Select a Verse
यहोआहाजेरू इस्राएल मुल्खे पुड़ राज़
1अहज्याहेरू मट्ठू यहूदा प्रदेशेरे राज़े योआशेरे हुकूमतरे तरेइयोवं साले मां येहूएरू मट्ठू यहोआहाज सामरिया नगरे मां इस्राएल मुल्खे पुड़ राज़ केरने लगू, ते तैनी 17 साल राज़ कियूं। 2तैनी यहोवारे नज़री मां बुराई की, ज़ेन्च़रे नबातेरे मट्ठे यारोबामे ज़ैनी इस्राएली लोकन करां पाप करेवरो थियो तेन्च़रे तै भी केरतो राव, ते तैना पाप न शारे। 3एल्हेरेलेइ यहोवारो क्रोध इस्राएली लोकां केरे खलाफ भड़को, ते तैनी तैना अरामेरे राज़े हजाएल, ते तैसेरे मट्ठां बेन्हददेरे गुलाम बनाए। 4तैखन यहोआहाजे मद्दतरे लेई यहोवा कां प्राथना की ते यहोवा तैसेरी प्राथना शुनी; किजोकि तैनी हेरू कि अरामेरो राज़ो इस्राएले पुड़ केन्च़रे ज़ुलम केरि राहोरो थियो। 5एल्हेरेलेइ यहोवा इस्राएले अक छुटानेबालो दित्तो ते तैना अरामेरे कब्ज़े मरां छुट्टी जे; ते इस्राएली पेइलेरे ज़ेरे अपने-अपने डेरे मां राने लगे। 6फिरी भी तैना एरे पापन करां न फिरे, ज़ेन्च़रे यारोबामेरे घराने किये, ते ज़ैन केरे मुताबिक तैनी इस्राएली लोकन करां पाप करावरे थिये: पन तैन मां च़लते राए, ते सामरिया नगरे मां अशेरा देबरी मूरती खड़ी राई। 7अरामेरे राज़े यहोआहाजेरी सेना मरां सिर्फ 50 सुवार, 10 रथ, ते 10000 सिपाही बच़ाए; किजोकि बाकी सब तैनी नाश किये, ते ढ्लेन्च़ी-ढ्लेन्च़ी मित्ती मां मिलावरे थिये। 8यहोआहाजेरां बाकी सारां कम्मां ज़ैना तैनी कियां, ते तैसेरी बहादरी, इन सब इस्राएलेरे राज़ां केरे इतिहासेरी किताबी मां लिखेरूए। 9यहोआहाज अपने दादे-पड़दादां केरो ज़ेरो मेरि जेव ते तै सामरिया नगरे मां दब्बो जेव; ते तैसेरू मट्ठू यहोआश तैसेरे ठैरी राज़ो बनू।
यहोआशेरी हुकूमत ते एलीशा नेबेरी मौत
10यहूदारे राज़े योआशेरे हुकूमतरे सतैतीहों साले मां यहोआहाजेरू मट्ठू यहोआश सामरिया नगरे मरां इस्राएल मुल्खे पुड़ राज़ केरने लगू, ते तैनी 16 साल राज़ कियूं। 11ते तैनी यहोवारे नज़री मां बुराई की, तैनी नबातेरे मट्ठे यारोबामे ज़ैनी इस्राएली लोकन करां पाप करेवरो थियो, तैसेरे पापेरे मुताबिक तै भी केरतो राव, ते तैन करां अलग न भोव। 12यहोआशेरां बाकी सब कम्मां ज़ैना तैनी कियां, ते ज़ैस बहदरी सेइं यहूदा प्रदेशेरे राज़े अमस्याह सेइं लड़ो, इन सब इस्राएलेरे राज़ां केरि इतिहासेरी किताबी मां लिखेरूए। 