Select a Verse
अहाबो साथे यहोशापातो रा मेल-मिलाप
1राजा यहोशापात बऊत अमीर ओर महिमा वाल़ा ऊईगा ओर तिने इस्राएलो रे राजा अहाबो रे परिवारो साथे ब्याओ रा रिस्ता बणाया। 2कुछ साला बाद से सामरिया दे अहाबो गे गया, तेबे अहाबे तेसखे ओर तेसरे साथिया खे बऊत सारिया पेडा-बाकरिया ओर गाय-बल़द बाडी की, तेसखे गिलाद इलाके रे रामोत शईरो पाँदे चढ़ाई करने खे सकेल़ेया।
3इस्राएलो रे राजा अहाबे यहूदा रे राजा यहोशापातो खे बोलेया, “क्या तां मां साथे गिलाद इलाके रे रामोत शईरो पाँदे चढ़ाई करनी?” तिने तेसखे ज्वाब दित्तेया, “जेड़ा तूँ तेड़ा आऊँ बीए, ओर जेड़ी तेरी प्रजा, तेड़ी मेरी प्रजा बीए। आसा लोका युद्धो दे तेरा साथ देणा।”
4फेर यहोशापाते इस्राएलो रे राजे खे बोलेया, “आओ, पईले यहोवे रा वचन पता करूँए।” 5तेबे इस्राएलो रे राजे नबिया खे जो 400 भविष्यबाणी करने वाल़े थे, कट्ठा करी की तिना ते पूछेया, “क्या आसे गिलाद इलाके रे रामोत शईरो पाँदे युद्ध करने खे अमला करुँ या आऊँ रूकेया रा रऊँ?” तिने ज्वाब दित्तेया, “अमला कर, कऊँकि परमेशरो से राजे रे आथो रे करी देणा।”
6पर राजा यहोशापाते पूछेया, “क्या एती परमेशरो रा ओर बी कोई नबी ए, जेसते आसे पूछिए?” 7इस्राएलो रे राजे यहोशापातो खे बोलेया, “आ, एक मर्द ओर ए, जेसरे जरीये आसे यहोवे ते पूछी सकूँए, पर आऊँ तेसते नफरत करूँआ, कऊँकि से मेरे बारे रे कदी कल्याणो री नि, सदा नुकशाणो री ई भविष्यबाणी करोआ। से यिम्ला रा पाऊ मीकायाह ए।” यहोशापाते बोलेया, “राजा एड़ा नि बोलो।”
8तेबे इस्राएलो रे राजा अहाबे एक परदान बुलाई की बोलेया, “यिम्ला रे पाऊ मीकायाह खे फटाफट लई की आओ।” 9तेस बखते इस्राएलो रा राजा ओर यहूदा रा राजा यहोशापात आपणे-आपणे राज्य रे टाल्ले पईनी की, आपणे-आपणे सिंहासनो पाँदे बैठी रे थे, सेयो सामरिया शईरो रे बड़े द्वारो गे एक खल्याणो दे बैठी रे थे ओर सारे नबी तिना सामणे भविष्यबाणी करने लगी रे थे।
10तेबे कनाना रे पाऊआ बीचा ते एकी जेसरा नाओं सिदकिय्याह था लोए रे सींग बणाई की बोलेया, “यहोवा ईंयाँ बोलोआ कि इना साथे तां अरामी काई-काई की नाश करी देणे।” 11सबी नबीए येई भविष्यबाणी करी की बोलेया, “गिलाद इलाके रे रामोत शईरो पाँदे अमला कर ओर तूँ सफल ऊणा, कऊँकि यहोवे से शईर राजे रे आथो दे करी देणा।”
मीकायाह रे जरीये आरा रा सन्देश
12जो दूत मीकायाह खे बुलाणे गया था, तिने तेसखे बोलेया, “सुण, नबी लोक सब मिली की राजे रे बारे रे शुभ गल्ला बोलोए, इजी री खातर तेरी गल्ल तिना जेड़ी ओ, तैं बी शुभ गल्ला बोलणिया।” 13मीकायाहे बोलेया, “यहोवे री जिन्दगिया री कसम, जो कुछ मेरा परमेशर बोलो सेई मां बी बोलणा।”
14जेबे मीकायाह राजा अहाबो गे आया, तेबे राजे तेसते पूछेया, “ओ मीकायाह, क्या आसे गिलाद इलाके रे रामोत शईरो पाँदे युद्ध करने खे चढ़ाई करिए या रूके रे रऊँ?” तिने बोलेया, “आ, तुसे लोक चढ़ाई करो, ओर सफल ओ; ओर सेयो तुसा रे आथो रे ऊई जाणे।” 15राजे तेसखे बोलेया, “माखे कितणी बार ताखे कसम देई की बोलणा पड़ना, कि तू यहोवे खे याद करी की मांगे सच्च ई बोल।” 16मीकायाहे बोलेया, “माखे सारा इस्राएल बिना गवाल़े री पेडा-बाकरिया जेड़ा पाह्ड़ो पाँदे तित्तर-बित्तर दिशेया, ओर यहोवे रा वचन आया कि तिना खे चलाणे वाल़ा कोई नि ए, इजी री खातर हर एक आपणे-आपणे कअरो खे रामो रे वापस ऊई जाओ।”
