Select a Verse
አምኤ ዛይተ
1ናበታፐ እሱዋ ማችያ ኤልሳኮ ባዳ፥ “ነ አይለይ፥ ታ አዝናይ ሀይቅስ። እ ጎዳ ያይያ አስ ግደይሳ ኔኒ ኤራሳ። ሽን ሀእ እያ አጮ አዋይ ታ ናይታ ናምአ ባዉ አይለ ኦናዉ ኮዬስ” ያጋዳ እያዉ ኦዳሱ።
2ኤልስ፥ “ያትን ታኒ ነዉ አይ ኦ? ነ ሶን አይበ ደኤይ? አነ ታዉ ኦዳ” ያግስ።
ማጫስያ፥ “ታዉ፥ ነ አይሌስ ጉ ፃሮን ደእያ ዛይተፐ አትሽን፥ ሀራባይ አይብካ ባዋ” ያጋሱ።
3ኤልስ፥ “ባዳ ነ ሾሮታ ኡባፈ ካይሳ ኦቶታ ጋርፃ። ጋርፃሸ ጉ ጋርፆፋ። 4ሄሳፈ ጉየ፥ ሶ ገላዳ፥ ነ ቦላነ ነ ናይታ ቦላ ካርያ ጎርዳ። ኦቶ ኡባን ዛይተ ትጋ፤ ዛይተይ ኩምዳ ኦቶታ እስ ባጋ አ” ያግስ።
5ማጫስያ ባዳ፥ ካርያ ባ ቦላነ ባ ናይታ ቦላ ጎርዳሱ። ኤንቲ እዉ ኦቶታ ሺሽን፥ እያ ዛይትያ ትገ ኦይካሱ። 6ኦቶ ኡባይ ኩምዳ ዎደ፥ ማጫስያ ባ ናኣኮ፥ “አነ ታዉ ሀራ ኦቶ ኤካዳ ያ” ያጋሱ።
ሽን ናአይ ዛሪድ፥ “ሀር እስ ኦቶይካ ዴና” ያግስ። ሄሳፈ ጉየ፥ ዛይተይ ጎገይሳ አጋግስ።
7ማጫስያ ስማ ባዳ ኤልሳስ ኦዳሱ። እ፥ “ባዳ ዛይትያ ባይዛዳ፥ ነ አጩዋ ቃንፃ። አትዳይሳ ኔንነ ነ ናይት ጎኤትድ ዳናዉ ዳንዳኤታ” ያግስ።
8እስ ጋላስ ኤልስ እስ ዱረ ማጫስያ ደእያ ሱኔማ ካታማ ብን፥ ማጫስያ ሾባዳ፥ እያ ካ ሙዛሱ። ሄ ጋላሳፐ ዶምን፥ እ ያራ አያ ዎደ ኡባን ካ ማናዉ እ ሶ ገሌስ። 9እያ ባ አዝናኮ፥ “ሄኮ፥ ኡባ ዎደ ኑ ማታራ አያ አደይ ፆሳ አስ ግደይሳ ታኒ ኤራይስ። 10አነ እስ ጉ ክፍለ ፖቅያ ቦላ እያዉ ኬፆስ፤ እያ ግዶን አርስ፥ ኦይደ፥ ፃርጴዛነ ፆምፐ ዎስ። እ ኑኮ ይዳ ዎደ ኡባን ያ ገላናዉ ዳንዳኤስ” ያጋሱ።
11እስ ጋላስ ኤልስ ሱናማ ካታማ ይድ፥ ባ ክፍልያ ፑደ ከይድ ያን ሸምፕስ። 12ባ አይልያ ግያዛኮ፥ “ባዳ ማጫስዉ ፄጋ” ያግን፥ ግያዝ ፄግን፥ እያ ያዳ ኤልሳ ስንን ኤቃሱ። 13ኤልስ ግያዛኮ፥ “ሀ ማጫስያ ሀ ኡባ ኑስ ኦሱ። ኑኒ ነዉ አይ ኦኖ? ኑኒ ብድ፥ ካዋ ዎይኮ ቶራ ሞጮና ኦድሳናባይ አይብ ደእያኮ እዮ ኦይቻ” ያግስ።
ማጫስያ፥ “ታኒ ሀይሳን ታ አሳ ግዶን ደአይስ” ያጋሱ።
14ኤልስ ግያዛ፥ “ያትን፥ ታኒ እዉ አይ ኦ?” ያግድ ኦይችስ።
ግያዝ፥ “እዉ ናእ ባዋ፤ እ አዝናይ ጭምስ” ያግስ።
