Select a Verse
हिजकिय्याहो रे जरीये फसह रा त्योआर मनाणे री त्यारी
1तेबे हिजकिय्याहे सारे इस्राएल ओर यहूदा रे लोका खे सन्देसा पेजेया ओर एप्रैम ओर मनश्शे रे गोत्रा खे ये लिखी की चिट्ठी पेजी कि तुसे यरूशलेम शईरो दे यहोवे रे मन्दरो दे इस्राएलो रे परमेशर यहोवे खे फसह रा त्योआर मनाणे खे आओ। 2राजा ओर तेसरे परदान ओर यरूशलेम शईरो री मण्डल़िए सला करी राखी थी कि फसह रा त्योआर दूजे मीन्ने मनाणा। 3सेयो तेस त्योआरो खे तेस बखते इजी बजा ते नि मनाई सको थे, कऊँकि थोड़े जे ई पुरोईते आपू-आपू खे पवित्र करी राखेया था ओर प्रजा रे लोक यरूशलेम शईरो रे कट्ठे नि ऊई रे थे। 4ये गल्ल राजा ओर सारी मण्डल़िया खे ठीक लगी। 5इजी री खातर तिने इस्राएलो रे सारे देशो दे, बेर्शेबा शईरो ते लई की दानो रिया जगा तक एक सन्देश पेजेया, कि यरूशलेम शईरो दे इस्राएलो रे परमेशर यहोवे रिया तँईं फसह रा त्योआर मनाणे खे आओ, कऊँकि तिने इतणी बड़ी संख्या रे फसह ईंयाँ नि मनाया था जेड़ा लिखी राखेया। 6तेबे डाकिये राजा ओर तेसरे परदाना ते पर्चिया लई की, राजे री आज्ञा रे मुताबिक सारे इस्राएलो ओर यहूदा रे कूमे ओर ये बोलदे गये, “ओ इस्राएलियो! अब्राहम, इसहाक ओर इस्राएलो रे परमेशर यहोवे रिया तरफा खे फिरो, ताकि से अश्शूरो रे राजे रे आथो ते बची रे तुसा लोका रिया तरफा खे फिरो। 7ओर आपणे बुजुर्गा ओर पाईया जेड़े नि बणो, जिने आपणे बुजुर्गा रे परमेशर यहोवे साथे विश्वासघात कित्तेया था ओर तिने से बेज्जतिया जोगा करी ता था, जेड़ा कि तुसे आपू देखणे लगी रे। 8एबे आपणे बुजुर्गा जेड़ी हठ नि करो, बल्कि यहोवे रे वशो दे ऊई की तेसरी तेसा पवित्र जगा रे आओ, जो तिने सदा खे पवित्र करी राखी ओर आपणे परमेशर यहोवे री आराधना करो, ताकि तेसरा पड़केया रा गुस्सा तुसा पाँदा ते दूर ऊई जाओ। 9जे तुसे यहोवे रिया तरफा खे फिरोगे, तो जो तुसा रे पाईया खे ओर बच्चेया खे बन्दी बणाई की लईगे रे, तिना तुसा रे पाईया ओर बच्चेया पाँदे दया करनी ओर सेयो एते देशो रे वापस आई सकोए, कऊँकि तुसा रा यहोवा परमेशर अनुग्रह करने वाल़ा ओर दयालु ए, ओर जे तुसे तेसरी तरफा खे फिरोगे तो तेस आपणा मूँ तुसा ते नि मोड़ना।” 10ईंयाँ डाकिये एप्रैम ओर मनश्शे रे देशो रे शईरो-शईरो रे ऊँदे ऊए जबूलूनो तक गये, पर तिने तिना रिया आसिया लगाईया ओर तिना रा मजाक उडाया। 11तेबे बी आशेर, मनश्शे ओर जबूलूनो बीचा ते कुछ लोक दीन ऊई की यरूशलेम शईरो खे आए। 12यहूदा दे बी परमेशरो री एड़ी सामर्थ ऊई, कि सेयो एक मन ऊई की, जो आज्ञा राजा ओर परदाने यहोवे रे वचनो रे मुताबिक दित्ती थी, तेतेखे मानणे खे त्यार ऊए।
फसह रे त्योआरो रा मनाया जाणा
