Select a Verse
इस्राएलो री मूर्तिपूजा खे गल़त ठराणा
1नबी रोंदे ऊए बोलोआ, “जेबे तर्मी माणूं मरी जाओए ओर कोई एसा गल्ला री फिकर नि करदा; पग्त माणूं मरी जाओए, पर कोई नि समजदा। सच्चो खे ई तर्मी माणूं मरोआ ताकि आऊणे वाल़ी मुसीबता ते बची जाओ, 2से शान्तिया रे पऊँचोआ; जो सीदी चाल चलोआ, सेयो आपणे माँजे पाँदे राम करोए।” 3पर तुसे, ओ जादूगरनिया रे पाऊओ, ओ व्याभिचारी ओर व्याभिचारणिया री ल्वाद, न्याय रिया तँईं एती नेड़े आओ। 4तुसे केस पाँदे आसोए? तुसे केस पाँदे मूँ खोली की जीब निकयाल़ोए? क्या तुसे पाखण्डी ओर चूठे रे कुलो रे नि ए? 5तुसे सारे लोक आपणे तिना पवित्र डाल़ा निठे शारीरिक सम्बन्द बणाई की पैदा करने वाल़े देवतेया री पूजा करोए। ओर नाल़ेया दे ओर चट्टानी री दरारा बीचे आपणे बच्चेया खे बलिदान करोए। 6नाल़े रे चिकणे पात्थर ई तेरा इस्सा ठईरो जिना खे तुसे देवतेया रे रूपो दे पूजोए, तैं तिना खे अर्घ ओर नज्जो री बलि चढ़ाई। क्या आऊँ इना गल़त तार्मिकता रिया गल्ला ते शान्त ऊई जाऊँ? 7तैं एक बड़े ऊच्चे पाह्ड़ो पाँदे आपणा मूर्तिया खे बलिदान चढ़ाई राखेया, तूँ तेथी बलि चढ़ाणे खे चढ़ी गी। 8तैं आपणी घिनौनी मूर्तिया री नशाणी आपणे दरवाजे रे फल़ेया रे ओर देऊल़ी पीछे ई राखी; माखे छाडी की तूँ ओरी गे आपणे आपू खे दखाणे खे चढ़ी, तैं आपणा माँजा चौड़ा कित्तेया ओर तिना साथे कसम खाईली, ताखे तिना रा नांगा शरीर देखणा अच्छा लगोआ। 9तुसे आपणे इत्र ओर खुशबूदार तेल लगाओए, ओर मोलेक देवते री पूजा करने खे जाओए। तैं आपणे दूत दूर-दूर देशो खे पेजे ओर इजी तेई तुसे अधलोको तक आपू खे नीचा करी ता। 10तूँ ओरी देवतेया खे टोल़दे ऊए आपणी जादा यात्रा ऊणे रिया बजा ते थकी गी, तेबे बी तैं नि बोलेया कि ये बेकार ए; तूँ सोचे ई कि तेरी घिनौनी मूर्तिया रिया बजा ते ताखे तागत मिलोई, पर कदी नि सोचेया कि ताखे मूर्तिया री पूजा करना बन्द करी देणा चाईयो। 11यहोवा बोलोआ, “तैं केसरे डरो रे मारे मांते चूठ बोलेया ओर केसरा डर मानी की एड़ा कित्तेया कि आऊँ याद नि राखेया, ना मां पाँदे त्यान दित्तेया? क्या आऊँ बऊत बखतो ते चुप नि रया? इजी बजा ते तूँ मेरा डर नि मानदी। 12मां आपू तेरे तर्म ओर कामो रे बारे दे बताणा, पर मूर्तिया ते ताखे कोई फायदा नि ऊणा। 13जेबे तां मतादा खे मूर्तिया बुलाणियां, तेबे जो मूर्तिया तैं जमा करी राखिया, सेयो ई ताखे छुड़ाओ! सेयो सारिया अवा साथे बल्कि एक फूकरा साथे उडी जाणिया। पर जो मां पाँदे परोसा करोए सेयो एते देशो दे रणे ओर तिना मेरे मन्दरो दे मेरी आराधना करनी।”
चंगाई ओर शान्ति
14यहोवा बोलोआ, “ये बोलेया जाणा, पाँति बानी-बानी की बाट साफ करो, मेरी प्रजा री बाटा ते हर एक ठोकर दूर करो।” 15जो म्हारा पवित्र परमेशर सबी ते ऊच्चे स्वर्गो दे सदा रओआ; कऊँकि महान परमेशर जो सदा जिऊँदा रओआ, जेसरा नाओं पवित्र ए, से ईंयाँ बोलोआ, “जो दु:खी ओर नम्र ए, ताकि दु:खी ओर नम्र लोका रे मनो खे खुश करुँ। 16मां सदा आपणे लोका पाँदे दोष नि लगांदे रणा, ना सदा रोषे रणा; कऊँकि आत्मा मेरिया बणाई रिया ए ओर जीव मां सामणे बेओश ऊई जाओए। 17तिना रे लाल़चो रिया बजा ते रोषे ऊई कि तेसखे दुख दित्तेया था ओर रोषो रिया बजा ते तिना ते आपणा मूँ लकोया था; पर से आपणी मर्जिया री पापो री बाटा दे दूर पटकदे चली गे थे। 18आऊँ आपणे लोका री चाल देखदा आई रा, तेबे बी एबे सेयो ठीक करने; मां सेयो लई चलणे ओर खास करी की तिना रे दु:ख करने वाल़ेया खे शान्ति देऊँगा। 19आऊँ महिमा रे गीत गाणेवाल़ेया रे मुंए खे बनाणे वाल़ा ए; यहोवे बोलेया, जो दूर ओर नेड़े ए, दुँईं खे पूरी शान्ति मिलो; ओर मा सेयो ठीक करने। 20पर दुष्ट तो लईरांदे ऊए समुद्रो जेड़े ए जो एखी जगा नि रई सकदा ओर तेसरा पाणी मैल ओर चीकड़ उछाल़ोआ। 21मेरा परमेशर बोलोआ, दुष्ट लोका खे केथी बी शान्ति नि ए।”
