Select a Verse
Pedr mni dyux
1Na, Simón Pedr, apost jwanꞌ nge sinꞌ lo Jesucrist, nge nkeꞌn yeꞌs reꞌ lo goꞌ, goꞌ jwanꞌ nawe toz ndli lazonꞌ Dios, ta xaja náꞌ, tak Jesucrist Dios naꞌ, Xaꞌ jwanꞌ mtolanꞌ, galꞌ nak Xaꞌ. 2Yalwen nde yalnabeꞌz thibla ndoxena lazoꞌ goꞌ, beꞌ xa ndoyolo goꞌ Dios nde Jesús, Xaꞌ Nyebeꞌ lonꞌ.
Jwanꞌ ndablo li re men ndli lazonꞌ Crist
3Nde por yalne chanꞌ Dios, mdaꞌ Xaꞌ lonꞌ reta jwanꞌ nakinꞌ naꞌ sa ban naꞌ nde galꞌ xobyek naꞌ Dios, lo ta mbli Xaꞌ mbyolonꞌ Xaꞌ jwanꞌ mbrez naꞌ kon yalnaro nde yalwen chanꞌ Xaꞌ. 4Lo reta jwanꞌ reꞌ mdaꞌ Dios xkiꞌs Dios, jwanꞌ naro nde ntak toza lonꞌ. Sa lo ta mdaꞌ Xaꞌ xkiꞌs Xaꞌ, noga goꞌ ak xaja nak Xaꞌ, lo senꞌ mblaꞌa goꞌ re yalxkap nde jwanꞌ narax nyaꞌb belꞌ goꞌ ta nzo lo izyo reꞌ. 5Jwanꞌ nasa taga, naxax gok goꞌ lo jwanꞌ ndli lazoꞌ goꞌ nde lo jwanꞌ ndli lazoꞌ goꞌ blo goꞌ yalnaxut, lo yalnaxut nak goꞌ blo goꞌ yalnchak. 6Nde lo yalnchak blo goꞌ yalkenap lazoꞌ goꞌ, lo yalkenap lazoꞌ goꞌ bxek goꞌ lo re jwanꞌ, lo mxek goꞌ lo re jwanꞌ pseb lazoꞌ goꞌ Dios, 7lo mzeb lazoꞌ goꞌ Dios nabeꞌz gok goꞌ lo ta goꞌ nde lo nabeꞌz nak goꞌ lo ta goꞌ, blo goꞌ yalkeꞌ lazoꞌ.
8Tak tez reta jwanꞌ reꞌ ndono goꞌ nde ndoxena lazoꞌ goꞌ, naxax ak goꞌ nde sinꞌ toz li goꞌ tak ndoyolo goꞌ Jesucrist Xaꞌ nyebeꞌ lonꞌ. 9Leꞌ men nangenod re jwanꞌ reꞌ, xaꞌ ya nak xaja thi men lud nchoni lonꞌ, nangwid xaꞌ, nde mbyaj yek xaꞌ mbila xaꞌ lo re xken xaꞌ jwanꞌ mbli xaꞌ pola. 10Jwanꞌ nasa wes na, ptanꞌ na, ndablo thiblaꞌ pchal goꞌ sa nali tyo goꞌ lo jwanꞌ ta mbrez Dios goꞌ nde mblí Dios goꞌ, tak tez li goꞌ re jwanꞌ reꞌ nek lud naꞌgabta goꞌ lo re jwanꞌ narax. 11Tak ta sa dib naxen xyalꞌ yala yote goꞌ tenꞌ nyebeꞌ Jesucrist dib adiꞌ, Xaꞌ mtolanꞌ nde nyebeꞌ lonꞌ.
12Jwanꞌ nasa naꞌlat na nde thibla telaꞌs na lo goꞌ re jwanꞌ reꞌ, tenye mnela goꞌy nde nela ndo goꞌ lo jwanꞌ li ta nzolo goꞌ naya. 13Laja naban na, xgab na nak, galꞌ ta mbez na yek goꞌ kon re diꞌs reꞌ. 14Tak mnela na ndogaxla beꞌ lan yalnaban lo izyo reꞌ, ta xa ne Jesucrist Xaꞌ nyebeꞌ, lon. 15Jwanꞌ nasa chal toz na nin lo goꞌ, sa nayajta re diꞌs reꞌ yek goꞌ senꞌ ngujla na.
Re men jwanꞌ mbwiꞌ yalnaro chanꞌ Crist
16Senꞌ lo mbloꞌ náꞌ lo goꞌ xa nak yalne nde xa yeꞌd Jesucrist Xaꞌ nyebeꞌ, namtad lazoꞌ náꞌ re jwanꞌ mdej náꞌ lo goꞌ, tak kon ngudlopa náꞌ mbwiꞌ náꞌ xni chanꞌ Xaꞌ. 17Tak lo senꞌ Dios mbli naro Xaꞌ nde wen mni Dios lo Xaꞌ, zyasa lo xni chanꞌ Dios mbyen mni Dios nchab Dios: “Xaꞌ reꞌ nak Xinꞌ na jwanꞌ nkeꞌ toz lazoꞌn, nde Xaꞌ ngo nale lazoꞌn.” 18Náꞌ mbin diꞌs ya mbroꞌ lo beꞌ senꞌ nzi re náꞌ Jesús lo yiꞌ nayon.
19Nde lo re jwanꞌ reꞌ ngenonꞌ re diꞌs galꞌ ntak toz mdej profet, nde jwin toz li goꞌ tez xobyek goꞌ jwanꞌ nchab re profet, tak re diꞌs ya nak xaja thi ki jwanꞌ ntoxni lo yalꞌkowa laja tuxni nde yed Jesucrist Xaꞌ nak xaja mbel ro toxni lenꞌ lazoꞌ goꞌ. 20Nde nogaꞌ ndablo nye goꞌ, nek thib xkiꞌs Dios jwanꞌ mdej re profet naꞌakta tata leꞌ yen mena, 21tak reta diꞌs ya nangoltey yek profet, cheꞌla Mbi Nayon chanꞌ Dios mdej lo xaꞌ reta jwanꞌ mni xaꞌ.
