Select a Verse
बदले री मांग
बजाणे वाल़े रे परदानो रिया तँईं दाऊदो रा पजन
1ओ परमेशर, जेसरी आऊँ स्तुति करूँआ,
तूँ चुप नि रओ।
2कऊँकि मेरे खलाफ दुष्ट ओर कपटी माणूं चूठ बोलोए,
सेयो मेरे बारे दे चूठ बोलोए जो सच्च नि आ।
3तिने मेरे बारे दे बुरिया गल्ला बोली कि आऊँ चऊँ कनारे ते केरी ता रा
ओर सेयो बिना बजा तेई मां साथे लड़ोए।
4मेरे प्यारो रे बदले सेयो मां साथे बरोद करोए,
पर आऊँ तो लगातार तिना रिया तँईं प्रार्थना करदा रऊँआ।
5तिने पलाईया रे बदले मां साथे बुराई कित्ती
ओर मेरे प्यारो रे बदले मां साथे बैर करी राखेया।
6मेरे दुश्मणे बोलेया, “तेसखे परखणे खे केसी प्रष्ट न्यायिये खे चूण,
ओर तेसरे आपणे दुश्मणा बीचा ते एकी खे तेस पाँदे दोष लगाणे दे।”
7जेबे तेसरा न्याय कित्तेया जाओ, तेबे से दोषी निकल़ो,
ओर तेसरी प्रार्थना पाप गिणी जाओ!
8से छोड़ ई मरी जाओ;
ओर कोई दूजा तेसरी तन-दौलत लई लो!
9तेसरे बच्चे अनाथ ऊई जाओ
ओर तेसरी लाड़ी बिदुआ ऊई जाओ!
10ओर तेसरे बच्चे मारे-मारे फिरो ओर सेयो पीख मांगेया करो;
तिना खे आपणे उजड़े रे कअरो ते दूर जाई की टुकड़ा माँगणा पड़ो।
11साऊकार तेसरा सब कुछ छीनी की लई लओ
ओर परदेशी तेसरी मईणता री कमाई लूटी लओ!
12तेस पाँदे कोई करूणा नि करो
ओर तेसरे अनाथ बाल़का पाँदे कोई दया नि करो!
13तेसरा वंश नाश ऊई जाओ,
दूजिया पीढ़िया रे तेसरा नाओं मिटी जाओ!
14तेसरे पितरा रा पाप प्रभुए खे याद रओ
ओर तेसरी माया रा पाप मटयाया नि जाओ!
15ओ यहोवा तूँ हमेशा तिना रे पाप याद राख,
ताकि तूँ तिना रा नाओं तरतिया पाँदा ते मटयाई दे!
16मेरा दुश्मण कदी केसी पाँदे दयावान नि ऊआ।
बल्कि दु:खी ओर गरीबा खे सताओ था
ओर तिने सेयो मरने बी दित्ते,
17तेसखे ओरी खे स्राप देणा प्यारा लगो था
ओर स्राप तेस पाँदे पड़ीगा, तेसखे आशीर्वाद देणा अच्छा नि लगो था,
इजी खे आशीर्वाद तेसते दूर रया।
18से स्राप देणा टाल्लेया जेड़ा पईनो था
ओर से तेसरे पेटो रे पाणिए जेड़ा
ओर तेसरी आड्डिया दे तेलो जेड़ा रची गा।
19तेसरे स्राप फैंटे जेड़े तेसरे चऊँ कनारे रओ,
जेड़ा से हर रोज पईनोआ।
20प्रभुए रिया तरफा ते मेरे बरोदिया खे
ओर मेरे खलाफ बुरा बोलणे वाल़ेया खे येई बदला मिलो!
21पर ओ यहोवा, तूँ आपणे नाओं रे मुताबिक मां साथे बर्ताव कर;
तेरी करूणा तो बड़ी ए, इजी री खातर तूँ माखे छुटकारा दे!
22कऊँकि आऊँ दु:खी ओर गरीब ए
ओर मेरे पीतरे मेरा दिल कायल ऊईरा।
23आऊँ टल़दी ऊई छांयी जेड़ा टल़दा जाणे लगी रा;
आऊँ टिड्डिया जेड़ा डवाई ता रा।
24बअरत करदे-करदे मेरे जानू कमजोर ऊईगे
ओर मांदे चर्बी नि रणे रिया बजा ते आऊँ सूकीगा रा।
25जेबे लोक माखे देखोए, तो सेयो मां पाँदे आसदे ऊए मजाक उडाओए;
सेयो बेज्जती करी की सिर ईलाओए।
26ओ मेरे प्रभु परमेशर, मेरी मताद कर!
आपणी करूणा रे मुताबिक माखे बचाई लओ!
27मेरेया दुश्मणा खे ये पता लगी जाओ कि ये तेरा काम ए
ओर ओ प्रभु, तैंई ये करी राखेया!
28सेयो माखे कोसदे तो रओ, पर तूँ आशीष दे!
सेयो तो उठदे ई शर्मिंदा ओ, पर तेरा दास खुश ओ!
29मेरे दुश्मण बेज्जत ऊई जाओ;
सेयो आपणी बेज्जतिया खे टाल्लेया जेड़े पईनी लो!
30मां प्रभुए रा बऊत तन्यवाद करना
ओर बऊत लोका बीचे तेसरी स्तुति करनी।
31यहोवा गरीबा रे दाँणे कनारे खड़ेया रा रणा,
ताकि से तेसखे मौता री सजा देणे वाल़ेया रे आथो ते बचाओ।
