Select a Verse
አምኖናነ ትማሮ
1እስ ዎደ ሀይሳዳ ሀንስ። ዳዊታ ናኣ አበሰሎመስ ትማሮ ጌተትያ እስ ማላ ሎኦ ምቻ ደአዉሱ። ዳዊታ ናአይ አምኖን ትማሮ ዶስስ። 2አምኖን ባ ምችዉ ትማሮ ዶስዳ ግሾ እዮ ቆፕሸ ዳሮ ግልቅስ። እያ ጌላኦ ግድዳ ግሾ እዮ አይኮካ ኦናዉ ዳንዳኤቶናባ እያዉ ዳንስ።
3ሽን አምኖናስ ዳዊታ እሻ ሳማ ናኣ እዮናዳባ ጌተትያ ላገይ ደኤስ፤ እዮናዳብ ዳሮ ኤጫ አስ። 4እዮናዳብ፥ “ኔኒ ካዎ ናአ ግዳሸ ዎንታ ዎንታ አይስ ግልቃይ? ኔኒ ታዉ አይስ ኦድኪ?” ያግድ አምኖና ኦይችስ።
አምኖን፥ “ታ እሻ አበሰሎመ ምችዉ ትማሮ ታኒ ዶሳስ” ያግስ።
5እዮናዳብ፥ “ሀርገትያ አሳዳ ሀናዳ ሂፃን ዝንአ። ነ አዋይ ነና በአናዉ ያ ዎደ፥ ‘ታ ምችያ ትማራ ያዳ ታዉ ምያባ እሞ፤ ታኒ እዮ በእሽን ታ ስንን ካዳ ታና ባርሶ’ ያጋዳ ኦይቻ” ያግስ።
6አምኖን ሀርገትዳ አሳዳ ሀንድ ሂፃን ዝንእስ። ካዎይ እያ በአናዉ ያ ዎደ አምኖን፥ “ታ ምችያ ትማራ ያዳ፥ ታ በእሽን ታ ስንን ኡይ ኡካዳ ታና ባ ኩሸራ ባርሶ” ያግስ።
7ዳዊቲ፥ ካዎ ጋን ደእያ ትማርኮ ኪትድ፥ “ነ እሻ አምኖና ሶ ባዳ እያዉ ካ ካ” ያግስ። 8ትማራ ባ እሻ አምኖና ሶ ባሱ፤ ሄ ዎደ እ ሂፃን ዝንእስ። ትማራ ጉ ለ ሙኑቃዳ አምኖን በእሽን ኡይ ኡካሱ። 9ትማራ ኡይ ባሸፐ ከሳዳ እያዉ አሱ፤ ሽን እ ሞና እፅስ።
አምኖን፥ “አሳ ኡባ ካረ ከስተ” ያግን፥ አሳ ኡባይ እያ ማታፐ ከይስ። 10ሄሳፈ ጉየ አምኖን፥ “ታኒ ነ ኩሸፐ ማና መላ ካ ሃ ቆልአ ኤካዳ ያ” ያግስ። ትማራ ባ ኡክዳ ኡይ ኤካዳ፥ ባ እሻ አምኖና ስን ሺሻሱ። 11ትማራ ካ እያኮ ሺሽያ ዎደ እዮ ኦይክድ፥ “ታ ምቸ፥ ሃያ! ታራ ዝንአ” ያግስ።
12እያ፥ “ታ እሻዉ፥ አካይ ሀነና! ታና ዎልቃንፋ! ሀይሳ መላባይ እስራኤለን ሀን ኤረና፤ ሀይሳ መላ ቦርሶባ ኦፋ። 13ታ ፖኩዋ ታኒ ዋታዳ ገንናዉ ዳንዳእያና? ቃስ ነካ እስራኤለ ግዶን ካዉሻ አስ ግዳና። ሀያና ካዋ ኦይቻ፤ ታኒ ነና ገላናይሳ እ ድገና” ያጋሱ። 14ሽን እ እዮ ስኦና እፅስ። እ ዎልቃማ ግድያ ግሾ፥ እዮ ዎልቃን ኦይክድ ኢስስ።
15ሄሳፈ ጉየ፥ አምኖን እዮ ዳሮ እፅስ፤ ካሰ እዮ ዶስዳይሳፈ አድ እፅስ። አምኖን፥ ደንዳ፥ “ከያ! ከያዳ ባ!” ያግስ።
16እያ፥ “ኔኒ ታና ከያዳ ባ ገይስ ካሰ ነ ታ ቦላ ኦዳ ኢታፐ አስ” ያጋሱ።
ሽን እ እዮ ስኦና እፅስ። 17አምኖን ባ አይልያ ፄግድ፥ “ሀ ማጫስዉ ታ ስንፈ ከሳ፤ እዮ ካረ ከሳዳ ዉላ ጎርዳ” ያግስ። 18አይለይ እዮ ካረ ከስድ ዉላ ጎርድስ።
ጌላኦ ግድዳ ካዎ ማጫ ናይት ማእያ አሌቆ ማኦ ማአሱ። 19ትማራ ብዶ ባ ሁጰን ቆላዳ፥ ባ ማእዳ አሌቆ ማኡዋ ዳካዳ፤ ባ ሁጵያ ኦይካዳ፥ ዋሶ ጎቻሸ ባሱ።