15ኤልስ፥ “ማጫስዉ ፄጋ” ያግስ። ግያዝ እዮ ፄግስ፤ እያ ያዳ፥ ፐንገን ኤቃሱ። 16ኤልስ፥ “ዎንቶ ላይ ሀኖደ ኔኒ አደ ናአ እድማና” ያግስ።
ማጫስያ፥ “አካይ፥ ታ ጎዳዉ፥ ኔኒ ፆሳ አስ ግድክ፥ ታዉ ዎርዶቶፓ” ያጋሱ።
17ሽን ማጫስያ ቃንታሱ፤ ኤልስ እዉ ኦድዳይሳዳ፥ ካልያ ላይ አደ ናአ የላሱ።
18ናአይ ድጭስ፤ እስ ጋላስ ካ ጫክያ አሳታራ ደእያ ባ አዋኮ ብስ። 19ባ አዋኮ፥ “ዎ ታና ሁጰይ ዎስ! ዎ ታና ሁጰይ ዎስ!” ያግስ።
እያ አዋይ እስ አይልያ፥ “ቶካዳ አየኮ ኤፋ” ያግድ ኪትስ።
20አይለይ ናኣ ኤክድ፥ አየኮ ኤፍስ። ሴታ ጋላስ ግዳና ጋካናዉ፥ ናአይ ባ አየ ክኦን ኡትስ፤ ሄሳፈ ጉየ፥ ናአይ ሀይቅ አግስ። 21ማጫስያ ናኣ ፑደ ኤፋዳ፥ ፆሳ አድያ አርሳን ዝንእሳሱ። ያታዳ እያ ቦላ ካረ ጎርዳዳ ባሱ።
22ባ አዝና ፄጋዳ፥ “ታኒ ፆሳ አድያኮ ኤለ ባዳ ያና መላ፥ አይለታፐ እሱዋነ ሀረታፐ እሱዋ ታዉ የዳ” ያጋሱ።
23እ፥ “ሀች አጌና ፄሮ ጋላስ ዎይኮ ሳምባታ ግደና፤ ነና እያኮ ኤፈይ አይቤ?” ያግስ።
እያ ዛራዳ፥ “አይብካ ባዋ” ያጋሱ። 24እያ ሀረ ጫናዳ፥ ባ አይልያ፥ “ሀርያ ላጋ! ታኒ ነዉ ኦዳና ጋካናዉ፥ ለፕ ኦዳ ላጎፋ” ያጋሱ። 25ማጫስያ ያፐ ደንዳዳ፥ ቃርመሎሳ ዙማን ደእያ ፆሳ አድያኮ ባሱ።
ኤልስ ማጫስው ሃሆን በእድ፥ ባ አይልያ ግያዛ፥ “በአ፥ ሱናማን ደእያ ማጫስያ ያዉሱ። 26እዮ ሞካናዉ ዎፃ ባዳ፥ ‘ኔኒ ሳሮ? ነ አዝናይ ሳሮ? ነ ናአይ ሳሮ?’ ያጋዳ ኦይቻ” ያግስ።
ማጫስያ፥ “ኑኒ ኡባይካ ሳሮ” ያጋሱ።
27ማጫስያ ዙማ ቦላ ደእያ ፆሳ አድያኮ ጋክዳ ዎደ፥ ሆካዳ እያ ቶሁዋ ኦይካሱ።
ግያዝ ማጫስዉ ድጋናዉ ሺቅስ፤ ሽን ፆሳ አደይ፥ “አጋ! እያ ግታ መቶን ደአዉሱ፤ ሽን ጎዳይ ታፐ ሄሳ ገንስ። እ መቱዋ ታዉ ኦድቤና” ያግስ።
28ማጫስያ፥ “ታ ጎዳዉ፥ ኔኒ ታዉ ናአ እማና መላ ታኒ ነና ኦይቻድና? ታኒ ነና፥ ‘ታና ጮ ጭሞፋ ያጋብክና?’ ” ያጋሱ።
29ኤልስ ግያዛኮ፥ “ነ አዱሳ ማኡዋ ነ ሳቅያን ስርቃ፤ ታ ፃምአ ኤካዳ ኤለሳ። ኦገን ኦደራካ ጋሄትኮ፥ ሳሮፋ፤ ኦንካ ነና ሳሮትኮ፥ ዛራዳ ሳሮ ጎፓ። ታ ፃምአ ናኣ ሶምኡዋ ቦላ ዎ” ያግስ።
