Select a Verse
ओर चतौणिया
1ओ मेरे बच्चेयो, क्या तुसे आपणे पड़ोसिये ओर परदेशिये रे कर्जे रिया तँईं
जमानत देणे रा वादा तो नि करी राखेया,
2तो तूँ आपणे मुंए रे वचनो तेई फसी जाणा,
ओर आपणे मुंए रिया गल्ला ते पकड़ेया जाणा।
3इजी री खातर ओ मेरे बच्चेयो, आपू खे बचाणे रिया तँईं एक काम करो,
तुसे आपणे पड़ोसिये रे आथो दे पड़ी चुके रे, तो जाओ,
ओर तेसरे पैरा पाँदे पड़ी की तेसखे मनाई लओ।
4तुसे ना तो आपणियां आखी रे नींज आऊणे देओ,
ओर ना आपणियां पलका मीछणे देओ;
5जिंयाँ ईरणी शकारिये रे आथो ते
ओर चिड़िया चिड़िमारो रे जाल़ो ते आपू खे छुड़ाई लओई
तिंयाँ ई तुसे बी आपणे पड़ोसिये ते आपू खे बचाई लओ।
आल़सी ऊणे ते बचणा
6ओ आल़सी, मकोड़िया गे जा;
तिना रे कामो पाँदे त्यान देई की बचार कर,
तेबे तूँ अक्लमंद बणी जाणा।
7तिना रा ना तो कोई न्याय करने वाल़ा ओआ,
ना परदान ओर ना तिना पाँदे कोई राज करने वाल़ा ओआ,
8तेबे बी सेयो आपणे खाणे रिया चीजा तूपा पाँदे,
ओर फसल बाडणे रे बखते कट्ठिया करोईया।
9ओ आल़सी, तूँ कदुए तक सऊँदे रणा?
तूँ आपणियां नींजा ते कदी जागणा?
10थोड़ा जा ओर सुती लओ, थोड़ा जा नींजा रा एक ओर टमका लई लओ,
ओर छातिया पाँदे आथ राखी की लेटेया रा रया,
11तेबे तेरी गरीबी बाटा रे लुटेरेया जेड़ी
ओर तेरी कमी अथियारबन्दो जेड़ी आऊणी।
दुष्ट माणूं
12ओछेया खे ओर बुरे काम करने वाल़े माणूंए खे देखो,
से आपणे मुंए ते उल्टिया-उल्टिया गल्ला बकदा फिरोआ,
13से आपणियां आखी ते ओर पैर ईलाई की
ओर आपणा आथ ईलाई की साअरा करोआ, से चाओआ कि माणूं चूठो पाँदे परोसा करो।
14से आपणे मनो रे उल्ट फेरो रिया गल्ला बणांदा रओआ,
से लगातार बुरा सोचोआ ओर लड़ाई-चगड़ा पैदा करोआ।
15इजी बजा ते तेस पाँदे मुसीबत अचाणक आऊणी,
से पला बीचे ई एड़ा नाश ऊई जाणा कि तेसरे बचणे री कोई उम्मीद नि रणी।
16छे चीजा ते यहोवा बैर राखोआ,
बल्कि सात ए जिना ते से कृणा करोआ;
17कमण्डो ते चढ़ी रिया आखी, चूठ बोलणे वाल़ी जीब,
ओर जो माणूं निर्दोषो खे काई देओए।
18जो माणूं बुरे काम करने रे बारे दे सोचोए,
सेओ माणूं जो बुरा करने खे तेज दौड़ने वाल़े ए,
19चूठ बोलणे वाल़ा गवाह् ओर पाईया बीचे चगड़ा पैदा करने वाल़ा माणूं।
व्यभिचारो रे खलाफ चतौणी
20ओ मेरे बच्चेयो, आपणे बाओ रिया आज्ञा खे मानी लओ,
ओर आपणियां माया री दित्ती रिया शिक्षा खे नि छाडेयो।
21तूँ इना गल्ला खे आपणियां गाठी दे बानी की दिलो दे राख;
ओर इना गल्ला खे आपणे गल़े रे आरो जेड़िया बणाई लओ।
22इना गल्ला तेरे चलणे रे तेरी अगुवाई करनी,
ओर सऊँदे बखते तेरी रक्षा
ओर जागदे बखते तां साथे ज्ञानो रिया गल्ला करनिया।
23कऊँकि परमेशरो री आज्ञा तो बाटा रे दिऊए जेड़िया ए,
ओर माया री शिक्षा जिन्दगिया री जोतिया जेड़ी ए,
ओर सखाणे वाल़े रा बकणा जिन्दगिया री बाट ए।
24इना तूँ बुरिया जवाणसा ते,
ओर बगानी जवाणसा रिया चिकणी चुपड़िया गल्ला ते बचाणा।
25तेसा रा बांकापण देखी की आपणे मनो रे तेसा खे पाणे री इच्छा नि कर,
से ताखे आपणी तिरछी नजरा ते फसाई नि सको;
26कऊँकि जो माणूं वेश्या रे चकरो दे फसोआ से रोटिया रे टुकड़ेया खे बी तरसोआ,
पर गंदे काम करने वाल़ी जवाणस तेस मर्दो
ओर तेसरिया लाड़िया री किमती जिन्दगी बी नाश करी देओई।
27क्या ऊई सकोआ कि कोई आपणी छातिया पाँदे आग राखी लओ;
ओर तेसरे टाल्ले नि फूखो?
28क्या ऊई सकोआ कि कोई बल़दे फेऊआ पाँदे चलो,
ओर तेसरे पैर नि फूखो?
29जो कोई मर्द बगानी जवाणसा गे जाओआ, तेसरी दशा बी एड़ी ऊणी;
बल्कि जो कोई तेसा खे छूँओगा, तेसखे जरूर सजा मिलणी।
30जेबे चोर पूखा रे मारे आपणा पेट परने खे चोरी करो,
तेबे तेसखे तो लोक नबाग नि जाणदे;
31तेबे बी जे से पकड़ेया जाओ, तो तेसखे सातगुणा देणा पड़ना;
बल्कि आपणे कअरो री सारी सम्पत्ति देणी पड़नी।
32पर जो बगानी जवाणसा साथे गल़त काम करोआ, से बिल्कुल मूर्ख आ;
एड़ा माणूं आपणा नाश करोआ।
33तेसखे काईल ओर बेज्जत ऊणा पड़ना,
ओर तेसरी बदनामी कदी नि मिटणी।
34कऊँकि जल़ना रे मारे मर्द बऊत ई गुस्से ऊई जाओआ,
ओर जेबे तेस बदला लणा तेबे तेस कोई दया नि दखाणी।
35तेस रिश्वता कनारो खे देखणा पनि,
ओर चाए तूँ तेसखे बऊत कुछ दे, तेबे बी से नि मानणा।