13ज़ैखन यहोआश मेरतां अपने दादे-पड़दादन मां मिली जेव ते यारोबाम तैसेरे तखते पुड़ बिश्शी जेव; ते सामरिया नगरे मां ज़ैड़ी इस्राएलेरे राज़े दब्बोरे थिये तै भी तैड़ी दब्बो। 14किछ वक्तेरां बाद एलीशा तै बिमारी लग्गी ज़ैस सेइं तै मरने बालो थियो, इन शुन्तां इस्राएलेरो राज़ो यहोआश तैस कां जेव, ते तैस पुड़ लेरां देइतां ज़ोने लगो, “ओ मेरे मालिक! ओ मेरे मालिक! तू त इस्राएलेरे रथ ते सुवारां केरो ज़ेरो आस!” एलीशा तैस हुक्म दित्तो “धनुष ते तीर आन।” 15तैनी तैस कां धनुष ते तीर आने। 16तैखन तैनी इस्राएलेरे राज़े सेइं ज़ोवं, “धनुषे पुड़ अपनो हथ ला।” ज़ैखन तैनी अपनो हथ लाव, तैखन एलीशा अपने हथ राज़ेरे हथ्थे पुड़ रख्खे। 17ते एलीशा ज़ोवं, “पूरबेरे पासेरी दारी खोल्ल।” ज़ैखन तैनी तै दारी खोल्ली, तैखन एलीशा ज़ोवं, “तीर च़ला;” तैनी तीर च़लाव। ते एलीशा ज़ोवं, “ई तीर यहोवारे तरफां अरामे करां छुटकारेरो निशाने, एल्हेरेलेइ तू अपेक नगरे मां अरामे इड़ी तगर मारेलो कि तैन केरो अन्त केरेलो।” 18फिरी तैनी ज़ोवं, “तीर ट्ला;” ते ज़ैखन तैनी तैना तीर ट्लाए, तैखन तैनी इस्राएलेरे राज़े सेइं ज़ोवं, “तल्ले बाह;” तैखन तै ट्लेइ बार बैइतां रुकी जेव। 19ते परमेशरेरे नेबे तैस जो सेरकोइतां ज़ोवं, “तीं त पंच़ शा फेरेईं मारोरो लोड़तो थियो। एरू केरने सेइं त तू अरामे इड़ी तगर मारेथो कि तैन केरो अन्त केरेथो, पन हुनी तू तैन्न ट्लेइ बारे मारेलो।”
20तैखन एलीशा मेरि जेव, ते तै दब्बो जेव। ते हर साल नेलाह मोआबेरी सेना, मुल्खे पुड़ हमलो केरतो थिये। 21एक्सां लोक कोन्ची मैन्हु दबने लगोरे थिये, कि अक सेना तैनेईं लाई, तैखन तैनेईं तै लाश एलीशा नेबेरी कब्री मां छ़डी, ते एलीशारे हेड्डन सेइं हुरते तै ज़ींतो भोव, ते अपने पव्वन पुड़ खड़ो भोव। 22यहोआहाजेरे ज़िन्दगी भर अरामेरो राज़ो हजाएल इस्राएले पुड़ ज़ुलम केरतो राव 23पन यहोवा तैन पुड़ अनुग्रह कियो, ते तैन पुड़ दया केरतां अपने तैस करारेरे वजाई सेइं ज़ै तैनी अब्राहम, इसहाक ते याकूबे सेइं कियोरो थियो, तैन पुड़ सिद्धी नज़र की, ते न तैना नाश किये, ते न अपने सामनेरां कढे।
24तैखन अरामेरो राज़ो हजाएल मेरि जेव, ते तैसेरू मट्ठू बेन्हदद तैसेरे जगाई पुड़ राज़ो बनू। 25तैखन यहोआहाजेरे मट्ठे यहोआशे हजाएलेरे मट्ठे बेन्हददेरे हथरां तैना नगर फिरी वापस आनां, ज़ैना तैनी जंग केरतां तैसेरे बाजी यहोआहाजेरे हथ्थे मरां थुसोड़तां नेवरां थियां। यहोआशे तैना ट्लेइ बार ज़ींतां इस्राएलेरे नगर फिरी वापस नेआं।
