Select a Verse
Mndewa Mulungu komulagiliza Yoshua
1Viimalile ifa ya Musa msang'hani wa Mndewa Mulungu, Mndewa Mulungu kamulongela Yoshua mwana wa Nuni, mwanahina wa Musa, 2“Msang'hani wangu Musa kadanganika, lelo isasale uloke lwanda lwa Yoludani, weye hamwe na Waisilaili wose mbaka kuna iisi inimwing'hani niye. 3Chila hanhu hondamubojoge nizamwing'hani fana vinimulaganile Musa. 4Mhaka za isi yenu zizakuwa vino, ubanzi wa kusi izakuwa chuwala, ubanzi wa kasikazi izkuwa milima ya Lebanoni, ubanzi wa ulawilo wa zuwa izakuwa lwanda lukulu lwa Efulate, kufosela isi yose ya Wahiti mbaka bahali ya Meditelaniya ubanzi wa uswelo wa zuwa. 5Yoshua, habule munhu yondayadahe kukuhuma siku zose za ugima wako. Nizakuwa hamwe na weye fana vinikalile hamwe na Musa. Nizakuwa na weye, sizakuleka. 6Uwe mgangamavu na galu, kwaviya weye kwizawalanguliza wanhu wano kuisola isi iniwalaganile wasaho zawo kuwa nizaweng'ha. 7Ugangamale na uwe galu ng'hani, uteganye na uzindilile malagilizo yose yoyakulagilize msang'hani wangu Musa. Sekeuleke lagilizo jojose muladi ukale kwa kubweda hohose houhita. 8Sekeuleke kulonga mbuli zili muna ichitabu chino cha malagilizo, mbali chila siku kwizachigesa chino imisi na ichilo, muladi uzindilile mbuli zandikigwe umo. Uhatenda ivo kwizabweda na kukala goya. 9Kumbuka kuwa nikulagiliza uwe mgangamavu na galu. Sekeudumbe na sekeufe moyo kwaviya niye Mndewa Mulungu, Mulungu wako, nahamwe na weye hohose houhita.”
Yoshua kowasasala wanhu kuloka lwanda lwa Yoludani
10Maabaho Yoshua kawalagiliza walangulizi wa wanhu, 11“Foseni muna dilago na kuwalagiliza wanhu, ‘Sasaleni ndiya kwaviya zihafosa siku nhatu mwizaloka lwanda lwa Yoludani, kuhita kuisola isi ija Mndewa Mulungu, Mulungu wenu, iyomwing'hani iwe yenu.’ ”
12Yoshua kawalongela wanhu wa makabila ya Lubeni na Gadi na nusu ya kabila da Manase. 13“Kumbukeni lagilizo doyamulagilizileni Musa msang'hani wa Mndewa Mulungu viyalongile, ‘Mndewa Mulungu, Mulungu wenu, kezamwing'hani hanhu ha kuhumula na kezamwing'hani isi ino.’ 14Wake zenu na wanenu na wanyama wenu wa kufugigwa wezasigala muna iisi iyo iyamwing'hileni Musa ili ubanzi wa ulawilo wa zua wa lwanda lwa Yoludani. Mbali mweye walume mwili magalu muvazigwa silaha mwizaloka kuulongozi wa ndugu zenu, Waisilaili wamwenga. Muwataze, 15mbaka Mndewa Mulungu vondayaweng'he hanhu ha kuhumula, fana viyamwing'hileni mweye, mbaka nawo iviya waisole isi ija iwokwing'higwa na Mndewa Mulungu, Mulungu wenu. Maabaho mwizabwela muna iisi yenu na kukala, isi yomwing'higwe na Musa, msang'hani wa Mndewa Mulungu, ili ubanzi wa ulawilo wa zuwa wa Yoludani.”
16Wamwidika Yoshua, “Mbuli zose zouchilagilize chizazitenda na hohose hondauchitume chizahita. 17Fana vichizindilile mbuli zose ziyalongile Musa, niivo vondachizindilile mbuli zoulonga weye. Mndewa Mulungu, Mulungu wako, yawe hamwe na weye fana viyawile hamwe na Musa. 18Munhu yoyose yondayadileke lagilizo jako hebu kulema kuzindilila mbuli zako hebu mbuli yoyose youmulagiliza, kezakomigwa. Mbali weye uwe mgangamavu na galu.”
