Select a Verse
ፆሳይ እያሱ ኪትስ
1ጎዳ አይለይ ሙሰይ ሀይቅዳፐ ጉየ፥ ጎዳይ ሙሰ ማድያ ናወ ናኣ እያሱ፥ ሀይሳዳ ያግስ፤ 2“ታ አይለይ፥ ሙሰይ ሀይቅስ። ሄሳ ግሾ፥ ኔራነ ሀ አሳ ኡባይ ደንድድ፥ ታኒ እስራኤለ አሳስ እማናዉ ደእያ ቢታ ገላናዉ፥ ዮርዳኖሰ ሻፋ ፕንተ። 3ታኒ ሙሰስ ኦድዳይሳዳ፥ ህንተ ቶሆይ የያሶ ኡባ ህንተዉ እማስ። 4ህንተ ዛዋይ ዱገሀ ነገበ መላ ቢታፈ ደንድድ፥ ፑደሀን ደእያ ልባኖሰ ዙማ ጋካናሳ። ቃስ ዶሎሃ ባጋን ደእያ ኤፍራፂሳ ዎጋ ሻፋፐ ደንድድ፥ ህተታ ቢታ ኡባ ኤክድ ዉሎሀ ባጋን ደእያ መደትራነ አባ ጋካናሳ። 5እያሱ፥ ነ ላይ ኡባን ኦንካ ኔራ ኤቀታናዉ ዳንዳኤና። ታኒ ሙሰራ ግድዳይሳዳ፥ ኔራካ ግዳና። ታኒ ነና የግከ፤ አግከ። 6አይኮይ ባዋ ምና። ታኒ ኤንታ ማይዛታስ እማና ጋዳ ጫቅዳ ቢታ ኔን ሀ አሳ ላትሳና። 7አይኮይ ባዋ ምና። ታ አይለይ ሙሰይ ነዉ እምዳ ህግያ ኡባ ምንዳ ናጋ። ኔን ብያ በሳ ኡባን ነዉ እንጀታና መላ እያፐ ኡሻች ዎይኮ ሀድርስ ጎፓ። 8ሀ ህገ ማፃፋይ ነ ዶናፐ ሻከቶፎ። እያን ፃፈትዳባ ኡባ ምንዳ ናጋናዉ ጋላስነ ቃማ እያ ቆፓ። ሄሳ ነ ኦኮ፥ ነዉ ኡባባይ እንጀታናነ ፖለታና። 9ነ ብያ በሳ ኡባን ታኒ ጎዳይ ነ ፆሳይ ኔራ ደእያ ግሾ፥ ባቦፋ፤ ህርጎፋ፤ ያጋዳ ነዉ ኦዳይስ” ያግስ።
10ሄሳፈ ጉየ፥ እያሱይ ደርያ ሀላቃታ ሀይሳዳ ያግስ፤ 11“አሳይ ዱንካንድ ደእያ ጉታ ብድ፥ ሄ ጋላሳ ጋርሳን፥ ‘ጎዳይ፥ ህንተ ፆሳይ፥ ህንተዉ እምያ ቢታ ላታናዉ ዮርዳኖሰ ሻፋ ፕንያ ግሾ፥ ህንተዉ ሽንቀ ጊግስተ’ ያግድ ደርያስ ኦድተ” ያግስ።
12እያሱይ፥ ሮቤላነ ጋዳ ኮቻታ ቃስ ምናሰ ኮቻታፐ ባጋ ሀይሳዳ ያግስ፤ 13“ጎዳይ፥ ህንተ ፆሳይ፥ ህንተና ሸምፕሳና፥ ሀ ቢታ ህንተዉ እማና ያግድ፥ ጎዳ አይለይ ሙሰይ ኦድዳይሳ ቆፕተ። 14ህንተ ማቸት፥ ህንተ ናይትነ ህንተ መሄይ ዮርዳኖሰ ሻፋፐ ሀፍንን ሙሰይ ህንተዉ እምዳ ቢታን ደእሾና። ሽን ህንተ ኦላንቾት ባንታ ኦላ ሚሽያ ኦይክድ፥ ህንተ አሳፐ ስንትድ፥ ኦለታናዉ ዮርዳኖሰ ሻፋ ፕኖና። 15ጎዳይ ህንተና ሸምፕስዳይሳዳ፥ ኤንታካ ሸምፕሳና ጋካናዉነ ጎዳይ ህንተ ፆሳይ ኤንታዉ እምያ ቢታ ኤንቲ ላታና ጋካናዉ፥ ኤንታ ማድተ፤ ኦለትተ። ያትድ፥ ስም ይድ፥ ዮርዳኖሰ ሻፋፐ ሀፍንን ዶሎሀ ባጋን፥ ጎዳ አይለይ ሙሰይ እምዳ ህንተ ቡዞ ቢታን ደእተ” ያግስ።
16ኤንቲ ዛሪድ እያሱኮ፥ “ነ ኑና ኪትዳ ኡባ ኑኒ ኦና፤ ነ ኪትያሶ ኡባ ባና። 17ኑኒ ሙሰስ ኡባባን ኪተትዳይሳዳ፥ ነዉካ ኪተታና። ጎዳይ፥ ነ ፆሳይ ሙሰራ ግድዳይሳዳ፥ ኔራካ ግዶ። 18ኔራ ኤቀተይነ ነ ኪታ እፅያ ኦንካ ደእኮ፥ ሀይቆ። ግዶሽን ኔን ምና” ያግዶሶና።
