ना बनायो।
20तब ओन निवास लायी बबूल की लकड़ी को तक्ता ख खड़ो रहन लायी बनायो। 21हर एक तक्ता की लम्बायी दस हाथ अऊर चौड़ायी देड़ हाथ की भयी। 22हर एक तक्ता म एक दूसरो सी जोड़ी हुयी दोय दोय खाचा बन्यो, निवास को सब तक्ता ख ओन एक जसो बनायो। 23ओन निवास लायी तक्ता ख बनायो कि दक्षिन को तरफ बीस तक्ता; 24अऊर इन बीसों तक्ता को खल्लो चांदी की चालीस पाया, मतलब एक एक तक्ता को खल्लो ओकी दोय खाचा लायी ओन दोय कुर्चियां बनायी। 25अऊर निवास की दूसरो तरफ, मतलब उत्तर को तरफ लायी भी ओन बीस तक्ता बनाये; 26अऊर इन्को लायी भी ओन चांदी की चालीस पाया, मतलब एक एक तक्ता को खल्लो दोय दोय पाया बनायी। 27अऊर निवास को पीछु को तरफ, मतलब पश्चिम को तरफ को लायी ओन छय तक्ता बनायो; 28अऊर पिछलो हिस्सा म निवास को कोना लायी ओन दोय तक्ता बनायो। 29हि खल्लो सी दोय दोय हिस्सा को बने, अऊर दोयी हिस्सा ऊपर को कोना तक एक एक कड़ा म मिलाये गयो; ओन उन दोयी तक्ता को आकार असोच बनायो 30यो तरह आठ तक्ता भयो, अऊर उन्की चांदी की सोला पाया भयी; मतलब हर एक तक्ता को खल्लो दोय दोय पाया भयी।
31तब ओन बबूल की लकड़ी की बेंड़े बनायो, मतलब निवास को एक तरफ को तक्ता लायी पाच बेंड़ा, 32अऊर निवास को दूसरो तरफ को तक्ता लायी पाच बेंड़ा, अऊर निवास को जो किनार पश्चिम को तरफ पिछलो हिस्सा म होतो ओको लायी भी पाच बेंड़ा बनायो। 33अऊर ओन बीच वालो बेंड़ा ख तक्ता को बीच म तम्बू को एक कोना सी दूसरो कोना तक पहुंचन लायी बनायो। 34अऊर तक्ता ख ओन सोनो सी मढ़यो, अऊर बेंड़ों ख जो घर को काम देन वालो कड़ा ख सोनो को बनायो, अऊर बेंड़ा ख भी सोनो सी मढ़यो।
35फिर ओन नीलो, जामुनी अऊर लाल रंग को कपड़ा को, अऊर पतलो सूत सी बुन्यो हुयो कपड़ा को बीच वालो परदा बनायो; ऊ बुनायी को काम करयो हुयो करूबों को संग बनायो। 36ओन ओको लायी बबूल को चार खम्बा बनायो, अऊर उन्को सोनो सी मढ़यो; उन्की घुंड़ियां सोनो की बनायी, अऊर ओन उन्को लायी चांदी को चार पाया बनायो। 37ओन तम्बू को दरवाजा लायी भी नीलो, जामुनी अऊर लाल रंग को कपड़ा को, अऊर पतलो सूत बुन्यो हुयो कपड़ा सी बुनायी को काम करयो हुयो परदा बनायो; 38अऊर ओन घुंड़ियों सहित ओको पाच खम्बा भी बनाये, अऊर उन्को कोनो अऊर जोड़न की पट्टियों ख सोनो सी मढ़यो, अऊर उन्को पाच पाया पीतल को बनायो।
