Select a Verse

यहूदा दे यहोआहाजो रा राज्य

1तेबे देशो रे लोके योशिय्याह रे पाऊ यहोआहाजो खे लई की तेसरे बाओ री जगा पाँदे यरूशलेम शईरो रे राजा बणाया। 2जेबे यहोआहाज राज करने लगेया, तेबे से तेईया साला रा था ओर तीन मीन्ने तक यरूशलेम शईरो रे राज करदा रया। 3तेबे मिस्रो रे राजे से यरूशलेम शईरो रे राजगद्दिया ते उतारी ता ओर देशो पाँदे 3,400 किलो चाँदी ओर 34 किलो सूईना जुर्माने रे दण्ड लगाया। 4तेबे मिस्रो रे राजे तेसरा पाई एल्याकीम यहूदा ओर यरूशलेम शईरो रा राजा बणाया ओर तेसरा नाओं बदली की यहोयाकीम राखेया; पर नको तेसरे पाई यहोआहाजो खे मिस्रो खे लईगा।

यहूदा दे यहोयाकीमो रा राज्य

5जेबे यहोयाकीम राज करने लगेया, तेबे से पच्चीया साला रा था ओर ग्यारा साला तक यरूशलेम शईरो दे राज करदा रया। तिने से काम कित्ते जो तेसरे परमेशर यहोवे री नजरा रे बुरे थे। 6तेस पाँदे बाबेलो रे राजे नबूकदनेस्सरे अमला कित्तेया ओर बाबेलो खे लई जाणे खे तेसखे पीतल़ी रिया बेड़िया पन्याईया। 7तेबे नबूकदनेस्सरे यहोवे रे मन्दरो रे कुछ पांडे आपणे मन्दरो रे जो बाबेलो दे था लई जाई की राखी ते। 8यहोयाकीमो रे ओर काम ओर तिने जो-जो नीच काम कित्ते ओर तेसरे जो-जो बुराईया थिया, सेयो इस्राएल ओर यहूदा रे राजेया रे इतियासो री कताबा दे लिखी राखिया; ओर तेसरा पाऊ यहोयाकीन तेसरी जगा पाँदे राज करने लगेया।

यहूदा दे यहोयाकीनो रा राज्य

9जेबे यहोयाकीन राज करने लगेया, तेबे से ठारा साला रा था ओर तीन मीन्ने ओर दसा दिना तक यरूशलेम शईरो रे राज करदा रया। तिने से कित्तेया जो परमेशर यहोवे री नजरा रे बुरा ए। 10नया साल लगदे ई नबूकदनेस्सर राजे लोक पेजी की, से ओर यहोवे रे मन्दरो रे अच्छे पांडे बाबेलो खे मँगवाई ते ओर तेसरे पाई सिदकिय्याह खे यहूदा ओर यरूशलेम शईरो पाँदे राजा बणाया।

यहूदा दे सिदकिय्याह रा राज्य

11जेबे सिदकिय्याह राज करने लगेया, तेबे से इक्कीया साला रा था ओर यरूशलेम शईरो रे ग्यारा साला तक राज करदा रया। 12तिने सेई कित्तेया जो तेसरे परमेशर यहोवे री नजरा रे बुरा ए। तेबे बी यिर्मयाह नबी यहोवे रिया तरफा ते गल्ला करो था, तेबे बी से तेस सामणे दीन नि ऊआ। 13फेर नबूकदनेस्सर राजा जिने तेसखे परमेशरो री कसम खुल़ाई थी, तेस साथे तिने बगावत कित्ती ओर तिने जीद कित्ती ओर आपणा मन काठा कित्तेया, ताकि से इस्राएलो रे परमेशर यहोवे रिया तरफा खे नि फिरो।

यरूशलेम शईरो रा नाश

14सबी परदान पुरोईते ओर लोके बी दूजी जातिया जेड़े नीच काम करी की बऊत बड़ा विश्वासघात कित्तेया ओर यहोवे रे मन्दरो खे जो तिने यरूशलेम शईरो दे पवित्र कित्तेया था, अशुद्ध करी ता। 15तिना रे बुजुर्गा रे यहोवा परमेशरे बड़ी कोशिश करी की आपणे दूता गे तिना खे सन्देसा पेजेया, कऊँकि तेसखे आपणी‍ प्रजा ओर आपणे मन्दरो पाँदे तरस आओ था। 16पर सेयो परमेशरो रे दूता रा मजाक उडाओ थे, तिना रे वचना खे बेकार जाणो थे ओर तेसरे नबिया रिया आसिया लगाओ थे। तेबे यहोवा आपणी प्रजा पाँदे एड़ा गुस्से ऊआ कि बचणे रा कोई तरीका नि रया। 17तेबे तिने तिना पाँदे कसदिया रे राजेया ते चढ़ाई करवाई ओर तिने तिना रे जवान पवित्र मन्दरो रेई तलवारी साथे काये ओर क्या जवान, क्या कुआँरिया, क्या स्याणे केसी पाँदे बी दया नि कित्ती; यहोवे सारे यरूशलेम शईरो रे लोक तेसरे आथो रे करीते। 18क्या छोटे, क्या बड़े, परमेशरो रे मन्दरो रे सारे पांडे ओर यहोवे रे मन्दरो रे ओर राजा ओर तेसरे परदानो रे खजाने, इना सबी खे से बाबेलो खे लईगा। 19तेबे कसदिये परमेशरो रा मन्दर फूकी ता ओर यरूशलेम शईरो री दवाला तोड़ी तिया ओर आग लगाई की तेसरे सारे मईल फूकी ते ओर तिना रा सारा कीमती सामान नाश करी ता। 20जो तलवारी साथे बची गे, तिना खे से बाबेलो रे लईगा ओर फारसो रे राज्य रे प्रबल ऊणे तक सेयो तेसरे ओर माठे-पोतेया रे वशो दे रये। 21ये सब इजी खे ऊआ, ताकि यहोवे रा जो वचन यिर्मयाह रे मुंए ते निकल़ेया था, से पूरा ओ कि देश आपणे रामो रे बखतो रे दिना दे सुख पोगदा रओ। इजी री खातर जदुओ तक से सूना पड़ेया रा रया तदुओ तक, मतलब सत्तर साल पूरे ऊणे तक तेसखे राम मिलेया।

राजा कुस्रूए रे राजो दे यहूदिया री यरूशलेमो खे वापसी

22फारसो रे राजा कुस्रूए रे पईले सालो रे यहोवे तेसरा मन त्यार कित्तेया, कि जो वचन यिर्मयाह रे मुंए ते निकल़ेया था, से पूरा ओ। इजी री खातर तिने आपणे सारे राज्य रे ये प्रचार करवाया ओर एते उम्मीदा ते ये पर्चिया लिखाईया, 23“फारसो रा राजा कुस्रू बोलोआ कि स्वर्गो रे यहोवा परमेशरे पूरी तरतिया रा राज्य माखे देई राखेया ओर तिने ई माखे आज्ञा देई राखी कि यरूशलेम जो यहूदा दे ए तिदे मेरा एक मन्दर बणवा; इजी री खातर ओ तेसरी प्रजा रे सारे लोको, तुसा बीचा ते जो कोई चाओ, तेसरा यहोवा परमेशर तेस साथे रओ, से तेथो खे चली जाओ।”