Select a Verse
यहूदा प्रदेशे पुड़ अमस्याहेरू राज़
1इस्राएलेरे राज़े यहोआहाजेरू मट्ठू यहोआशेरे हुकूमतरे दूइयोवं साले मां यहूदारे राज़े योआशेरू मट्ठू अमस्याह राज़ो बनू। 2ज़ैखन तै राज़ केरने लगो तैखन तैसेरी उमर 25 साल थी, ते तैनी यरूशलेम नगरे मां 29 साल राज़ कियूं। तैसेरी अम्मरू नवं यहोअद्दान थियूं, तै यरूशलेम नगरेरी रानेबाली थी। 3तैनी तैन कम कियूं ज़ैन यहोवारी नज़री मां ठीक थियूं फिरी भी अपने पूर्वज दाऊदेरू ज़ेरू न कियूं; तैनी अपने बाजी योआशेरां ज़ेरां कम्मां कियां। 4तैसेरे दिहाड़न मां उच्ची ठारां न बिछ़ोड़ी जेई; लोक तैस वक्ते भी तैन पुड़ बलि च़ाढ़ते, ते गुग्गल बालते राए। 5ज़ैखन राज़ तैसेरे हथ्थे मां मज़बूत भोइ जेवं, तैखन तैनी अपने तैन अधिकैरन मौतरी सज़ाह दित्ती, ज़ैनेईं तैसेरो बाजी राज़ो मारोरो थियो। 6पन तैन खूनी केरे बच्चे तैनी न मारे, किजोकि यहोवारो ई हुक्म मूसेरे कानूनेरी किताबी मां लिखोरोए: “मट्ठेरे वजाई सेइं बाजी न मारो गाए, ते बाजी केरे वजाई सेइं न मट्ठू मारू गाए; ज़ैनी पाप कियोरो भोए, तैस्से पापेरी सज़ाह दित्ती गाए।” 7तैन्नी अमस्याह लूनेरे वैदी मां 10000 एदोमी सिपाही मारे, ते सेला नगरे सेइं लड़ाई केरतां तैस पुड़ भी कब्ज़ो कियो, ते तैसेरू नवं योक्तेल रख्खू, ते अज़ तगर भी तैन्ने नवं च़लते।
8तैखन अमस्याह इस्राएलेरो राज़ो यहोआशे कां ज़ैन येहूएरू पोट्लड़ू ते यहोआहाजेरू मट्ठू थियूं मैन्हु केरे ज़िरिये समाद भेज़ो, “एई असां एक्की होरि सेइं मुकाबलो केरम।” 9पन इस्राएलेरे राज़े यहोआशे यहूदा प्रदेशेरे राज़े अमस्याह कां ई समाद भेज़ो, “लबानोनेरे एक्की झ़ल्लोवें लबानोनेरे एक्की गैइड़ेरे बुट्टे कां ई समाद भेज़ोरोए, ‘अपनि कुइयरो ड्लाह मेरे मट्ठे सेइं बना,’ एत्रे मां लबानोने मां अक जंगली जानबर च़ेलि जेव ते तैन झ़ल्लोवं ढ्लेन्च़ी छ़डू। 10तीं एदोमी त ज़ींतोरेन एल्हेरेलेइ तू घमण्डी भोइ जेवरोस। तैस्से पुड़ घमण्ड केरतां घरे रा; तू अपने नुक्सानेरे लेई इड़ी किजो हथ खड़ो केरतस, ज़ैस सेइं तू कुन बल्के यहूदा भी घटिया लेइहोए?”
