Select a Verse

የሱሲ ሙሰፐ ቦላ

1ሄሳ ግሾ፥ ፆሳይ ፄግዳ ጌሻ እሻቶ፥ ኑ አማኖን ጎዳ ግድ ፄግያ ሀዋርያነ ካህነ ሀላቃ የሱሳ በእተ። 2ሙሰይ ፆሳ ኬ ኡባን አማነትዳይሳዳ የሱሲካ ባና ዶርዳ ፆሳስ አማነትዳይሳ። 3ኬ ኬፀይስ ኬፈ አድ ቦንቸተይሳዳ የሱሲ ሙሰፐ አያ ቦንቾ ኤካናዉ በሴስ። 4እስ እስ ኬ ኬፅዳ አስ ደኤስ፥ ሽን ኡባ ጊግስዳይ ፆሳ። 5ሙሰይ ፆሳ ኬ ኡባን አማነትዳ አይለ ግድድ፥ ፆሳይ ስንፈ ጋናባስ ማርካ ግድስ። 6ሽን ክርስቶስ ፆሳ ኬን ናአዳ አማነትዳይሳ። ኑኒ ኤካና ግድ ናግያ ኡፋይሳ ምንድ ናግኮ ፆሳ ኬ ግዶስ።

ፆሳ አሳስ ደእያ ሸምፖ

7ሄሳ ግሾ፥ ጌሻ አያናይ ገይሳዳ፥

“ሀች ህንተ ፆሳይ ገይሳ ስእያ ዎደ፥

8መላ ቢታን ፓጭያ ጋላስ፥

ህንተ አዋት ማካልዳይሳዳ፥

ህንተ ዎዛና ምንፍተ።

9ህንተ አዋት ታና ፓጭዶሶና፤

ኦይታሙ ላይ ታ ኦሱዋ በእዶሶና።

10ሄሳ ግሾ፥ ታ ሄ የለተ ሀንቀታዳ፥

‘ኤንቲ ኡባ ዎደ ባንታ ዎዛናን ባሎሶና፤

ታ ኦግያ ኤርቦኮና’ ያጋስ።

11ሄሳ ግሾ፥ ታኒ ታ ሀንቁዋን ጫቃዳ፥

‘ታ ሸምፖ በሳ ኡባካ ገሎኮና’ ያጋስ”

ያጌስ።

12ታ እሻቶ፥ ህንተፈ ኦደንካ፥ ደኦ ፆሳፈ ህንተና ሻክያ ኢታነ አማኖና ዎዛን ዶና መላ ናገትተ። 13ህንተፈ ኦናካ ናጋር ባለን፥ ባ ዎዛና ምንና መላ “ሀች” ያገትድ ፄገትሽን ጋላስ ጋላስ እሶይ እሱዋራ ዞረትተ። 14ኑ ኮይሮ አማኑዋ ኑኒ ዉርሰ ጋካናዉ ምንድ ናግኮ፥ ክርስቶሳራ እስፈ ላታና። 15ጌሻ ማፃፋን፥

“ሀች ፆሳይ ገይሳ ህንተ ስእያ ዎደ፥

ሄ ዎደ ኤንቲ ማካላተን ሀንዳይሳዳ፥

ህንተ ዎዛና ምንፍተ”

ያግስ።

16ፆሳይ ግያባ ስእድ ማካልዳይ ኦኔ? ሙሰይ ግብፀፈ ካለ ከስዳ ኡባ ግዶኮናዬ? 17ፆሳይ ኦይታሙ ላይ ኦና ሀንቀትዴ? ናጋራ ኦዳይሳታነ ኤንታ አሀይ መላ ቢታን ዎ አትዳ አሳታ ግዶኮናዬ? 18ቃስ ፆሳይ፥ “ታ ሸምፖ በሳ ገለከታ” ያግድ ጫቅዳይ፥ እያዉ ኪተቶና እፅዳ አሳፐ አትሽን፥ ኦደሴ? 19ህዛ፥ ኤንቲ ሄ ሸምፖ በሳ ገሎና አትዳይ አማንቦና ግሾ፥ ግደይሳ ኑ በኦስ።