30ሽን ናኣ አይያ፥ “ደኦ ጎዳይ ኤርያ መላ፥ ነ ሸምፖይ ኤሮ! ታኒ ነና የጋዳ ቢከ” ያጋሱ። ኤልስ ደንድድ፥ እዮ ካልስ። 31ግያዝ ኤንታፈ ስንትድ ብድ፥ ፃምአ ናኣ ሶምኡዋ ቦላ ዎስ። ሽን ግርስ ዎይኮ ሸምፖይ ባዋ። ያትን ግያዝ ኤልሳራ ጋሄታናዉ ስም ይድ፥ “ናአይ ባርክቤና” ያግድ ኦድስ።
32ኤልስ ሶ ገልድ፥ ሄኮ፥ ናኣ አሀይ እያ አርሳን ዝንእዳይሳ በእስ። 33ባ ቦላነ ናኣ ቦላነ ካርያ ጎርድድ፥ ጎዳ ዎስስ። 34ናኣ አሀ ቦላ ከይድ፥ ባ ዶና እያ ዶናን፥ ባ አይፍያ እያ አይፍያን፥ ባ ኩሸታ እያ ኩሸታራ ጋድ ዝንእስ፤ ናኣ አሳተይ ሆእስ። 35ኤልስ ደንድድ፥ ሶ ግዶን ያ ሃ ስመረትስ። ናምአን ስሚድ፥ ናኣ ቦላ ዝንእስ፤ ናአይ ላፑን ቶሆ ሀሽዳፐ ጉየ ፄልስ።
36ኤልስ ግያዛ ፄግድ፥ “ሱናማ ማጫስዉ ፄጋ” ያግስ። ግያዝ እዮ ፄግን፥ እያ ይዳ ዎደ፥ ኤልስ፥ “ነ ናኣ ኤካ” ያግስ። 37ማጫስያ ኤልሳ ቶሁዋ ቦላ ኩንዳዳ፥ ሳአን ጉፋናሱ፤ ባ ናኣ ኤካዳ ካረ ከያሱ።
38ኤልስ ጋልጋላ ስሚድ ይዳ ዎደ፥ ቢታን ኮሽ ደኤስ። ናበታ ጩጋይ እያ ስንን ኡትድ ደእሽን፥ እ ባ አይልያ፥ “ዎጋ ኦቶ ታማ ቦላ ዎዳ፥ ናበታስ ዎፀ ካ” ያግስ። 39ኤንታፈ እሶይ ቦንጮ ማፅድ ኤሀናዉ ዎራ ብድ፥ ኤጨረ ሌሄ ዳንያባ ደምስ። ቶካናዉ ዳንዳኤይሳ ኬና ዳሮ ኤጨረ ሌሄ ኤክድ ይስ፤ እ አይበኮ ኤሮና አንጭድ፥ ኦቱዋን የግስ። 40አሳይ ማና መላ ዎፅያ ከስዶሶና፤ ኤንቲ ዎፅያ ቱሽ ባሪ በእድ፥ “ናብያዉ፥ ሀ ኦቱዋን ዎያባይ ደኤስ” ያግድ ዋስዶሶና። አሳይ ማናዉ ዳንዳእቦኮና።
41ኤልስ፥ “አነ ታዉ ለ ኤክድ ዪተ” ያግስ። ሄ ልያ ኦቱዋን ቆልድ፥ “አሳይ ማናዳ ዎፅያ ትግተ” ያግስ። ሄሳፈ ጉየ፥ ኦቱዋን ኢታባይ በንትቤና።
42ኮይሮ ጋክዳ ካፈ ኡከትዳ ላታሙ ባንጋ ዳቡዋ፥ ትያ ካራ እስፈ ባ ኦጎሩዋን የግድ፥ ፆሳ አድያስ ኤህያ እስ አደይ ባኣል-ሻልሻፔ ይስ። ኤልስ ባ አይልያ፥ “ማና መላ አሳስ አ” ያግስ።
43እያ አይለይ፥ “ታኒ ፄቱ አሳ ስን ሀይሳ ዋታዳ አ?” ያግድ ኦይችስ።
ሽን ኤልስ፥ “ማና መላ አሳስ አ፤ ጎዳይ ‘ኤንቲ ምድ ካልን፥ ቲፈይ አታና’ ” ያግስ። 44ሄሳ ግሾ፥ አይለይ ኤንታ ስን አን፥ ኤንቲ ምዶሶና፤ ጎዳይ ግዳይሳዳ ቲፈይ አትስ።