11पन अमस्याहे न मन्नू। तैखन इस्राएलेरे राज़े यहोआशे हमलो कियो, ते तैने ते यहूदा प्रदेशेरे राज़े अमस्याह यहूदा प्रदेश ते बेतशेमेश नगरे मां एक्की होरि सेइं मुकाबलो कियो। 12ते इस्राएलेरी सेना यहूदारी सेनाई करां ज़ींती, ते हर कोई अपने-अपने डेरे जो नश्शो। 13तैखन इस्राएलेरे राज़े यहोआशे यहूदारे राज़े अमस्याह ज़ेसेरे दादेरू नवं अहज्याह ते बाजी केरू नवं योआश थियूं, बेतशेमेश नगरे मां ट्लाव, ते यरूशलेम नगरे जो जेव, ते एप्रैमी फाटके करां कूने बाले फाटके तगर, 400 हथ लम्मी यरूशलेम नगरेरी दिवार बिछ़ोड़ी। 14ते ज़ेत्रू सोन्नू, चाँदी ते ज़ेत्रां भांडां यहोवारे भवने मां ते राज़ेरे मेहलेरे खज़ानन् मां मैल्हां, तैना सब ते कब्ज़ो कियोरे लोक भी नेइतां तै सामरिया नगरे जो वापस जेव।
15यहोआशेरां बाकी कम्मां ज़ैना तैनी कियां, ते तैसेरी बहादरी ते तैनी कोस तरीके सेइं यहूदा प्रदेशेरे राज़े अमस्याह सेइं जंग की, इन सब किछ इस्राएलेरे राज़ां केरि किताबी मां लिखेरूए। 16आखरी मां यहोआश अपने दादां पड़दादां केरो ज़ेरो मेरि जेव ते तै इस्राएलेरे राज़ां केरे मझ़ाटे सामरिया नगरे मां दब्बो जेव; ते तैसेरू मट्ठू यारोबाम तैसेरे जगाई पुड़ राज़ो बनू। 17यहोआहाजेरे मट्ठे इस्राएलेरे राज़े यहोआशेरे मरनेरां पत्ती योआशेरू मट्ठू यहूदा प्रदेश राज़ो अमस्याह 15 साल ज़ींतो राव। 18अमस्याहेरां बाकी कम्मां यहूदा प्रदेशेरे राज़ां केरे इतिहासेरे किताबी मां लिखोरन। 19ज़ैखन यरूशलेम नगरे मां तैसेरे खलाफ बगावत कीजेई, तैखन तै लाकीश नगरे जो नेश्शी जेव। एल्हेरेलेइ तैनेईं लाकीश नगरे तगर तैसेरो पीछो केरतां तै तैड़ी मारो। 20तैखन तैसेरी लाश घोड़े पुड़ च़ैढ़तां यरूशलेम नगरे मां पुज़ाई, ते दाऊदपुरे मां ज़ैड़ी तैसेरे दादे-पड़दादे दब्बोरे थिये तैड़ी तै भी दब्बो जेव। 21तैखन सारे यहूदी लोकेईं अजर्याह नेइतां, ज़ेसेरी उमर 16 साल थी, तैसेरे बाजी अमस्याहेरे जगाई पुड़ राज़ो बनाव। 22अमस्याह राज़ो अपने दादे-पड़दादां केरो ज़ेरो मेरि जेव, तैखन तैसेरां बाद अजर्याह एलत नगर मज़बूत केरतां यहूदा प्रदेशेरे कब्ज़े मां कियूं।
दूइयोवं यारोबामेरू राज़
23यहूदा प्रदेशेरे राज़े योआशेरे मट्ठे अमस्याहेरे हुकूमतरे परहनोवं साले मां इस्राएलेरे राज़े यहोआशेरू मट्ठू यारोबाम सामरिया नगरे मां राज़ केरने लगू, ते तैनी 41 साल राज़ कियूं। 24तैनी यहोवारे नज़री मां बुरू कियूं; तैनी नबातेरे मट्ठे यारोबाम ज़ैनी इस्राएले करां पाप कराव, तैसेरे पापां केरे मुताबिक तै केरतो राव, ते तैन केरने करां तै बाज़ न अव। 25तैनी इस्राएलेरी हद हमातेरी वैदी करां लेइतां अराबारे समुन्दरे तगर ज़ेरि पेइली थी तेरही की, ज़ेन्च़रे कि इस्राएलेरे परमेशरे यहोवा अमित्तैरे मट्ठे अपने दास गथेपेर नगरेरे रानेबाले योना नेबेरे ज़िरिये ज़ोवरू थियूं। 26किजोकि यहोवा इस्राएलेरो दुख हेरो कि बड़ो मुश्किले, बल्के कुन गुलाम कुन आज़ाद कोई भी बच़ोरो न राव, ते न इस्राएलेरे लेई कोई मद्दतगार थियो। 27यहोवाए न थियूं ज़ोवरू, कि अवं इस्राएली केरू नवं धेरती पुड़ां मिटेई देइलो। ते तैने यहोआशेरे मट्ठे यारोबामेरे ज़िरिये तैन केरो छुटकारो कियो।
28यारोबामेरां बाकी सब कम्मां ज़ैना तैनी कियां, ते केरही बहादरी सेइं तैनी जंग की, ते दमिश्क ते हमात नगरां ज़ैना पेइलां यहूदा प्रदेशेरे हुकूमती मां थियां इस्राएलेरे अधिकारे मां फिरी आनां, इन सब इस्राएलेरे राज़ां केरि इतिहासेरी किताबी मां लिखेरूए। 29आखरी मां यारोबाम अपने दादे-पड़दादां केरो ज़ेरो मेरि जेव ते ज़ैड़ी इस्राएलेरे राज़े दब्बोरे थिये तैड़ी तै दब्बो जेव, ते तैसेरू मट्ठू जकर्याह तैसेरे जगाई पुड़ राज़ो बनू।
