Select a Verse
दाऊद ओर बतशेबा
1फेर जेस बखते राजा लोक युद्ध करने खे निकल़ेया करो थे मतलब सालो रे शुरूए दे। दाऊदे तेसी बखते योआब ओर तेस साथे आपणे सब परदान ओर सारी इस्राएली सेना खे युद्ध करने खे पेजेया। तिने अम्मोन देश नाश करिता, ओर रब्बा शईरो पाँदे अमला कित्तेया। पर दाऊद आपू यरूशलेम शईरो देई रई गा। 2एक दिन साँजके बखते दाऊद माँजे पाँदा ते उठी की राजमईलो रे छतो पाँदे कूमणे लगी रा था ओर छतो पाँदा ते तेसखे एक जवाणस, जो बऊत बांकी थी, नांह्दी ऊई दिखी। 3जेबे दाऊदे आपणे केसी दूतो खे पेजी की तेसा जवाणसा रे बारे दे पता लगाणे खे बोलेया, तेबे तिने दूते वापस आई की दाऊदो खे दसेया, “से एलीआमो री बेटी ओर हित्ती ऊरिय्याह री लाड़ी बतशेबा ए।”
4तेबे राजा दाऊदे दूत पेजी की से जवाणस बुलाई ली ओर से दाऊदो गे आई ओर से तेसा साथे सया। (से तो मासिक तर्मो ते शुद्ध ऊई गी थी) तेबे से आपणे कअरो खे वापस ऊई गी। 5कुछ बखतो ते बाद से जवाणस गर्भवती ऊई ओर तेसे दाऊदो गे सन्देशा पेजेया कि आऊँ गर्भवती ए। 6तेबे दाऊदे योआबो खे सन्देशा पेजेया, “हित्ती जातिया रे ऊरिय्याह नाओं रे माणूंए खे मांगे पेज।” तेबे योआबे ऊरिय्याह दाऊदो गे पेजीता। 7जेबे ऊरिय्याह तेसगे आया, तेबे दाऊदे तेसते योआब ओर सेना रा सुखसाँद ओर युद्धो रा आल पूछेया। 8तेबे दाऊदे ऊरिय्याह खे बोलेया, “आपणे कअरे जाई की राम कर।” जेबे ऊरिय्याह राजमईलो ते बारे निकल़ेया तेबे राजे बादो ते तेसखे कुछ ईनाम पेजेया। 9पर ऊरिय्याह आपणे स्वामिए रे सारे सेवका साथे राजमईलो रे द्वारो रे नेड़े ई लेटीगा ओर आपणे कअरे नि गया। 10जेबे दाऊदो खे ये सन्देश मिलेया कि ऊरिय्याह आपणे कअरे नि गया, तेबे दाऊदे ऊरिय्याहो खे बोलेया, “तूँ तो इतणी दूरा ते आई रा, तेबे तूँ आपणे कअरे कऊँ नि गया?” 11ऊरिय्याहे दाऊदो खे बोलेया, “जेबे परमेशरो रा सन्दूक, ओर इस्राएली लोक ओर यहूदा रे लोक तम्बूआ दे रओए ओर मेरा स्वामी योआब ओर मेरे स्वामिए रे सेवके खुले मैदानो दे डेरे लगाई राखे, तो क्या आऊँ कअरे जाई की खाऊँ, पियूँ ओर आपणी लाड़िया साथे सऊँ? तेरी जिन्दगिया री कसम ओर तेरे प्राणो री कसम, आऊँ एड़ा काम नि करी सकदा।” 12दाऊदे ऊरिय्याहो खे बोलेया, “आज एथी रओ ओर काल मां तूँ लड़ाईया खे पेजी देणा।” इजी री खातर ऊरिय्याह तेस दिने ओर दूजे दिने बी यरूशलेम शईरो देई रया। 13फेर दाऊदे तेसखे खाणे रा निऊँदा देई की आपू गे बुलाया ओर ऊरिय्याहे दाऊदो साथे खाया-पिया ओर तिने से शराब पिल़ाई की मतवाल़ा कित्तेया ओर साँजा खे से आपणे स्वामिए रे सेवका साथे सऊणे खे निकल़ेया, पर आपणे कअरे नि गया।
