Select a Verse
परमेशर म्हारा रक्षा करने वाल़ा
1जो लोक सर्वशक्तिमान परमेशरो रिया शरणा दे रओआ,
सेयो परमपरदान परमेशरो रिया देख-रेखा दे बची की राम करी सकोए।
2मां प्रभुए रे बारे बोलणा, “से मेरी शरण लणे री जगा ओर गढ़ ए;
से मेरा परमेशर ए, मां तेस पाँदे परोसा राखणा।”
3यहोवे तूँ सबी लूके दे जाल़ा ते छुड़ाणा,
ओर महामारिया ते बचाणा;
4तेस तूँ आपणे पंखा रिया ओटी रे लई लणा
ओर तां तेसरे चरणा दे शरण पाणी;
तेसरी सच्चाई ताखे ढाल ओर झिलम ठईरनी।
5तूँ ना तो राती रे डरो ते डरना
ओर ना दिने चलणे वाल़े दुश्मणा रे तीरो ते,
6ना न्हेरे फैलणे वाल़ी तेसा महामारिया ते
ओर ना नाश करने वाल़े तेस महारोगो ते जो दिने-दपईरे उजाड़ोआ।
7तेरे नेड़े ह्जार लोक ओर तेरे दाँणे कनारे दस ह्जार लोक रूड़ी की मरने;
पर महामारी तां नेड़े नि आऊणी।
8पर तां आपणियां आखी ते देखणा कि
दुष्ट लोका खे किंयाँ सजा मिलोई।
9तैं यहोवे खे आपणा बचाणे वाल़ा,
परमपरदानो खे आपणी रक्षा करने वाल़ा बणाया ए,
10इजी री खातर कोई मुसीबत तां पाँदे नि आऊणी,
ना कोई दु:ख तेरे डेरे रे नेड़े आऊणा।
11कऊँकि तेस आपणे दूता खे तेरिया तँईं आज्ञा देणी,
कि जेती केथी तूँ जाए सेयो तेरी रक्षा करो।
12तिना स्वर्गदूता तूँ आपणे आथो-आथ चकी देणा,
एड़ा नि ओ कि तेरे पैरो रे पात्थरो साथे बूड़ो।
13तां शेर ओर नाग केसणे,
तां जवान शेर ओर अजगर पैरा निठे केसणे।
14यहोवा बोलोआ, “जो मां साथे प्यार राखेया, इजी री खातर मां से छुड़ाणा;
मां से ऊच्ची जगा रे राखणा, कऊँकि तिने मेरा नाओं जाणी ला रा।”
15परमेशरे बोलेया, “जेबे से माखे आका पाओगा; तेबे मां तेसखे उत्तर देणा”
मुसीबता रे बखते मां तेस साथे रणा; मां से बचाणा ओर तेसरी महिमा बढ़ाणी।
16मां तेसरी उम्र बढ़ाणी ओर सन्तुष्ट करना
ओर तेसखे आपणे कित्ते रे उद्धारो रा दर्शण कराणा।