20እ እሻ አበሰሎመይ እዮ በእዳ ዎደ፥ “ነ እሻይ አምኖን ነና ኢስዴ? ታ ምቸ፥ ኔኒ ሀእ ስእ ጋ። እ ነ እሻ፤ ሀ ኦዳ ነ ኡሎን ኦይኮፋ” ያግስ። ያትን፥ ትማራ አዛናሸ፥ አሳን ከዮና ባ እሻ አበሰሎመ ሶን ደአሱ።
21ካዎይ ዳዊቲ ሀ ኦዳ ስእዳ ዎደ ዳሮ ይሎትስ። 22አበሰሎመይ አምኖናኮ ጫማ ማልአ ፖግቤና። ባ ምችዉ ትማሮ ኢስዳ ግሾ አምኖና ሞርክስ።
አበሰሎመይ አምኖና ዎስ
23ናምኡ ላይፈ ጉየ፥ ኤፍሬማ ዛዋ ማታን ሀፆራ ጌተትያ በሳነ አበሰሎመይ ዶርሳ እክሰ ሜዴስ። ካዋ አደ ናይት ኡባይ ሄ በሳ ያና መላ አበሰሎመ ኤንታ ፄግስ። 24አበሰሎመይ ካዋኮ ብድ፥ “ታኒ ነ አይለይ ታ ዶርሳታ እክስያ ሜድሳይስ፤ ነነ ነ ሞርናት ኑራ የርከቲ?” ያግስ።
25ካዎይ፥ “አካይ፥ ታ ናአዉ! ኑ ኡባይ ቢኮ፥ ነዉ ቶሆ ግዳና” ያግስ። አበሰሎመይ ካዋ ዳሮ ሾቢንካ ካዎይ ቦና እፅስ፤ ሽን አበሰሎመ አንጅስ።
26አበሰሎመይ፥ “ኔኒ ቦና እፅኮ፥ ታ እሻ አምኖን ኑራ ቦ” ያግስ።
ካዎይ፥ “እ ኔራ አይስ ቢ?” ያግስ። 27ሽን አበሰሎመይ ሾቢድ አጎና እፅን፥ ዳዊቲ አምኖናነ ባ አደ ናይታ እያራ የድስ።
28አበሰሎመይ ባ አይለታኮ፥ “አምኖን ዎይነ ኡይድ ማትያ ዎደ ታኒ ህንተና፥ ‘አምኖና ሾጭተ’ ያጋዳ ኪትያ ዎደ እያ ዎተ። ያዮፍተ! ህንተና ኪተይ ታና። ምንተ! ፃልተ!” ያግድ ኪትስ። 29አበሰሎመ አይለት እ ኪትዳይሳዳ አምኖና ዎዶሶና። ሄሳፈ ጉየ፥ ካዋ አደ ናይት ኡባይ ደንድድ፥ ባንታ ባቁሉዋ ባቁሉዋ ቶግድ ባቃትዶሶና።
30ኤንቲ ቡሮ ኦገ ቦላ ደእሽን፥ “አበሰሎመየ ካዋ ናይታ ኡባ ዉርስስ፤ ኤንታፈ እሶይካ አትቤና” ጌተትያ ዎረይ ዳዊታ ጋክስ። 31ካዎይ ደንድ ኤቅድ፥ አዛንድ፥ ባ ማኡዋ ዳክድ ቢታን ዝንእስ። እያ አይለት ኡባይ ባንታ ማኡዋ ዳክድ፥ እያ ማታን ኤቅዶሶና።
32ዳዊታ እሻ ሳማ ናአይ እዮናዳብ፥ “ታ ጎዳዉ፥ ካዎ ናይት ኡባይ ሀይቅዶሶና ጋዳ ቆፖፋ፤ አምኖና ፃላል ሀይቅስ። አምኖን ባ ምችዉ ትማሮ ኢስዳ ጋላሳፐ ዶምን፥ አበሰሎመይ እያ ቦላ ኦናዉ ቆፕዳባይ ሀንስ። 33ህዛ ሀይቅዳይ አምኖና ፃላላ ግድያ ግሾ፥ ‘ካዋ አደ ናይት ኡባይ ሀይቅዶሶና’ ግያ ዎርያ ካዎይ ቱማ ጎፖ” ያግስ።
34ሄ ዎደ አበሰሎመይ ባቃትስ።
ናግያ አደይ ቁ ግድ ፄልያ ዎደ ዉሎሀ ባጋራ ደእያ ኦግያራ ደረ ላንቅያ ኦይክድ ዳሮ አሳይ የይሳ በእድ ካዋስ ኦድስ። 35ሄ ዎደ እዮናዳብ፥ “ሄኮ፥ ታኒ ነ አይለይ ኦድዳይሳዳ ካዋ አደ ናይት ይዶሶና” ያግስ።
36እ ኦድ ዉርስያ ዎደ ካዋ አደ ናይት ገልድ ባንታ ቃላ ቁ ኦድ ዋስዶሶና። ቃስ ካዎይነ እያ ሞርናት ኡባይ ይባታ ዬሆ ዬክዶሶና።
37አበሰሎመይ ባቃትድ፥ ገሹራ ካዎ ግድዳ አምሁዳ ናኣ ታልማያኮ ብስ። ሽን ካዎይ ዳዊቲ ባ ናኣስ ዳሮ ጋላስ ዬክስ።
38አበሰሎመይ ባቃትድ ገሹራ ቢታ ብዳፐ ጉየ ያን ሄ ላይ ደእስ። 39ካዎይ ዳዊቲ አምኖና ሀይቁዋን ጋክዳ አዛንያፐ ምንዳ ግሾ፥ አበሰሎመ በአናዉ ላሞትስ።
