Select a Verse
O to kototo aza a Isra'ila
1Me ene ta̱ A̱sulazuva mishin zuzu na̱ masa'a,
a̱vu u damma,
< hali she na̱ nkyun ma̱ yi n jinga̱ɗa̱. Vu ɓoso le adama usa'a u riya̱ a aci a ama suru. Ama a na a la'ai, matsun me pe'eni mo to una le. Babu za na aa suma reve u la'a, ko za aa la'a shi. 2Ko na̱ ka̱pa̱ a̱ka̱ri a̱ cipa̱ a̱ tyo uba̱ta̱ wa̱ a̱kwa̱kwa̱, n ta zuwa ukere u va̱ u reme le pe. Ko na a kumba a gawan zuva, diga ɗe n ta̱ cipa̱to le. 3Ko na a pa'aton aciyele a̱ ncilecile m Masasan ma Kame, n ta̱ bunga̱ le ɗe a̱vu n reme le. Ko na a pa'aton aciyele diga uba̱ta̱ u va̱ o ugundo u mala, ɗe ɗa maa zuwa yo vu ka̱ɗa̱ le. 4Ko na̱ n'yuwatan n le n shi m pura̱ le a 'ya̱wa̱ tsugbashi, ɗe'e n ta zuwa matsun me pe'eni mo una le. N ta varaa le esu a̱ va̱ adama e iwuya agba adama e isa'ani shi.>> 5A̱sulazuva A̱sula̱ o oɓolo a̱ a̱soja a zuva, a̱yi ɗa za na tsu ju'wa̱n uvaɗi a̱vu wu jeruwe, reve aza a na a̱ ri pe nden a yuwan a̱tsumola̱ngu, reve suru va̱ yi u 'yon a̱vu u cipa̱ tsu Uɗolu wa̱ Nilu va Masar, 6a̱yi za na suwai dasata va zuva, reve u yuwan ikyun ya̱ yi o uvaɗi, za na tsu ɗe mini ma mala reve wo oco le o urewesu wu uvaɗi, A̱sulazuva a ɗa ala a̱yi. 7A̱vu A̱sulazuva a damma, < una̱ta̱ u ɗa i ri na̱ a̱za̱ a̱ Kush e ekere a̱ va̱ shi? Na amayun mu uta̱ ɗu aza a Isra'ila diga e iɗa ya Masar, na aza a Filistiya diga e iɗa ya Karita na aza a Suriya diga e iɗa ya Kir shi? 8A̱yi ɗa nda, esu A̱sulazuva Mogono me Ili Suru ta̱ ka̱lyuwusa̱ tsugono tsu ulambu wa̱ a̱ɓula̱ a nda. N to kototo tsugono tsa nda diga o urewesu wu uvaɗi, she de moo kototo u'wa wa Yakubu suru suru shi,>> A̱mu A̱sulazuva a ɗa n dammai ne. 9A̱yi ɗa nda ma ca udammu, n'yuwatan n ɗu a̱ susa̱ u'wa wa Isra'ila cine a̱ tsu susa̱ wuyun a̱tsuma̱ a atali, babu aatali a na a̱ riya̱ a̱tsuma̱ a̱ wuyun. A ta vari a̱za̱ e iwuya, a̱za̱ a̱ a̱ɓula̱ fo a ta bete'we le a̱tsuma̱ a nɗa. 10A̱za̱ o unusu a̱tsuma̱ a ama a̱ va̱ suru a̱ ta̱ kuwa̱ o una̱ u matsun me pe'eni, aza a na aa dansa, < ko u reme tsu shi.>> Uka̱mba̱tosu wa aza a Isra'ila 11< Oogodo a̱ Da̱wuda a na a̱ shi a̱ riya̱i. Reve n lapula ba̱ta̱ na la̱nga̱i, a̱vu n da̱shi suwisa yi cine u shi nu ufaru. 12Ama a Isra'ila a ta usa suru akapi e ili ya̱ Edom i na i buwai, a̱vu fo a usa akapi a nɗa na a̱ shi ee ɗesu na ala a̱ va̱. A̱mu A̱sulazuva a ɗa n dammai ne, waru n to shiton yi.>> 13A̱vu A̱sulazuva a damma, < o toni a̱ca̱pa̱ a za vu ugasa. Za mokpoko ma masayan ma̱ ina̱bi waru a̱ca̱pa̱ a za vu ca̱'a̱n. Nsasan n ta̱ da̱na̱ yenetosu masayan ma sa'avu, nsasan n wa'a wa'a waru a̱ ta̱ da̱na̱ o yenetosu masayan ma̱ ina̱bi uba̱ta̱ suru. 14N ta̱ ka̱mbuwa̱ ama a̱ va̱ aza a Isra'ila na aba'un e le, A ta suwisa ilyuci i na yo o'woi okongo, a̱vu a̱ da̱nu pe. A̱ ta̱ cu'wa̱n a̱ɗuma̱ a̱ ina̱bi a̱vu gba o sowo masayan me le, a ta yuwan a̱rumbu a̱vu a lyuwa muwun mu ɗanga le. 15N ta̱ shuwa̱ le e iɗa i le, agba a̱a̱ da̱shi mula̱ le diga e iɗa i na n ca nle shi.>> A̱sulazuva A̱sula̱ a̱ ɗu a ɗa a dammai ne.
