Select a Verse
राजा दाऊदो रा मुक्तिगान
बजाणे वाल़े रे परदानो रिया तँईं। प्रभुए रा दास दाऊदो रा पजन, जेतेरे वचन तिने प्रभुए रिया तँईं तेस बखते गाए जेबे प्रभुए से तेसरे सारे दुश्मणा रे आथो ते ओर शाऊलो रे आथो ते बचाया था, तेबे दाऊदे ये गीत गाया:
1ओ प्रभु, ओ मेरी तागत, आऊँ ताखे प्यार करूँआ।
2प्रभु मेरी रक्षा करने वाल़ा ए; से माखे मजबूत किले जेड़ा ए।
मेरा परमेशर मेरी सुरक्षा करोआ, ओर आऊँ तेस साथे सुरक्षित आ।
से माखे ढाल बणी की बचाओआ;
से माखे बचाओआ ओर माखे सुरक्षित राखोआ।
3मां प्रभुए खे जो स्तुतिया जोगा ए आका पाणिया;
ओर ईंयाँ आऊँ मेरे दुश्मणा ते बचाया जाणा।
4मेरे चऊँ कनारे बऊत बुरा हाल ए, जेतेते मेरी मौत बी ऊई सकोई;
ओर ये स्थिति एड़ी थी जेड़े कि बऊत जादा पाणिए रिये बाढ़े आऊँ बाई की काईता ओ।
5मौता रा खतरा मेरे नेड़े-तेड़े था,
ओर कब्रे मेरिया तँईं आपणा जाल़ बछयाईता।
6मुसीबता रे बखते मैं प्रभु परमेशरो खे आका पाईया;
मैं आपणा परमेशर पुकारेया
ओर तिने आपणे रणे रिया जगा ते मेरिया गल्ला सुणिया
ओर तिने मेरिया पुकारा पाँदे त्यान दित्तेया।
7तेबे तरती ईल्ली गी ओर थरथराई गी
ओर पाह्ड़ा रिया निऊँआ थरथराई की ईलणे लगिया,
कऊँकि प्रभु बऊत जादा गुस्से ऊईगा था।
8तेसरे नाको ते तुआँ निकल़ेया
ओर तेसरे मुंए ते पस्म करने वाल़ी आग निकल़ने लगी,
जेते साथे कोईले सुलगणे लगे।
9से सर्गो खे खोली की थाले उतरी की आया
ओर तेसरे पैरा निठे काल़े बादल़ थे।
10यहोवा पंखा वाल़े करूबा पाँदे सवार ऊई की आया,
फेर अवा जेड़े उडी की आया।
11तेसरे चऊँ कनारे न्हेरा था जेड़े की तिने कांबल़ टकी राखेया ओ,
ओर से चऊँ कनारा ते काल़े बादल़ ओर पाणिए री ओसे की टकी राखेया था।
12तेसरे चऊँ कनारे बिजल़ी कड़को थी,
ओल़े ओर जल़दे ऊए कोईले सर्गो ते थाले छूटणे लगे।
13प्रभु सर्गो रे गरजेया
ओर परमपरदान परमेशरे आपणी वाणी सुणाई, ओल़े ओर फेऊ पड़ने लगे।
14तिने आपणे तीर चलाई-चलाई की दुश्मण तित्तर-बित्तर करीते;
बल्कि बिजल़ी चमकाई-चमकाई की सेयो अराईते।
15ओ यहोवा, जेबे तैं एक बार थिड़केया
ओर तेरिया नासा रे साओ रिया तागती ते डूगे समुद्रो री थाली
ओर तरतिया री निऊँ दिखणे लगी गी!
16प्रभुए ऊच्चिया जगा ते आपणा आथ बढ़ाई की आऊँ पकड़ी ला
ओर डूगे पाणिए बीचा ते आँऊ ऊबे खींजी ला।
17तिने मांते नफरत करने वाल़ेया, मेरे तागतबर दुश्मणा ते मेरी रक्षा कित्ती,
कऊँकि आऊँ तिना खे नि अराई सकूँ था।
18मेरी मुसीबता रे बखते तिने मां पाँदे अमला कित्तेया,
पर प्रभु मेरा साअरा था।
19तिने माखे सई जगा दे पऊँचणे दे मेरी मताद कित्ती,
तिने आऊँ छुड़ाया, कऊँकि से मांते खुश था।
20मेरे सई काम करने रिया बजा ते परमेशर यहोवा माखे ईनाम दित्तेया;
ओर मेरे बेकसूर ऊणे रे बदले तिने माखे आशीर्वाद दित्तेया।
21आऊँ प्रभुए री बाटा रिये चलदा रया
ओर दुष्टता री बजा ते आपणे परमेशरो ते दूर नि ऊआ।
22मैं हमेशा तेरेया नियमा रा पालण करी राखेया,
ओर तेरिया आज्ञा नि तोड़ी राखिया।
23आऊँ तेस सामणे निर्दोष रया
ओर अपराधो ते आपणे आपू खे बचांदा रया।
24ओर इजी री खातर प्रभु माखे ईनाम देओआ कऊँकि आऊँ सई काम करूँआ,
से माखे जाणोआ कि आऊँ बेकसूर ए।
25दया करने वाल़े साथे तूँ आपू खे दयावंत
ओर तर्मी मर्दो साथे तूँ आपू खे तर्मी दखाएया।
26शुद्ध माणूंए साथे तूँ आपू खे शुद्ध दखाए आ,
ओर टेडे साथे तूँ टेडा बणेया।
27तूँ नम्र लोका खे बचाएआ,
पर कमण्डी माणूंए खे तूँ बेज्जत करेया।
28यहोवा तूँ मेरिया बाटा दे प्रयासा करेया ताकि आऊँ देखी सकूँ,
पर जेबे तूँ प्रयासा बणाएया तेबे कोई न्हेरा नि रंदा।
29कऊँकि परमेशर माखे मेरे दुश्मणा पाँदे अमला करने;
ओर तिना रे शईरा पाँदे कब्जा करने री तागत देओआ।
30सब कुछ जो यहोवा मेरा परमेशर करोआ से सई ए।
आसे तेस पाँदे परोसा करी सकूँए कि जो से वादा करोआ तेस पूरा करोआ।
से आपणे शरणा रे आऊणे वाल़ेया खे ढाला रे जेड़ा तिना री रक्षा करोआ।
31ओ यहोवा, ताखे छाडी की ओर कोई बी परमेशर नि ए!
