Select a Verse
राजा आहाजो रिया तँईं सन्देश
1जेबे योतामो रा पाऊ ओर उज्जियाह रा पोता राजा आहाज यहूदा पाँदे राज करो था, तेसरे दिना दे अरामो रे राजा रसीन ओर इस्राएलो रे राजा रमल्याह रे पाऊ पेकहे यरूशलेम शईरो साथे लड़ने खे चढ़ाई कित्ती, पर सेयो युद्ध नि जीती सके। 2जेबे दाऊदो रे कराने खे ये सन्देश मिलेया कि अरामिये एप्रैमिया साथे समजौता करी ला रा, तेबे तेसरा ओर प्रजा रा मन बी एड़ा इल्ली गा, जेड़े बणो रे डाल़ अवा लगणे ते ईलोए। 3तेबे यहोवे यशायाह खे बोलेया, “आपणे पाऊ शार्याशूबो खे लई की तोबिया रे डोरूआ री सड़का ते पाँदले पोखरे री नाल़िया रे सिरे पाँदे राजा आहाजो साथे मिलणे खे जा।” 4तेबे तेसखे बोल, “सावधान ओर शान्त ऊई जा ओर तिना दुँईं तुआँ निकल़दे ऊए लकड़ूआ ते, मतलब रसीन ओर अरामिया रे पड़के रे रोषो ते ओर रमल्याह रे पाऊए ते नि डर ओर ना कबरा। 5कऊँकि अरामी और रमल्याह रे पाऊआ समेत एप्रैमिये ये बोली की तेरे खलाफ बुरी साजिश करने री सोची राखी कि आओ, 6आसे यहूदा पाँदे अमला करी की तिना पाँदे कब्जा करी देऊँए ओर तेस पाँदे ताबेलो रे पाऊए खे राजा नियुक्त करी देऊँए। 7इजी री खातर यहोवे ईंयाँ बोली राखेया कि ये साजिश ना तो सफल ऊणी ओर ना पूरी। 8सेयो तितणे तागतबर नि ए जितणे लगोए कऊँकि अरामो रा सिर दमिश्क ओर दमिश्को रा सिर रसीन ए। तेबे एप्रैमो रा सिर शोमरोन ओर शोमरोनो रा सिर रमल्याह रा पाऊ ए। 9पैंठ साला ते पीतरे एप्रैमो री तागत इतणी टूटी जाणी कि से जाति बणी री नि रणी। जे तुसे लोक एसा गल्ला रा परोसा नि करो, तो पक्का तुसे स्थिर नि रणे।”
इम्मानुएलो रा नशाण
10बादो ते यहोवे माखे राजा आहाजो खे बोलणे खे एक ओर सनेआ दित्तेया, 11“आपणे परमेशर यहोवे ते कोई नशाण माँग; चाए से डूगी जगा रा ओ या ऊबे सर्गो रा ओ।” 12आहाजे बोलेया, “आऊँ नि मांगी सकदा ओर मां यहोवे री परीक्षा नि करनी।” 13तेबे तिने बोलेया, “ओ राजा दाऊदो रे कराने रे लोको सुणो! क्या तुसा माणूंआ खे परेशान करना छोटी गल्ल समजी की क्या एबे मेरा परमेशर बी परेशान करना? 14इजी बजा ते यहोवे आपू ई तुसा खे एक नशाण देणा। सुणो, एक कुआँरी गर्भवती ऊणी ओर तेसा रे पाऊ ऊणा ओर तेसा तेसरा नाओं इम्मानुएल राखणा। 15ओर जदुओ तक से बुरे खे छाडणा ओर खरे खे मानणा नि जाणी लओगा, तदुओ तक तेस नऊणीं ओर सयीत खाणा। 16कऊँकि तिजी ते पईले कि से पाऊ बुरे खे छाडणा ओर खरे खे मानणा जाणी लओ, से देश जेतेरे दुँईं राजेया ते तूँ डरने लगी रा, उजाड़ ऊई जाणा। 17ओर तुसा रे देशो दे यहोवे तां पाँदे, तेरी प्रजा पाँदे ओर तेरे बाओ रे कराने पाँदे एड़े दिन ल्याऊणे कि जदुओ ते एप्रैम यहूदा ते लग ऊईगा, तदुओ ते एड़े दिन कदी नि आए, मतलब अश्शूरो रे राजे रे दिन।” 18तेस बखते यहोवे सेयो पँऊरी रिया माक्खिया जो मिस्रो री नदिया रे सिरे पाँदे रओईया ओर सेयो पऊँरी जो अश्शूरो रे देशो दे रओईया, सीटी बजाई की बुलाणियां। 19तेबे दुश्मण सेना सारिया की सारिया एस देशो रे पाह्ड़ी नाल़े दे ओर चट्टानी री दरारा दे ओर सारे कांडेया ओर सबी चराईया पाँदे बैठी जाणिया। 20जेबे से बखत आऊणा, तेबे परमेशरो फरात नदिया रिया रे पारले कनारे ते एक नाई कैंची लई की बुलाणा, जो अश्शूरो रा राजा ए, यहोवे यहूदा रे लोक पूरी तरआ ते बेज्जत करने। 21तेस दिने एड़ा ऊणा कि माणूंए एक गाय ओर दो पेडा पाल़नियां। 22ओर तिना इतणा दूद देणा कि तेस नऊणीं खाया करनी; कऊँकि जितणे एती देशो रे रयी जाणे, तिना सबी नऊणीं ओर सयीत खाया करना। 23तेस बखते जिना-जिना जगा रे 1,000 चाँदिए रे सिक्केया रिया ह्जार अंगूरा री बेला ए, तिना सबी जगा रे कांडे ई कांडेवाल़े डाल़ ऊणे। 24सब लोक तेती तीर ओर धनुष लई की जाया करने, कऊँकि सारे देशो रे कांडेवाल़े डाल़ ऊई जाणे। 25ओर जितणे पाह्ड़ फरूए साथे खणे जाओए, तिना सबी रे कांडेवाल़े डाल़ा रे डरो रे मारे कोई नि जाणा, सेयो पाह्ड़ गाय-बल़दा खे चरने खे ओर पेडा-बाकरिया खे केसणे खे ऊणे।
