Select a Verse
छुटकारे रिया तँईं प्रार्थना
दाऊदो रा पजन
1ओ प्रभु, मेरी प्रार्थना सुण,
मेरे गिड़गिड़ाणे रिया तरफा खे त्यान दे!
आपणी सच्चाई ओर तार्मिकता रे मुताबिक माखे उत्तर दे।
2ओ प्रभु, आपणे दासो साथे मुकद्दमा नि चला!
कऊँकि कोई प्राणी तेरी नजरा रे निर्दोष नि ठईरी सकदा।
3मेरेया दुश्मणे मेरे प्राणो रा शकार कित्तेया ए ओर आऊँ पुरिया तरआ ते अराई दित्तेया रा ए।
तिने आऊँ न्हेरिया जगा दे पाईता रा ओर आऊँ तिना जेड़ा ए जो बऊत पईले मरी गे रे ए।
4इजी बजा ते आऊँ बऊत नराश ओर चिन्ता दे आ।
5माखे पुराणे दिन याद आओए,
आऊँ तेरे सारे अद्भुत कामा पाँदे त्यान करूँआ
ओर तेरे आथो रे कामा खे सोचूँआ।
6आऊँ आपणे आथ फलाई कि तांते बिनती करूँआ,
सूकिया जमीना जेड़ा मेरा प्राण तेरिया तँईं त्याया ए। सेला
7ओ प्रभु, चटचारे मेरी सुणी लओ;
कऊँकि मेरे प्राण निकल़ने ई वाल़े ए,
मांते आपणा मूँ नि लको,
एड़ा नि ओ कि आऊँ कब्रा रे पड़े रे मरेया जेड़ा ऊई जाऊँ।
8प्रभु, प्यागा आपणी करूणा रे वचन माखे सुणा;
आऊँ तां ई पाँदे परोसा करूँआ।
जेते बाटा रे माखे चलणा चाईयो,
से बाट माखे बताई दे,
कऊँकि आऊँ तेरा ई त्यान करूँआ।
9ओ यहोवा, माखे मेरे दुश्मणा ते बचाई लओ;
आऊँ बचणे रिया तँईं तांगे आऊँआ।
10तूँ मेरा परमेशर ए। माखे ये सखा, कि तूँ आपणिया इच्छा ते मांते क्या करवाणा चाएया,
ओर तेरा पला आत्मा माखे सई बाटा रिये लई चलो।
11ओ यहोवा, तूँ जो तर्मी ए, माखे छुड़ा;
कऊँकि तूँ पला ए माखे मेरिया मुसीबता ते छुड़ाई लओ!
12ओर आपणी करूणा करी की मेरे दुश्मणा रा सत्यानाश करी दे
ओर माखे सताणे वाल़े सबी बैरिया रा सत्यानाश करी दे,
कऊँकि आऊँ तेरा दास ए।