17तेबे इस्राएलो रे राजे यहोशापातो खे बोलेया, “क्या मैं ताखे बोलेया नि था, कि तेस मेरे बारे दे पलाईया री नि, नुकशाणो री भविष्यबाणी करनी।” 18मीकायाहे बोलेया, “इजी बजा ते तुसे लोक यहोवे रा ये वचन सुणो: माखे सिंहासनो पाँदे विराजमान यहोवा ओर तेसरे दाँणे-खूँजे खड़ी री स्वर्गो री सारी सेना दिशी।” 19तेबे यहोवे पूछेया, “इस्राएलो रा राजा अहाब केस एड़ा बईकाणा कि से गिलाद इलाके रे रामोत शईरो पाँदे अमला करो।” तेबे किने कुछ ओर किने कुछ बोलेया। 20अन्तो दे एक आत्मा नेड़े आई की यहोवे रे सामणे खड़ी ऊई ओर बोलणे लगी, “मां से बईकाणा।” 21यहोवे पूछेया, “किंयाँ?” तेसे बोलेया, “मां जाई की तेसरे सबी नबिया पाँदे बैठी की तिना ते चूठ बुलाणा।” यहोवे बोलेया, “तेरा तेसखे बईकाणा सफल ऊणा, जाई की एड़ा ई कर।” 22इजी री खातर सुण, एबे यहोवे तेरे इना नबिया रे मुंए पाँदे एक चूठ बोलणे वाल़ी आत्मा बठयाल़ी राखी ओर यहोवे तेरे बारे दे नुकशाणो री गल्ल बोली राखी।
23तेबे कनानो रा पाऊ सिदकिय्याह नेड़े गया, ओर मीकायाह री खाखा पाँदे थप्पड़ बाई की पूछेया, “यहोवे री आत्मा माखे छाडी की तां साथे गल्ला करने खे केथो खे गया?” 24मीकायाहे बोलेया, “जेस दिने तां लूकणे खे कमरे ते कमरे खे नठणा, तेबे ताखे पता लगी जाणा।”
25तेबे इस्राएलो रे राजा अहाबे बोलेया, “मीकायाह खे शईरो रे परदान आमोन ओर राजकुमार योआशो गे लई जाई की, 26तिना खे बोलो, राजा ईंयाँ बोलोआ कि एसखे जेला रे पाओ ओर जदुओ तक आऊँ सई-सलामत नि आऊँ, तदुओ तक एसखे दु:खो री रोटी ओर पाणी देया करो।” 27तेबे मीकायाहे बोलेया, “जे तूँ कदी सई-सलामत वापस ओए, तो जाणी लया कि यहोवे मेरे जरीये नि बोलेया।” तेबे तिने बोलेया, “ओ लोको, तुसे सब के सब सुणी लो।”
अहाबो री मौत
28तेबे इस्राएलो रे राजा अहाबे ओर यहूदा रे राजे यहोशापाते दुँईं मिली की गिलाद इलाके रे रामोत शईरो पाँदे अमला कित्तेया। 29तेबे इस्राएलो रे राजा अहाबे यहोशापातो खे बोलेया, “मां तो पेष बदली की युद्धो रे जाणा, पर तूँ आपणे ई टाल्ले पईनी की राख।” तेबे इस्राएलो रे राजे पेष बदलेया ओर युद्ध करने खे गया।
30अरामो रे राजे तो आपणे रथा रे परदाना खे आज्ञा देई राखी थी कि ना तो छोटेया साथे लड़ो ओर ना बड़ेया साथे लड़ो, बस इस्राएलो रे राजे साथे लड़ो। 31इजी री खातर जेबे रथो रे परदाने यहोशापातो खे देखेया, तेबे बोलेया, “पक्का इस्राएलो रा राजा सेईए” ओर सेयो तेस साथे लड़ने खे मुड़े। ये देखी की यहोशापात चिंगेया, तेबे यहोवे तेसरी मताद कित्ती ओर सेयो तेसगे ते दूर चलीगे। 32ये देखी की कि से इस्राएलो रा राजा नि ए, रथो रे परदान तेसरा पीछा छाडी की वापस ऊईगे।
33तेबे अरामी सिपाईया बिचा ते किने ईंयाँ ई एक तीर चलाया ओर से इस्राएलो रे राजे री झिलम ओर थालले टाल्लेया रे छेद करी की लगेया; तेबे तिने आपणे सारथिये खे बोलेया, “आऊँ कायल ऊईगा रा, इजी री खातर लगाम फेरी की माखे सेना बीचा ते बारे लई जा।” 34ओर सेयो तेस बखते सारा दिन लड़दे रये ओर इस्राएलो रा राजा अहाब आपणे रथो दे अरामिया सामणे साँजा तक खड़ेया दा रया, पर सूरज डूबदे-डूबदे से मरी गा।