दाऊदो रा ऊरिय्याह खे काणे री योजना बनाणा
14तेतेरे दूजे दिने प्यागा दाऊदे योआबो रे नाओं पाँदे एक पर्ची लिखी की ऊरिय्याह रे आथो दे पेजी ती। 15तेते पर्चिया दे ये लिखी राखेया था, “जेती जादा लड़ाई ऊणे लगी री तेती ऊरिय्याह खे पेज, तेबे तेसखे छाडी की वापस ऊई जाणा, ताकि से काईल ऊई की मरी जाओ।”
16इजी ते बाद योआबे शईरो खे ठीक-टंगो रे देखी की जेते जगा खे से जाणो था कि वीर ए, तेथी ऊरिय्याह ठराईता। 17तेबे शईरो रे लोके निकल़ी की योआबो साथे युद्ध कित्तेया ओर लोका बीचा ते, मतलब दाऊदो रे सेवको बीचा ते बऊत मरी गे ओर तिना बीचे हित्ती ऊरिय्याह बी मरी गा। 18तेबे योआबे दूत पेजी की दाऊदो खे युद्धो रा पूरा आल बताया; 19ओर दूतो खे आज्ञा दित्ती, “जेबे तूँ युद्धो रा पूरा आल राजे खे बताई चुके, 20तेबे जे राजा गुस्से दे बोलणे लगो कि तुसे लोक लड़ने खे शईरो रे इतणे नेड़े कऊँ गये? क्या तुसा खे पता नि था कि तिना लोका दवाला पाँदा ते तीर छाडणे? 21क्या तुसे नि जाणदे कि यरूब्बेशेतो रा पाऊ अबीमेलेक किने काया? तेती एक जवाणस शईरो री दवाला पाँदे थी जेसे चाक्किया रा पाँदला पाट अबीमेलेको पाँदे सेटेया। तेसे जवाणसे से तेबेसो दे काया। तेबे तुसे दवाला रे एड़े नेड़े कऊँ गये? जे राजा दाऊद ये पूछो तो तुसे ये ज्वाब देणा कि तेरा दास ऊरिय्याह हित्ती बी मरी गा।” 22तेबे दूत चली गा ओर जाई की दाऊदो खे योआबो रिया सारिया गल्ला सुणाईयां। 23दूते दाऊदो खे बोलेया, “सेयो लोक प्रचंड ऊई की मैदानो दे आसा सामणे निकल़ी की आए, तेबे आसे सेयो बड़े द्वारो तक नठाए। 24तेबे धनुष चलाणे वाल़ेया दवाला पाँदा ते तेरे माणूंआ पाँदे तीर छाडे ओर राजे रे बऊत माणूं मरी गे ओर तेरा दास ऊरिय्याह हित्ती बी मरी गा।” 25दाऊदे दूतो खे बोलेया, “योआबो खे ईंयाँ बोलणा कि इजी गल्ला रिया बजअ ते उदास नि ऊणा, कऊँकि तलवार जिंयाँ एसखे तिंयाँ ई तेसखे बी नाश करोई, तो तूँ शईरो रे खलाफ जादा मजबूतिया साथे लड़ी की तेसखे जबाब दे। ओर तूँ तेसखे याओ दे।” 26जेबे ऊरिय्याह री लाड़ी बतशेबे सुणेया कि मेरा लाड़ा मरी गा, तेबे से आपणे लाड़े रिया तँईं रोणे-पीटणे लगी। 27ओर जेबे तेसा रे शोगो रे दिन बीती चुके, तेबे दाऊदे से बुलाई की आपणे कअरे राखी ती ओर से तेसरी लाड़ी बणीगी ओर तेसा रे एक पाऊ ऊआ। पर तेस कामो ते जो दाऊदे कित्तेया था यहोवा रोषे ऊईगा।