म्हारी शरण लणे री बड़ी चट्टान तूँ ई ए।
32ये सेई परमेशर ए जो सामर्था साथे माखे परा पूरा करोआ
ओर मेरी बाटा खे सिद्ध करोआ।
33सेई मेरे पैरा खे ईरणियां रे पैरा जेड़ी तेज चाल देओआ
ओर माखे मेरी ऊच्चिया जगा रे खड़ा करोआ।
34से माखे पीतल़ी रा धनुष चलाणा सिखाओआ,
ताकि युद्धो रे बखते माखे धनुष चलाणा आई सको।
35ओ परमेशर यहोवा, जिंयाँ ढाल रक्षा करोई तिंयाँ ई तूँ मेरी रक्षा करेया,
ओर तेरी मताद पाई की आऊँ बऊत बड़ा राजा बणीगा रा।
36तैं मां पाँदे कब्जा ऊणे ते बचाई राखेया,
ओर आऊँ कदी नि रूड़ेया।
37मां आपणे दुश्मणा रा पीछा करी की सेयो पकड़ी लणे
ओर जदुए तक तिना रा नाश नि करी लऊँगा तदुए तक वापस नि आऊँगा।
38मां सेयो एड़े मारने कि सेयो उठी नि सकणे;
सेयो आरी कि मेरे पैरा पाँदे पड़ने।
39तैं माखे इतणी तागत दित्ती, ताकि आँऊ आपणे दुश्मणा ते युद्ध करी की तिना खे अराई सकूँ।
40तैं मेरे दुश्मण नठाए ओर मैं सेयो काईते,
ओर आऊँ तिना खे नाश करी देऊँ जो मांते कृणा करोए।
41तिने दुहाई तो दित्ती पर तिना खे कोई बी बचाणे वाल़ा नि मिलेया,
तिने प्रभु बी आपणियां मतादा रिया तँईं पुकारेया,
पर तिने बी तिना खे उत्तर नि दित्तेया।
42मैं सेयो कूटी-कूटी की पऊणी की उडाई री तूड़ा जेड़े करीते;
मैं सेयो बाटा रे चीकड़ो जेड़े निकयाल़ी की सेटी ते।
43तैं आऊँ ऊड़दंग मचाणे वाल़ेया लोका रे चगड़ेया ते बी छुड़ाया;
तैं आऊँ दूजिया जातिया रा परदान बणाई राखेया;
जिना लोका खे आऊँ जाणूं पनि था तिने मेरी सेवा कित्ती।
44जिंयाँ ई तिने मेरा नाओं सुणेया तिंयाँ ई सेयो मेरी आज्ञा रा पालण करने लगे,
परदेशी मेरे वशो रे ऊई जाणे।
45परदेशी मुरझाई जाणे
ओर आपणे किलेया ते थरथराई की निकल़ने।
46प्रभु परमेशर जिऊँदा ए; ओर चट्टानी जेड़ा मजबूत ए;
ओर मेरा उद्धार करने वाल़े परमेशरो री स्तुति ओ।
47तन्य ए मेरा बदला लणे वाल़ा परमेशर!
जिने देशो-देशो रे लोक मेरे वशो रे करीते;
48ओर प्रभुए आऊँ मेरे दुश्मणा ते छुड़ाया;
तूँ माखे मेरे बरोदिया रे सामणे ऊच्चा करेया
ओर चगड़ा करने वाल़ेया बरोदी मर्दा ते माखे बचाएया
49इजी बजा ते ओ प्रभु, जातिया-जातिया रे सामणे मां तेरा तन्यवाद करना
ओर तेरे नाओं रा पजन गाणा।
50तूँ आपणे ठराए रे राजे रा बड़ा उद्धार करेआ;
तां आपणे अभिषिक्त दाऊद
ओर तेसरे वंशो पाँदे जुगो-जुगो तक करूणा करदे रणा।
