Select a Verse
परमेशरो रा दमिश्क ओर इस्राएलो खे सजा देणा
1यहोवे री दमिश्क शईरो रे बारे दे पारी भविष्यबाणी, दमिश्क शईर एबे शईर नि रणा, से खंडहर ई खंडहर ऊई जाणा। 2अरोएरो रे शईरा रे शईर उजाड़ ऊई जाणे, सेयो डांगरा रे चूण्डो रे चरने री जगा बणी जाणे, डांगर तिदे रणे ओर तिना खे कोई नठाणे वाल़ा नि ऊणा। 3एप्रैमो रे गढ़वाल़े शईर, दमिश्को रा राज ओर बचे रे अरामी, तीनो बादो ते नि रणे ओर जो दशा इस्राएलो रे लोका रे वैभवो री ऊई, सेई तिना री ऊणी, सेना रे यहोवे री येई बाणी ए। 4यहोवे बोलेया, “तिना दिना दे याकूबो री तअन दौलत चली जाणी याकूब तेड़ा ऊई जाणा जेड़ा आदमी बमारिया ते पतल़ा ओआ।” 5से बखत एड़ा ऊणा जेड़ा रपाईम नाओं री काअटिया दे फसल बाडणे रे बखते ओआ। काम करने वाल़े खड़िया फसला बाडी की कट्ठी करोए जो डोरुए दे लगोई तेबे सेओ तिना सिल्लेया खे बाडोए ओर तिना ते नज्जो रे दाणे निकयाल़ोए। 6से बखत तेस बखतो जेड़ा ऊणा जेबे लोक जैतूनो री फसल निकयाल़ोए लोक जैतूनो रे डाल़ो ते जैतून चाड़दे बखते कुछ फल़ रयी जाओए, मतलब डाल़िया पाँदे दो-तीन फल़ ओर फल़ो वाल़ी डाल़िया दे केथी-केथी चार-पाँज फल़ रयी जाओए, तेड़े ई तिने सिल्ले बाडे ऊणे, इस्राएलो रे परमेशर यहोवे री येई बाणी ए।
7तेस बखते लोका परमेशरो रिया तरफा खे देखणा परमेशर, जिने से बणाये। तिना इस्राएलो रे पवित्र परमेशरो रिया तरफा खे मतादा रिया तँईं देखणा। 8लोका तिना आपणी बणाई री बेदिया रिया तरफा खे नि देखणा ओर ना आपणी बणाई री अशेरा देविया रे नाओं री मूर्तिया या सूरजो री मूर्तिया री तरफा खे देखणा। 9जेबे से दिन आऊणा, इस्राएलिया रे मजबूत शईर कणे बण ओर तिना री ऊजड़ जगा पाह्ड़ो री चूँडिया जेड़े ऊणे, जो इस्राएली लोका रे डरो ते छाडी ते थे ओर सेयो ऊजड़ पड़े रे रणे। 10कऊँकि तूँ ओ इस्राएल, आपणे उद्धारकर्ता परमेशरो खे पूली गा ओर आपणी मजबूत चट्टान याद नि राखी, इजी बजा ते चाए तूँ, अच्छिया डाल़िया लगाए ओर परदेशी डाल़िया री कलम चढ़ाए, 11एक दिन तुसा आपणी अँगूरो री रिया बेला लगाणे रे दिने तूँ तिना रे चऊँ कनारे बाड़ा लगाए ओर प्यागा खे ई तिना रे फूल खिलणे लगो, तेबे बी पछतावे ओर बऊत दु:खो रे दिने तेतेरा फल़ नाश ऊई जाणा।
परमेशरो रा आपणे लोका री रक्षा करना
12सुणो, लाणत, लाणत ए! सबी देशा दे बऊत सारे लोका रा केड़ा दहाड़ने रा शब्द ऊणे लगी रा, सेयो समुद्रो री लईरा जेड़े दहाड़ने लगी रे। राज-राज रे लोक केड़े दहाड़ने लगी रे, सेयो प्रचण्ड खाड्डा जेड़ी आवाज करोए! 13राज्य-राज्य रे लोक बाढ़ी रे बऊत पाणिए जेड़ा आल्ला करोए, पर परमेशर तिना खे बकणा ओर सेयो दूर नठी जाणे ओर एड़े उडाए जाणे जेड़ा पाह्ड़ो रा काआ-पतूड़ अवा साथे ओर तूड़ पऊण-चूखाने साथे कूमायी की उडाई जाओई। 14तेसा राती दुश्मण देशा रे जरीये इस्राएली लोक बऊत ई डरी जाणे। प्याग ऊणे ते पईले, कुछ बी नि बचणा। दुश्मणा खे तेती कुछ बी आथे नि आऊणा सेयो यहूदा रे पागो रिया तरफा खे आऊणे, पर तेती बी कुछ नि ऊणा।