13ईंयाँ जादा लोक यरूशलेम शईरो रे इजी खे कट्ठे ऊए, ताकि दूजे मीन्ने रे बिना सजेड़े री रोटिया रा त्योआर मनाओ ओर बऊत बड़ी सभा कट्ठी ऊई गी। 14तेबे तिने उठी की यरूशलेम शईरो रिया बेदिया ओर तूप बाल़ने रिया सब जगा चकी की किद्रोन नाल़े रे सेटी तिया। 15तेबे दूजे मीन्ने रे चौदुए दिने तिने फसह रे डांगर बलि कित्ते, तेबे पुरोईत ओर लेविये शर्मिंदा ऊए ओर आपू खे पवित्र करी की होमबलिया चढ़ाणे खे यहोवे रे मन्दरो रे ली आए। 16सेयो आपणे नियमो रे मुताबिक, मतलब परमेशरो रे दास मूसे रे बिधानो रे मुताबिक, आपणी-आपणी जगा रे खड़े ऊए ओर पुरोईते होमबलिया रा खून लेविया रे आथो ते लई की छिड़की ता। 17कऊँकि सभा रे बऊत एड़े थे जिने आपू खे पवित्र नि करी राखेया था, इजी री खातर सबी अशुद्ध लोका रे फसह रे डांगरा खे बलि करने रा अक्क लेविया खे दित्तेया, ताकि तिना खे यहोवे रिया तँईं पवित्र करो। 18बऊत सारे लोके, मतलब एप्रैम, मनश्शे, इस्साकार ओर जबूलूना बीचा ते कई एड़े थे जो शुद्ध नि ऊई रे थे, तेबे बी सेयो फसह रे डांगरा रा मास लिखी री बिधिया रे खलाफ खाओ थे, कऊँकि हिजकिय्याहे तिना रिया तँईं ये प्रार्थना कित्ती थी कि यहोवा जो पला ए, से तिना सबी रे पाप टखी देयो। 19जिने परमेशरो री, मतलब आपणे बुजुर्गा रे परमेशर यहोवे खे टोल़ने दे आपणा मन लगाई राखेया, चाए सेयो पवित्र जगा री बिधिया रे मुताबिक शुद्ध पनि ओ। 20ओर यहोवे हिजकिय्याह री ये प्रार्थना सुणी की लोक ठीक कित्ते। 21जो इस्राएली यरूशलेम शईरो रे आजीर थे, सेयो सात दिना तक बिना सजेड़े री रोटिया रा त्योआर बड़ी खुशिया साथे मनांदे रये ओर हर रोज लेविये ओर पुरोईत ऊच्ची आवाजा रे यहोवे खे बाजे बजांदे ऊए स्तुति करदे रये। 22जितणे लेवी लोक यहोवे रा पजन समजा साथे करो थे, तिना खे हिजकिय्याहे शान्तिया रे वचन बोले। ईंयाँ सेयो मेलबलि चढ़ाई की ओर आपणे बुजुर्गा रे परमेशर यहोवे सामणे आपणे पापो खे मानदे रये ओर तेस ठराए रे त्योआरो रे साता दिना तक खांदे रये।
फसह रा त्योआर दूजी बार मनाया जाणा
23तेबे सारी सभा रे लोके सलाह् कित्ती कि आसा सात दिन ओर त्योआर मनाणा, तेबे तिने सात दिन ओर खुशिया साथे त्योआर मनाया। 24कऊँकि यहूदा रे हिजकिय्याह राजे सभा खे 1,000 बाच्छू ओर 7,000 पेडा-बाकरिया देईतिया ओर परदाने सभा खे 1,000 बाच्छू ओर 10,000 पेडा-बाकरिया दित्तिया ओर बऊत सारे पुरोईते आपू खे पवित्र कित्तेया। 25तेबे पुरोईत ओर लेविया समेत यहूदा री सारी सभा, ओर इस्राएलो ते आए रे लोका री सभा ओर इस्राएलो रे देशो ते आए रे ओर यहूदा रे रणे वाल़े परदेशी, इने सबी खुशिया मनाईया। 26ईंयाँ यरूशलेम शईरो दे बऊत खुशिया ऊईया, कऊँकि दाऊदो रे पाऊ इस्राएलो रे राजा सुलैमानो रे दिना ते एड़ी गल्ल यरूशलेम शईरो रे नि ऊई थी। 27अन्तो रे लेवी पुरोईते खड़े ऊई की प्रजा खे आशीर्वाद दित्तेया ओर तिना री सुणी ओर तिना री प्रार्थना तेसरे पवित्र धामो तक, मतलब स्वर्गो तक पऊँची।
