Select a Verse
ዳዊቲ ሳኦላ ዎና አግስ
1ሳኦል ፍልስፄመታ ኦልድ ስምዳፐ ጉየ፥ ዳዊቲ ኤንጋዳ ባዙዋን ደኤስ ገይሳ ስእስ። 2ሳኦል እስራኤለ ግዶፈ ዶረትዳ ሄ ሙኩሉ አሳ ኤክድ፥ ዳዊታነ እያ አሳ ኮያናዉ፥ “ባዞ ዴሻታ ዛላ” ጌተትያ በሳ ማታ ብስ።
3ሳኦል ኦግያ ዶናን ዶርሳ ግርብያ ማታን ደእያ ጎንጎሉዋ ግዶ ገልድ ሼአናዉ ኡትስ። ዳዊቲነ እያ አሳይ ጎንጎሉዋስ ጉየ ባጋራ ሺቅድ ኡትዶሶና። 4ዳዊታ አሳይ፥ “ ‘ሄኮ፥ ታኒ ነ ሞርክያ ነ ኩሸን አ እማና፤ ኔኒ እያ ቦላ ኮይዳባ ኦና’ ያግድ ጎዳይ ነዉ ኦድዳ ጋላሳይ ሀች” ያግዶሶና። ዳዊቲ ሳኦላ ኤርሶና ሺቅድ ሳኦላ ማኡዋ ማጫራፐ ቃንፅ ኤክስ።
5ዳዊቲ ሳኦላ ማኡዋ ማጫራ ቃንፅዳ ግሾ እያ ዎዛናይ ቂሮትስ። 6ዳዊቲ ባ አሳኮ፥ “ጎዳይ ትይዳ ካዋ፥ ታ ጎዳ ቦላ ታኒ ሄሳ ኦናይስ ዎይኮ እያ ቦላ ታ ኩሽያ ደንናይስ ታፐ ሃኮ፤ ጎዳይ ትይድ እያ ካዎስ” ያግስ። 7ዳዊቲ ሀይሳዳ ግድ፥ ሳኦላ ባ አሳን ቦሽሶና ድግስ። ሳኦል ጎንጎሉዋ ግዶፈ ከይድ ባ ኦግያ ብስ።
8ሳኦል ብዳፐ ጉየ፥ ዳዊቲ ጎንጎሉዋ ግዶፈ ከይድ፥ “ታ ጎዳዉ፥ ካዋዉ” ያግድ ሳኦላ ፄግን፥ ሳኦል ጉየ ስሚድ ፄልስ። ዳዊቲ ሳአን ጉፋንድ ሳኦላስ ዝግስ። 9ዳዊቲ ሳኦላኮ፥ “ዳዊቲ ነና ቆሀናዉ ኮዬስ” ግያ አሳ ኔኒ አይስ ስአይ? 10ሀች ሀ ጎንጎሉዋን ጎዳይ ነና ታዉ አድ እምዳይሳ ኔኒ ነ አይፈን በአዳሳ። ታኒ ነና ዎና መላ ጉ አሳት ታና ደንዶሶና። ሽን፥ “እ፥ ጎዳይ ትይድ ካዎዳይሳ ግድያ ግሾ ታኒ ታ ጎዳ ቦላ ታ ኩሽያ ደንከ” ያጋዳ ነና አጋስ። 11ታ አዋዉ፥ ታ ኩሸን ደእያ ነ ማኡዋ ማጫራ ሀይሳ ፄላ። ነ ማኡዋ ማጫራፐ ቃንፃ ኤካስ፥ ሽን ነና ዎብከ። ታኒ ነና ቆሆናይሳነ ነ ቦላ ማካሎናይሳ አኬካ፤ ታኒ ነና ቆሀብከ፥ ሽን ኔኒ ታና ዎናዉ ሻንካታሳ። 12ነባነ ታባ ጎዳይ ፕርዶ፤ ጎዳይ ኔኒ ታና ቆህዳይሳ ሃሉዋ ከሶ፥ ሽን ታኒ ነ ቦላ ታ ኩሽያ ደንከ። 13“ኢታ ኦይሳታፐ ኢት ከዬስ” ግያ በን ሌምሶይ ደኤስ። ሄሳ ግሾ፥ ታኒ ነና ኩሸንካ ቦችከ።
14“እስራኤለ ካዎይ ኦደ ቦላ ደንዲ? ኦና ኦይካናዉ ካሊ? ሀይቅዳ ካና ዎይኮ ካስቶለ ጎድዬ? 15ጎዳይ ኑ ቦላ ዳናቶ፤ ነባነ ታባ እ ፕርዶ፤ ታ ግሾ እ ሞተቶ፤ ነ ኩሸፐ ታና እ አሾ” ያግስ።
16ዳዊቲ ሃሳያ ዉርስዳ ዎደ ሳኦል ዳዊታኮ፥ “ታ ናአ ዳዊታ፥ ሄስ ነ ቃሌ?” ያግድ ሳኦል ባ ቃላ ቁ ኦድ ዬክስ።
17“ኔኒ ታፐ አዳ ፅሎ፤ ታኒ ነዉ ኢታባ ኦን፥ ኔኒ ታዉ ሎኦባ ኦዳሳ። 18ጎዳይ ታና ሀች ነዉ አድ እምን ኔኒ ታና ዎቦና ግሾ ኔኒ ታዉ ሎኦባ ኦዳ በሳዳሳ። 19አስ ባ ሞርከ ደምድ ቆሆና የድዬ? ኔኒ ታዉ ሀች ኦዳ ኬሀተ ግሾ፥ ጎዳይ ነና አንጆ። 20ኔኒ እስራኤሌ ካዎ ግዳናይሳነ እስራኤለ ካዎተይ ነ ማታ ጋርሳን ኤቃናይሳ ታ ኤራይስ። 21ህዛ ታ ኮቻ ይሶና መላነ ታ ሱን ታ አዋ ሶ አሳ ግዶፈ ቁቾና መላ ጎዳ ሱንን ታዉ ጫቃ” ያግስ።
22ዳዊቲ ሳኦላስ ጫቅስ። ሄሳፈ ጉየ፥ ሳኦል ባ ሶ ስሚድ ብስ፤ ዳዊቲነ እያ አሳይ ባንታ ሚፃ ብዶሶና።
