Select a Verse
ኡንአነ ማዶ ኮሽ
1ነና ይሶና ደእሽን ሀራ ይሰይሶ፥ ነና አድ እሞና ደእሽን ሀራ አ እመይሶ፥ ነና አየ! ነ ይሶ አግዳ ዎደ ነና ይሳና፤ ነ አ እሞ አግዳ ዎደ ነና አድ እማና።
2አቤት ጎዳዉ፥ ኑና ማራ፤ ኑኒ ነና ኡፋይሳን ናጎስ፤ ዎንታ ዎንታ ኑስ ዎልቃ ግዳ፤ መቶ ዎደ ኑና አሻ። 3ነ ግርሳ ደሹዋን ደረይ ባቃቴስ፤ ኔኒ ኑና ማዳናዉ ደንድያ ዎደ ካዎተት ላለቶሶና። 4ጎንዶይ ሺቀይሳዳ ህንተ ድኦይ ሺቃና፤ ቦለይ ድርገይሳዳ አሳይ እያ ቦላ ድርጋና።
5ጎዳይ ቦላ ደእያ ግሾ፥ ቁ ቁ ግስ፤ ፅዮነ ሱረ ፕርዳንነ ፅሎተን ኩንና። 6እ ህንተ ዎድያስ አማንያ ባሶ ግዳና፤ ህንተዉ አቶተ፥ ጭንጫተነ ኤራተ ግዳና፤ ጎዳስ ያሽ ሀ ኡባ ሻሉዋስ ቁልፐ ግዳና።
7ሄኮ፥ ጎባት ኦገ ቦላ ዋሶሶና፤ ስገናዉ ኪተትዳይሳት ጫመትድ ዬኮሶና። 8ዎጋ ኦገት ካይሳትዶሶና፤ ኦግያራ ካንያ አስ ባዋ። ጫቆይ ላለትስ፤ ካታማት ካትዶሶና፤ ቦንቾ አሳት ቦረትዶሶና። 9ቢታይ አዛንስ፤ ዳቡርስ፤ ልባኖሰይ ዬላትድ መልስ፤ ሳሮና ዛንጋራይ መላ ቢታ ግድስ። ባሳነ ደርያንነ ቃርመሎሳ ደርያን ደእያ ም ሀይይ ቆቆፈትስ።
10ጎዳይ ሀይሳዳ ያጌስ፦ “ሀእ ታኒ ደንዳና፤ ሀእ ታኒ ቦንቸታና፤ ሀእ ታኒ ቁ ቁ ጋና። 11ህንተ ኡቱላ ቃንትድ ፑኖ የልደታ፤ ህንተ ሸምፖይ ህንተና ታማዳ ማና። 12አሳይ ቦቅንተ ሹቻዳ ታማን ፁገታና፤ ቃስ አጉንዳ ታማን ኤፃና። 13ህንተኖ፥ ሃሆን ደኤይሳቶ፥ ታ ኦዳይሳ ስእተ፤ ማታን ደኤይሳቶ ታ ዎልቃ አኬክተ” ያጌስ።
14ፅዮነን ደእያ ናጋራንቾት ዳጋምዶሶና፤ ፆሳ ኤሮናይሳት ኮኮርዶሶና። ኤንቲ፥ “ኑ ግዶፈ ምያ ታማራነ መርናዉ ኤፅያ ላጩዋራ ዳናዉ ዳንዳኤይ ኦኔ?” 15ፅሎተን ሄመተይ፥ ሱረ ኦደተይ፥ በሶና ኦገራ በንትያ ጎአ እፀይ፥ ባ ኩሽያ ዎፈ ኤኮና መላ ድገይ፥ ሸምፖ ዎባ ስኦና መላ ባ ሀይ ቱጨይ፥ ኢታባ ፄሎና መላ ባ አይፍያ ካመይ፥ 16ሄ ኡራይ ቃ በሳን ዳና። እ፥ ቆሰትድ አትያ በሳይ ምኖ ዛላ ግዳና፤ እያ ካይ እያዉ እመታና፤ እ፥ ኡያ ሃይ ፓጨና።
17ህንተ አይፈይ ካዋ፥ እያ የገልሳራ በአና፤ ሃሆን ደእያ ቢታ ደማና። 18ህንተ፥ “ሀላቃይ አዉን ደኢ? ጊራ ኤከይስ አዉን ደኢ? ግምበ ሻኮታ ሀላቃይ አዉን ደኢ?” ያግድ ህንተ ዎዛናን በን ያሽያ ዎድያ ቆፓና። 19ዎዛና ምኖ አሳ፥ ህንተዉ ገሎና ዶናን ኦደትያ አሳነ እንፃርሳይ ደዶትያ አሳ ህዛፐ ጉየ ህንተ በኤከታ።
20ኑኒ ኑ ባኣለ ቦንችያ ፅዮነ ካታማ በእተ! ዎፑ ግድ ደእያ፥ እያ ሸይ ሾደቶና፥ እያ ዎዶሮይ ዱፆናነ እያ ሸይ ቃፆና ዱንካነ መላ ሀንዳ የሩሳላመ ካታማ ህንተ፥ ህንተ አይፈን በአና። 21ሄ በሳን ጎዳይ ኑስ ዎልቃ ግዳና። ሄ በሳይ ዳልጋ ሳፋነ ጎግያ ሃ መላ ግዳና። ዎጎሎይ እያ ቦላራ ባናዉ ዳንዳኤና፤ ግታ ማርካበት ያራ ካንናዉ ዳንዳኦኮና። 22ጎዳይ ኑስ ፕርደይሳ፤ ጎዳይ ኑስ ህገ እመይሳ፤ ጎዳይ ኑ ካዋ፤ እ ኑና አሻና።
23ነ ቃሾ ዎዶሮይ ዶልአና፤ ማርካብያ ቱሳይ ሹጋና፤ እያ ሻራይካ ቶለትቤና። ሄ ዎደ ዳሮ ድኦ ሻከታና፤ ሀር አቶሽን ዎበትካ ድኦ ኤካና። 24ፅዮነን ደእያ ኦንካ “ታና ሳኬስ” ያገና፤ ያን ደእያ አሳ ናጋራይ አቶ ጌተታና።
