Select a Verse
1Wafalume wose wa Waamoli wakalile kuumwambu wa lwanda lwa Yoludani ubanzi wa uswelo wa zuwa, wafalume wose wa Wakanaani wakalile mhwani ya Meditelaniya viwahulike kuwa Mndewa Mulungu kanyaza mazi ya lwanda lwa Yoludani mbaka Waisilaili wose waloka umwambu, wafa moyo na nguvu zawo zitenyuka kwaviya wawadumba Waisilaili.
Kwingizigwa ulungwana uko Giligali
2Siku izo Mndewa Mulungu kamulongela Yoshua, “Songola dibwe dilingile fana mwele muladi uwengize ulungwana waja Waisilaili hawanakwingizigwa.” 3Ivo Yoshua kasongola dibwe dilingile fana mwele na kawengiza ulungwana Waisilaili uko Gibea Haalalosi. 4Chino niicho ichimu cha Yoshua kuwengiza ulungwana Waisilaili. Waisilaili wose, walume walawile Misili wowadahile kuhita kuing'hondo, wose wadanganika kuchuwala muna inzila viwakalile muumwanza kulawa kuna iisi ya Misili. 5Wanhu wose walawile kuna iisi ya Misili wakala wengizigwe ulungwana, mbali waja wavumbuke mzila uko kuchuwala viwakalile wolawa Misili, wakala wang'hali hawanakwingila ulungwana. 6Waisilaili wagenda miyaka malongo mane muna ichuwala mbaka walume wose wadahile kuhita kuna ing'hondo wadanganika, kwaviya hawategeleze mbuli ziyalongile Mndewa Mulungu. Mndewa Mulungu kawalahila wanhu wawo kuwa hawezaiwona isi ija ili na ulongo unogile yoyailahile kuching'ha cheye, welesi wawo. 7Kaweka wana wawo hanhu ha tati zawo na wano iwo wawo Yoshua kawengiza ulungwana. Wakala hawanakwingizigwa ulungwana kwa viya wakala muumwanza kuichuwala.
8Walume wose viwakomelezeke kwingizigwa ulungwana, wasigala hanhu hawo muna dilago mbaka viwahonile. 9Maabaho Mndewa Mulungu kamulongela Yoshua, “Diyelo nimsegezelani chinyala chiya cha Misili.” Ivo hanhu baho hatangigwa Giligali mbaka diyelo.
10Waisilaili viwekile lago jawo uko Giligali watenda Dugila da Pasaka ichigulogulo ya longo na nne ya mwezi hana dibawe da Yeliko. 11Igolo yake, Pasaka viikomelezeke, waja magate yelibule lusu na mhule zikanzingigwe kulawa muna iisi ya Kanaani. 12Kwandusila siku iyo Waisilaili hawapatile mana kaidi. Kwandusila mwaka uwo Waisilaili waja mazao ya isi ya Kanaani.
Yoshua na mulangulizi wa bumbila da Mndewa Mulungu
13Yoshua viyakalile habehi na bululu da Yeliko, kamuwona munhu imwe kema kuulongozi wake kamha panga dinoligwe. Yoshua kamuhitila na kamuuza, “Vino weye miyetu hebu wa wehi wetu?” 14Nayo kamwidika, “Siivo bule! Niye mulangulizi wa wakalizi wa bumbila da Mndewa Mulungu, lelo nifika.” Yoshua kagona chingubingubi, katambika. Maabaho kamuuza, “Mwenevale wangu, niye msang'hani wako. Kolonda nitende choni?” 15Mulangulizi iyo wa wakalizi wa bumbila da Mndewa Mulungu kamulongela Yoshua, “Vula vilatu vako kwaviya hanhu houkwima hela.” Yoshua katenda ivo.
