Select a Verse
यरूशलेम शईरो पाँदे हाय
1यहोवे बोलेया, अरीएल, अरीएल, लाणत ए तेस यरूशलेम शईरो पाँदे, जिदे दाऊद डेरे लगाई की रया! सालो पाँदे साल जोड़दे जाओ, त्योआर आपणे-आपणे बखतो दे मनांदे जाओ। 2तेबे बी मां अरीएलो खे सजा देणी। तेती रोण-पीटण रणा ओर से मेरी नजरा दे सच्ची खे ई अरीएलो जेड़ा ठईरना। 3मां तूँ चऊँ कनारा ते तेरे खलाफ डेरा लगाई की कांडेया साथे केरी देणा ओर मां लड़ाईया रिया तँईं तेरे खलाफ गढ़ बी बनाणे। 4मां तू अराई देणा ओर जमीना दे रूड़ाई की जमीना दे पाणा ओर तेबे तां तूड़ा बीचा ते बोलणा ओर तेरी आवाज आऊल़ी-आऊल़ी सुणनी, तेरी आवाज जमीना ते पूत-प्रेतो जेड़ी ऊणी ओर तां तूड़ा ते गुणगुणाई की बोलणा। 5तेबे तेरे परदेशी दुश्मणा री पीड़ छोटी तूड़ा जेड़ी ओर तिना डराऊणे लोका री पीड़ पूए जेड़ी उडाई जाणी।
6यशायाह भविष्यबक्ता बोलोआ, “सेना रा यहोवा अचाणक तेसगे बीच बचाओ करने ओर यरूशलेमो खे बचाणे आऊणा ओर तेस बादल़ गरजाणे, तरती ईलाणी, बऊत बड़ी आवाज करनी, पऊण-चूखाना ओर नाश करने वाल़ी आग पड़काणी। 7ओर सारी जातिया री पीड़ जेसा अरीएलो साथे लड़ाई करनी ओर जितणे लोक तेसरे ओर तेसरे गढ़ो रे खलाफ लड़ने, सेयो सारे राती देखे रे सुफने जेड़े ठईरने। 8तेबे जेड़ा कोई पूखा सुफने दे तो देखोआ कि से खाणे लगी रा, पर जागी की देखोआ कि तेसरा पेट पूखा ए या कोई त्याया सुफने दे तो देखोआ कि से पीणे लगी रा, पर जागी की देखोआ कि तेसरा गल़ा सूकणे लगी रा ओर से त्याया मरने लगी रा, तेड़ी ई तिना सबी जातिया री दशा ऊणी, जेसा सिय्योनो रे पाह्ड़ो साथे लड़ाई करनी।”
चतौणिया खे अणदेखा करना
9यशायाह भविष्यवक्ते बोलेया, “यरूशलेम शईरो रे लोको, सोचो ओर हैरान ओ! भोग-विलास करो ओर अन्दे ऊई जाओ! सेयो नशेड़ी तो आए, पर शराबो साथे नि, सेयो लड़खड़ाओ तो आए, पर दारू पीणे ते नि! 10यहोवे तुसे पारी नींजा दे पाई ते रे ओर नींजे तुसा रिया नबीए रिया जिया आखी बन्द करी ती रिया ओर तुसा रे दर्शण देखणे वाल़े सिरो पाँदे पड़दा पायी ता रा।” 11इजी री खातर सारे दर्शण तुसा खे एक टाल्ले दे लपेटी री ओर मुहरा साथे बन्द कित्ती री कताबा दे लपेटी दी कताबा जेड़े ए, जेतेखे कोई पढ़े-लिखे रे माणूंए खे ये बोली की देयो, “इजी खे पढ़” ओर से बोलो, “आऊँ नि पढ़ी सकदा, कऊँकि ये मुहरा साथे बन्द ए।” 12तेबे तेसा ई कताबा खे केसी अनपढ़ो खे ये बोली की देयो, “इजी खे पढ़” ओर से बोलो, “आऊँ तो अनपढ़ ए।” 13परमेशरे बोलेया, “यो लोक जो मुंए ते मेरा आदर करदे ऊए नेड़े आओए, पर आपणा मन मांते दूर राखोए ओर जो बस माणूंए री आज्ञा सुणी-सुणी की मेरा डर मानोए, 14इजी बजा ते सुण, मां इना साथे हैरान करने वाल़े काम, बल्कि बऊत हैरान करने वाल़े ओर अचम्बे रे काम करने, तेबे इना रे अक्लमंद माणूंआ री बुद्धि नाश ऊणी। यो आपू खे उशयार समजोए, पर आए नि, सेयो मां सामणे ल्याऊणे।”
आऊणे वाल़ेया दिना री उम्मीद
15लाणत ए तिना लोका पाँदे जो आपणी योजना खे यहोवे सामणे लकोणे री बड़ी कोशिश करोए ओर आपणे काम न्हेरे दे करी की बोलोए, “आसा खे कोई देखी नि सकदा। आसे कुण ए, आसा खे कोई आदमी नि जाणदा।” 16तुसा री समज केड़ी उल्टी ए! क्या कुम्हार माट्टिया जेड़ा गिणेया जाणा? क्या बणाई रिया चीजा आपणे बनाणे वाल़े रे बारे दे बोलो, “तिने आऊँ नि बणाया” या “तेसखे कोई समज नि ए” 17क्या एबे थोड़े दिन बीतणे ते बाद लबानोन जंगल़ फेर फल़ देणे वाल़ा बगीचा नि बणी जाणा ओर फल़ देणे वाल़ा बगीचा जंगल़ नि गिणेया जाणा? 18तेस बखते टऊणेया कताबा री गल्ला सुणने लगी जाणिया ओर अन्दे जिना खे एबुए तक कुछ नि दिशदा, सेयो देखणे लगणे। 19यहोवे रिया बजा ते फेर शरीफ लोक खुश ऊणे ओर गरीब माणूं इस्राएलो रे पवित्र परमेशरो रिया बजा ते मगन ऊणे। 20कऊँकि उपद्रवी माणूं फेर नि रणे ओर बुरे माणूंआ रा अन्त ऊणा, जो बुराई करने खे जागदे रओए। 21जो माणूंआ खे गल्ला दे फसाओए ओर जो सभा दे ल़वामे देंदे ऊए तिना खे फन्दा लगाओए, ओर तर्मो खे बेकार गल्ला रे जरीये बिगाड़ी देओए, सेयो सारे बर्बाद ऊई जाणे। 22इजी बजा ते अब्राहमो खे छुड़ाणे वाल़ा यहोवा, याकूबो रे कराने रे बारे दे ईंयाँ बोलोआ, “याकूबो खे फेर शर्मिंदा नि ऊणा पड़ना, तेसरा मूँ फेर निठा नि ऊणा। 23कऊँकि जेबे तेसरी ल्वादा मेरे काम देखणे, जो मां तिना बीचे करने, तेबे तिना मेरे नाओं री इज्जत करनी, आऊँ याकूबो रा पवित्र परमेशर ए, ओर तिना इस्राएलो रे परमेशरो रा बऊत डर मानणा। 24तेस बखते जिना रा मन पटकेया रा ऊणा तिना खे समज मिलणी ओर जो कुड़कुड़ाओए, तिना खे शिक्षा मिलणी।”
